Uzuni ou ngau haga po ndi?
Walye nove wa diva eyi za uyunga Bibeli asi uzuni ngau haga po. (1 Johanesa 2:17) Eyi kutanta nye asi vantu kapi hena ngava parukira pevhu ndi? Evhu ngava li zonagura po ndi kwato eyi ngayi kara po?
BIBELI ZA LIMBURURA MAPURO OGO ASI HAWE!
Yinke ngayi dira kuhaga?
VANTU
Eyi za uyunga ko Bibeli: Karunga ‘kapi ga sita uzuni u kare ngorooro siporongwa, nye kwa tura mo vantu va kare mo.’—JESAYA 45:18.
EVHU
Eyi za uyunga ko Bibeli: “Mapupi nomapupi kuna kuhaga po nomakwawo taga horoka po, nye uzuni kapi au, runduruka, hawa karera ngorooro.”—MUUDISI 1:4.
EYI AYI TANTA: Kuliza noBibeli, evhu kapi ngava li zonagura po nye vantu ngava twikira ngorooro kukara po. Yinke nye ayi tanta apa azi uyunga asi uzuni ngau haga po?
KONEKA: Bibeli kwa hetakanesa kuhaga kouzuni kumwe neyi ya horokere pomazuva gaNowa. Posiruwo sina, pevhu kwa ‘zulire po yirugana yoyidona.’ (Genesis 6:13) Nampili ngoso, Nowa kwa kere muhungami. Eyi yiyo Karunga ga parwililire Nowa nepata lyendi, nokuzonagura po vadinikarunga noruhanzo. Bibeli kwa uyunga kuhamena eyi ya horokere posiruwo sina asi: ‘Ruhanzo romema, yiro rwa zonagwire uzuni wanare.’ (2 Peturusa 3:6) Olina yilyo lya kere ehagero lyouzuni wina. Nye yinke va zonagwire po? Kapisi evhu nye vadinikarunga. Yipo nye, apa Bibeli azi uyunga asi uzuni ngau haga po, kapi azi tamba kokukazonagura po evhu. Nye azo kutamba kokukazonagura po vadinikarunga apa pevhu noyininke yoyidona eyi ava rugana.
Yinke ngayi haga?
MAUDIGU NTANI VADINIKARUNGA
Eyi za uyunga ko Bibeli: “Karuwogona tupu ko, mudinikarunga ta dongonoka po; ngo mu papara, nye kapi ngo mu gwana. Valinunupiki yiwo ngava hingira sirongo, awo ngava hafera mpora zonene.” —MAPISAROME 37:10, 11.
EYI AYI TANTA: Ruhanzo ropomazuva gaNowa kapi rwa gusire po maudona nagenye. Konyima zoRuhanzo, vantu vamwe va ya tamekere kurugana hena udona. Nye ntaantani Karunga nga ka guse po maudona nagenye. Muepisarome kwa tanta asi: “Mudinikarunga ta dongonoka po.” Karunga nga hagekesa po maudona kupitira moUhompa wendi, alyo epangero lyemeguru eli ngali pangera vantu wovahungami apa pevhu.
KONEKA: Vapangeli ava vana kupangera ngesi, ngava tambura epangero lyoUhompa waKarunga ndi? Bibeli kulikida asi kapi ngava li tambura. Awo ngava rwanesa Uhompa waKarunga. (Mapisarome 2:2) Ano yitundwamo? Uhompa waKarunga ngau ya gusa po mapangero nagenye, makura ngau “kara dogoro narunye.” (Ndaniyera 2:44) Nye morwasinke mapangero govantu ga hepera kuhaga po?
EYI TWA HEPA—Mapangero govantu ga hage
Eyi za uyunga ko Bibeli: “Ame na diva asi nzira zovantu kapi za kara mepangero lyamwene.”—JEREMIYA 10:23.
EYI AYI TANTA: Vantu kapi va va sita va lipangere vene. Awo kapi va diva kupangera vakwawo ntani kukohonona po maudigu gawo.
KONEKA: Buke Britannica Academic kwa tanta asi mapangero kapi ya ga tompoka “kukohonona po maudigu ngwendi ruhepo, nzara, mauvera, yimpagwa, yita ntani nyanya.” Azo kwa gweda ko hena asi: “Vamwe . . . kugazara asi epangero limwe tupu kapi tali vhuru kugusa po maudona nagenye.” Nye nampili mapangero nagenye uzuni mudima ga lipakerera mokupangera, simpe kapi ngayi va tompoka morwa ava vana kupangera kapi va sikilira mo ntani kapi va kara nononkondo dokugusa po maudigu nagenye. Uhompa waKarunga welike wa kara nononkondo dokugusa po maudigu nagenye.
Yipo nye, kuliza noBibeli, kuhaga kouzuni kuna kara siruwo apa yininke yoyidona ngava ka yi hagekesa po, ntani kapisi hepero vantu wovawa va kare noutjirwe. Azo kuna kara mbudi zongwa morwa uzuni ou woudona ngau ka haga po, makura u ka pinganene po uzuni waKarunga woupe!
Siruwoke ngayi horoka nayinye eyi? Sirongwa sokukwama ko tasi ka gava elimbururo lyomoBibeli.
Kuvhura o hafere hena
RUHUNGU
Yisinke ‘uhura wouzuni’?
Wa diva asi eyi azi uyunga Bibeli kuhamena ‘uhura wouzuni’ azo mbudi zongwa?
