Baa Chieeŋndo Hoo Sɔla Niŋ Pa Tambei?
Naapum a tuei niŋ mi Baabuiyo dimi maa chieeŋndo hoo cho tambei sɔla. (1 Chɔŋ 2:17) Baa hoo sim ni maa waŋnda chieeya kpou Mɛlɛka cho hunɔɔ tɛɛmbuu ni? Baa yoomu ve lɛ niŋ o chieeŋndo choo le ɔɔ chieeŋndo kpeekpei Mɛlɛka cho hunɔɔ tɛɛmbuu ni?
MULI BAABUIYO LE NYUNALAŊ NDAŊ KPOU CHO NI, PƐ PƐ BƐƐ!
Yɛɛnɛ Sɔla yɛ Niŋ Tambei Le?
WAŊNDA CHIEEYA
Nyɛ Baabuiyo dimi wo: Mɛlɛka “toosiaa [chieeŋndo] le mbo wa fondo fuu le. Kɛ o toosiaa ndu le mi waŋnda chieeya wa lechoo.”—AISAYA 45:18, NWT.
CHIEEŊNDO
Nyɛ Baabuiyo dimi wo: “Yuŋgulaŋ la huŋ ko la hiau, la huŋ ko la hiau, kɛ chieeŋndo ndu ndu, o feŋaŋ lechoo le. Le fɛɛŋ a fɛɛŋ o choŋnuŋ mɛɛ o waŋnuŋ o kandɔŋndo yɛ koni.”—IKILISIAATII 1:4.
NYƐ O SIM NDO: A mɛɛ Baabuiyo dimi yɛ, fɛŋ bɛɛ chieeŋndo sɔla niŋ tambei le. Le teleŋ o teleŋ, waŋnda chieeya cho wa lechoo. Lelaŋ, yɛɛnɛ tambii chieeŋndo sim yɛ?
YIYAŊNDƆ: Baabuiyo tuu tambii chieeŋndo hoo a nyɛ yɔŋnuŋ o teleŋ Nuuwa wo niŋndo. A teleŋ koŋ, “dɛnɛ wɔɔŋndo wa o piaa cha o chieeŋndo choo.” (Chɛnɛsee 6:13) Kɛ Nuuwa wa sakpo Mɛlɛka o hɔl. Le hei, mi Mɛlɛka piŋi ndu nda yuŋgu ndɔɔ. Kɛ mbo tɛɛmbuu wanaa dɛnɛ wɔɔŋnda kpou a mɛŋma koŋgi bɛnduaŋ. Mi Baabuiyo suaa a nyɛ yɔŋnuŋ koŋ ndo aa: “Mi Mɛlɛka tɛɛmbuu waŋnda o teleŋ koŋ niŋ. Hei yɔŋnuŋ teleŋ mɛŋndaŋ ma kumbu chieeŋndo kpou wo.” (2 Pitɛ 3:6) Mi chieeŋ koŋ sɔla tambei. Kɛ yɛɛ kpeekpei ndoo sɔla yɛ tambei? O cho chieeŋndo le Mɛlɛka tɛɛmbuu le, kɛ wanaa dɛnɛ wɔɔŋaa wa lechoo wa. Mɛɛ te Baabuiyo soo pɛ a tambii chieeŋndo okɔɔ, o cho i sɔɔ a tambii chieeŋ naŋ cho niŋndo le. Kɛ, o cho suɛi a tambii wanaa dɛnɛ wɔɔŋaa cho o chieeŋndo choo wa okɔɔ, vɛlɛ a nyɛm kɛŋ nda chuuŋgiaa woŋ.
Yɛɛnɛ Cho yɛ Tambei Sɔla?
BAHAWƐILAŊ A DƐNƐ WƆƆŊNDO
Nyɛ Baabuiyo dimi wo: “O bendu lɛ tiŋ te, mi Mɛlɛka tosa mi wanaa dɛnɛ wɔɔŋnda a lo pɛ. Kɔ bɛɛ o fondaŋnda ndalaŋ a seeluŋ nda niŋ te. Kɛ wanaa tusiŋ nda, nda lɛŋnde Mɛlɛka chua buŋgɛi leŋ le wa niŋ nyɛ nda ni, nduyɛ, nda wa niŋ o kɔl nyulu niŋ, nduyɛ, ma de nyɛm kɛndɛŋ Mɛlɛkaŋ tɔnɔ ni.”—SAM 37:10, 11.
NYƐ O SIM NDO: Mɛŋma Koŋgi Bɛnduaŋ o teleŋ Nuuwa wo niŋ ma feŋa dɛnɛ wɔɔŋndo kpou le. Mɛɛ ma hiou, mi wanaa dɛnɛ wɔɔŋnda tosa vɛlɛ mi yoomoo wa o kala le wana o wana. Mɛlɛka cho suŋ hunɔɔ dɛnɛ wɔɔŋndo kpou faŋa. Mi wana ŋchondoo dimi aa: “Wanaa dɛnɛ wɔɔŋnda a [cho] lo pɛ.” Mɛlɛka cho Masale ndɔleŋ soliŋ kpeku mbo faŋa dɛnɛ wɔɔŋndo kpou. Masaleŋ ndeŋ le cho wa le chieeŋndo kpou ni, nduyɛ wanaa diikuŋ Mɛlɛka wa cho wa o leŋ bɛŋgu ni.
YIYAŊNDƆ: Baa wanaa cho o masaleŋ choo suŋ suŋnda diikuŋ niŋ pa Masale Mɛlɛkaleŋ? Baabuiyo chɔm maa a tosa niŋ keŋ kposoŋ te. Waŋnda haa cho nila kalulaŋ tosa, ma simul Masale Mɛlɛkaleŋ. (Sam 2:2) Yɛɛ cho yɛ wa fulamakɔɔlioo? Masale Mɛlɛkaleŋ le cho hunɔɔ masɛi waŋnda chieeya kpou faŋa, nduyɛ “mi le lo le fɛɛŋ a fɛɛŋ.” (Daaniɛɛ 2:44) Kɛ le yɛɛnɛ Mɛlɛka cho yɛ hunɔɔ masɛi hei kpou faŋa?
NYƐ NAŊ YEEMA WO—Ŋ Yeema mi Masɛi Waŋnda Chieeya Faŋaŋ
Nyɛ Baabuiyo dimi wo: “Wana chioo ndu, o tiuba mbo chɔm ndupila nɛiyo le.” —CHƐLUIMAYA 10:23, NWT.
NYƐ O SIM NDO: Mɛlɛka toosiaa waŋnda chieeya le ma wa ŋmasa le. A chiee wanaa nda cho masaleŋ choo wa biyɔɔ le, nduyɛ a soli bahawɛila ndalaŋ te.
YIYAŊNDƆ: Mi yau pilɛ suaa a masɛi waŋnda chieeya okɔɔ aa: “Masɛi waŋnda chieeya tiuba mi i faŋa bahawɛilaŋ mɛɛ bala fondolaŋ, yiaaŋ, naalaŋ, kpundɛlaŋ, chɔulaŋ ɔɔ sɔŋgɔlaŋ la cho nuaa yɛ le.” Mi yau koŋ hiau lachi a dimioo aa: “Waŋnda apum . . . laalaŋ kɛsɛ maa masale waŋnda chieeya kinɛi le tiuba ni mi le faŋa bahawɛilaŋ ndaŋ.” Kɛ o yɔŋ bɛɛ mi masaa o chieeŋndo choo kpou nɔ yiyaŋ pilɔɔ, a nɔla ma chii bahawɛilaŋ ndaŋ te, kanifuule wanaa lahakiaa nda cho ni. Masale Mɛlɛkaleŋ kinɛi le cho Masale nɔ kpaayaa le bahawɛila waŋnda chieeya kpou faŋaa le fɛɛŋ a fɛɛŋ ni.
A mɛɛ Baabuiyo chɔm yɛ, tambii chieeŋ dɛnɛ wɔɔŋ naŋ cho hoo niŋndo, o cho nyɛ wanaa kɛndiaa nɔ ma yɔŋ isiooŋ te. Kɛ o cho suɛi kɛndɛ le nda, kanifuule te chieeŋ dɛnɛ wɔɔŋndo hoo faŋaŋ pɛ, a cho hunɔɔ luɛiyɔɔ o chieeŋ sɛnɛi Mɛlɛkaa niŋ!
Teleŋ kuɛɛ hei cho yɛ yɔŋnɔŋ? Ŋ cho muli Baabuiyo sɔla o buŋgɛi cho lachi ve niŋ.
