U BYNRIEW

Ka Baibl ka ong kumno: U Blei “um shym la thaw suda ïa [ka pyrthei], u la thaw ïa ka ban shong briew.”​—ISAÏAH 45:18.

KA PYRTHEI

Ka Baibl ka ong kumno: “Kawei ka pateng bynriew ka leit noh, bad kawei pat ka wan; te ka khyndew ka neh ha la ka rta.”​—EKLESIASTIS 1:4.

KATA KA MUT AÏU: Katkum ka Baibl, yn ym pynjot ïa ka pyrthei lano lano ruh, bad yn don beit ki briew kiban sah ha ka. Te ka mut aïu pat haba ong ka pyrthei kan kut noh?

PYRKHAT: Ka Baibl ka ïanujor ïa ka jingkut jong kane ka pyrthei bad kaei kaba la jia ha ka por jong u Noah. Ha kata ka por, ka pyrthei ka la dap da ka jingsniew. (Jenesis 6:13) Hynrei, u Noah u la long u briew uba hok. Te U Blei u la ïada ïa u Noah bad ïa ka ïing ka sem jong u, hynrei U la pynjot noh ïa ki briew kiba sniew da ka jingshlei um. Ha kaba ïadei bad kaei kaba la jia ha kata ka por, ka Baibl ka ong: ‘Ka pyrthei kaba myn ha kata ka por, haba la pynshlei ïa ka da ka um, ka la jot noh.’ (2 Petros 3:6) Kata ka dei ka jingkut jong ka pyrthei ha kata ka por. Te kaei kaba la shah pynjot? Ym dei ka pyrthei, hynrei ki dei ki briew kiba sniew kiba don ha ka pyrthei. Te haba ka Baibl ka kren shaphang ka jingkut jong kane ka pyrthei, ka thew ïa ka jingkut jong ki briew bymman bad jong kiei kiei baroh kiba sniew—ym ka jingkut jong kane ka pyrthei.

KI JINGEH BAD KI JINGSNIEW

Ka Baibl ka ong kumno: “Namar sa khyndiat pat, te u bymman um don shuh, bad men pyrkhat bniah ïa ka jaka jong u, te un ym don shuh. Hynrei kiba lui lui kin ïoh kynti ïa ka ri, bad kin pynsngewbha ïalade ha ka jingkyrhai ka jingsuk.”​—SALM 37:10, 11.

KATA KA MUT AÏU: Ka jingshlei um ha ka por jong u Noah ka khlem pynduh junom ïa ka jingsniew. Hadien ka jingshlei um, ki briew kiba sniew ki la mih biang bad ki la pynjynjar ïa ka jingim jong kiwei. Hynrei, shen U Blei un sa pynduh noh ïa ki jingsniew baroh. Kumba la ong u nongthoh jong ka salm: ‘U bymman un ym don shuh.’ U Blei un sa pynduh noh ïa ki jingsniew lyngba ka Hima jong u—ka sorkar kaban synshar na bneng halor ki briew kiba kohnguh ïa U Blei.

PYRKHAT: Hato kito kiba synshar ïa ka pyrthei mynta kin pdiang ïa ka jingsynshar jong ka Hima U Blei? Ka Baibl ka ïathuh ba kin ym pdiang ïa ka Hima U Blei. Pynban, kin ïaleh pyrshah ïa ka. (Salm 2:2) Kaei kaban jia? Ka Hima U Blei kan pynduh noh ïa baroh ki sorkar jong u briew, bad tang ma ka “kan ïaisah bymjukut.” (Daniel 2:44) Hynrei balei donkam ban pynduh noh ïa ka jingsynshar jong u briew?

Ka Baibl ka ong kumno: “Kam long ha u briew uba ïaid ban pynbeit ïa la ki jingjam.”​—JEREMAÏAH 10:23.

KATA KA MUT AÏU: Ym shym la thaw ïa u briew ba un synshar hi ïalade. Kim lah ban synshar bha ïa ki briew, bad kim lah ban pynduh ïa ki jingeh jong ki.

PYRKHAT: Ka kot, ka Britannica Academic ka ong ba ki sorkar “kim lah ban weng ïa ki jingeh jong ki briew kum ka jingduk, ka jingkyrduh bam, ki jingpang, ka jinglyngshop ka mariang, bad ka thma ne ka jingpynmynsaw.” Ka ong ruh: “Don kiba ong ba lada don tang kawei ka sorkar, kan sa lah ban weng ïa ki jingeh jong ka pyrthei.” Hynrei wat lada baroh ki sorkar ki ïatyllilang ruh, ïa ka pyrthei yn dang synshar hi da ki briew kibym janai, kibym lah ban weng ïa ki jingeh ba la kdew haneng. Dei tang ka Hima U Blei kaba don ïa ka bor ban weng noh junom ïa baroh ki jingeh kiba don ha pyrthei.

Te, katkum ka Baibl, ka jingkut jong ka pyrthei kaba thew ïa ka jingkut jong kiei kiei kiba sniew, kam dei kaei kaei kaba ki briew kiba bha ki dei ban sheptieng. Pynban, ka dei kaei kaei kaba ki dei ban khmih lynti namar ka Hima ka jong U Blei kan sa pynthymmai biang ïa kane ka pyrthei kaba la sniew.

Lano kine kiei kiei baroh kin jia? Ka Baibl ka batai shaphang kane ha ka lynnong kaba bud.