Dis Wɔl Gɛt fɔ Dɔn?
Sɔntɛm yu no se di Baybul tɔk bɔt di wɔl in dɔn wan. (1 Jɔn 2:17) Fɔ se i min se mɔtalman nɔ go de na di wɔl igen? Fɔ se tin dɛn we gɛt layf nɔ go de na di wɔl igen? Ɔ dɛn go dɔnawe wit di wɔl kpatakpata?
DI BAYBUL IN ANSA FƆ DƐN KWƐSTYƆN DƐN DE NA NƆ!
Wetin Nɔ Go Dɔn?
MƆTALMAN
Wetin di Baybul se: Gɔd “nɔ mek [di wɔl] fɔ natin, bɔt i mek am fɔ lɛ pipul dɛn de de.”—AYZAYA 45:18, NWT.
DI WƆL
Wetin di Baybul se: “Pipul de bɔn ɛn pipul de day, bɔt di wɔl in de sote go.”—ƐKLIZIASTIS 1:4.
WETIN DIS MIN: Di Baybul se dɛn nɔ go ɛva dɔnawe wit di wɔl ɛn pipul dɛn go de de ɔltɛm. So, wetin di Baybul min we i se di wɔl go dɔn?
TINK BƆT DIS: Di Baybul kɔmpia di wɔl in dɔn wan to wetin bin apin insay Noa in tɛm. Da tɛm de, di wɔl bin ful-ɔp wit “soso fɛt fɛt.” (Jɛnɛsis 6:13) Bɔt Noa bin de du wetin rayt. So Gɔd bin sev Noa ɛn in famili, bɔt I yuz flɔd fɔ dɔnawe wit di wikɛd pipul dɛn. We di Baybul bin de tɔk bɔt wetin bin apin da tɛm de, i se: “Gɔd bin dɔnawe wit di pipul dɛn na di wɔl we flɔd kam.” (2 Pita 3:6) Na so di wɔl bin dɔn da tɛm de. Gɔd nɔ bin dɔnawe wit di wɔl, bɔt na di wikɛd pipul dɛn we bin de na di wɔl na dɛn i dɔnawe wit. So, we di Baybul de tɔk bɔt di wɔl in dɔn wan, i nɔ min se dɛn go dɔnawe wit di wɔl we wi de. Bɔt i min se dɛn go dɔnawe wit di wikɛd pipul dɛn na di wɔl ɛn di bad tin dɛn we de apin.
Wetin Go Dɔn?
PRƆBLƐM DƐN ƐN WIKƐDNƐS
Wetin di Baybul se: “Smɔl bit mɔ, yu nɔ go si di bad man igen; yu go luk fɔ am so, bɔt yu nɔ go fɛn am. Bɔt dɛn wan we nɔ tek dɛnsɛf mek natin go gɛt wetin PAPA GƆD prɔmis dɛn ɛn ɛnjɔy pis.”—DI SAM DƐN 37:10, 11.
WETIN DIS MIN: Di Flɔd we bin kam insay Noa in tɛm nɔ bin mek wikɛd tin dɛn lɛf fɔ apin te go. Afta di Flɔd, wikɛd pipul dɛn bin bigin bak fɔ mek ɔlman sɔfa. Bɔt i nɔ go te igen, Gɔd go mek wikɛdnɛs dɔn. Jɔs lɛk aw wi bin rid na Di Sam Dɛm 37, vas 10: “Yu nɔ go si di bad man igen.” Gɔd go yuz in Kiŋdɔm fɔ mek wikɛdnɛs dɔn. Gɔd in Kiŋdɔm na gɔvmɛnt we de na ɛvin we go rul di wan dɛn we de obe Gɔd na di wɔl.
TINK BƆT DIS: Yu tink se di wan dɛn we de rul di wɔl naw go sɔpɔt Gɔd in Kiŋdɔm? Di Baybul sho se dɛn nɔ go du dat. Dɛn go de agens Gɔd in Kiŋdɔm. (Di Sam Dɛm 2:2) Wetin go apin? Gɔd in Kiŋdɔm go pul ɔl mɔtalman gɔvmɛnt, ɛn na in wan “go tinap sote go.” (Daniɛl 2:44) Wetin mek dɛn nid fɔ pul mɔtalman gɔvmɛnt dɛn?
WETIN WI NID ƐN WETIN MEK?—Mɔtalman Gɔvmɛnt dɛn Fɔ Kɔmɔt na Pawa
Wetin di Baybul se: “Mɔtalman nɔ ebul kɔntrol in yon layf ɔ dayrɛkt in stɛp [dɛn].”—JƐRIMAYA 10:23.
WETIN DIS MIN: Gɔd nɔ mek mɔtalman fɔ lɛ dɛn rul dɛnsɛf. Dɛn nɔ kin ebul fɔ rul ɔda pipul dɛn ɛn sɔlv dɛn prɔblɛm dɛn fayn fayn wan.
TINK BƆT DIS: Britannica Academic tɔk se mɔtalman gɔvmɛnt dɛn nɔ ebul fɔ “sɔlv prɔblɛm dɛn we de ɔlsay na di wɔl, lɛk po, aŋri, siknɛs, wɔ, fɛt-fɛt ɛn nachɔral dizasta dɛn lɛk atkwek ɛn flɔd.” I kɔntinyu fɔ tɔk se: “Sɔm pipul dɛn . . . biliv se na wan gɔvmɛnt we go rul ɔlsay na di wɔl na in nɔmɔ go ebul fɔ sɔlv dɛn prɔblɛm dɛn de sote go.” Bɔt ivin if ɔl di mɔtalman gɔvmɛnt dɛn kam togɛda, di wan dɛn we go rul di wɔl go stil bi mɔtalman dɛn we nɔ pafɛkt ɛn dɛn nɔ go ebul fɔ sɔlv di prɔblɛm dɛn we wi jɔs dɔn tɔk bɔt. Na Gɔd in Kiŋdɔm na di wangren gɔvmɛnt we gɛt di pawa fɔ sɔlv ɔl di prɔblɛm dɛn na di wɔl sote go.
So, akɔdin to di Baybul, di wɔl in dɔn wan, dat na, di bad tin dɛn we de apin naw, nɔto tin we gud pipul dɛn fɔ fred. Bifo dat, na sɔntin we dɛn fɔ wet fɔ bikɔs Gɔd de kam pul dis wɔl we dɔn pwɛl ɛn kam wit wan wɔndaful nyu wɔl!
Ustɛm ɔl dis go bi? Di nɛks atikul go ɛksplen di Baybul in ansa.
