VATU

Vyuma yahanjika Mbimbiliya: ‘Kalunga katengele mavu chawanako oloze awatengele ngwenyi hatwamenga vatu.’—ISAYA 45:18.

PULANETI YAMAVU

Vyuma yahanjika Mbimbiliya: “Chisemunwino chimwe nachihita, chisemunwino chikwavo nawa nachiza, oloze mavu nawapwangako haya myaka yosena.”—MUKA-KWAMBULULA 1:4.

OMWO VYALUMBUNUKILA: Kwesaka naMbimbiliya ano mavu kaveshi kukawanongesako, kaha nawa nahakapwanga lika vatu. Uno kukuma chakaye chalumbunukila mulihi?

ACHISHINGANYEKENU HACHUMECHI: Mbimbiliya yafwanyisa kukuma chakano kaye kuvyuma vyasolokele mumakumbi aNowa. Halwola kana ‘hamavu hosena hazalile naulyanyi lika.’ (Kuputuka 6:13) Chipwe ngocho Nowa apwile mutu wakwoloka. Ngocho Kalunga ayowele Nowa natanga yenyi oloze anongesele vatu vakuhuka nalivaji. Mbimbiliya yahanjika havyuma vyasolokele ngwayo: “Kaye kaze kapwileko hamakumbi aze vakanongesele omu kazalile nameya alivaji.” (WaPetulu 2, 3:6) Echi chikiko chapwile kukuma chakaye kana. Uno vyuma muka vanongesele? Kavanongesele mavuko oloze vanongesele vatu vakuhuka vapwile hano hamavu. Shikaho nge Mbimbiliya yili nakuhanjika vyakukuma chakano kaye, kayeshi nakutalisa kukunongesa yino pulanetiko. Oloze yili nakuhanjika hakunongesa vatu vakuhuka vali hano hamavu, hamwe kaha navyuma vyavipi vili nakusoloka.

UKALU NAVILINGA VYAVIPI

Vyuma yahanjika Mbimbiliya: “Kunasale kashimbu kakandende kaha, vaka-kuhuka kaveshi kupwako chekako. Naukatalatala kuze vapwanga, oloze kaveshi kukapwakoko. Oloze vavavwovu navakaheta mavu, kaha navakalivwisa kuwaha kuunda chamwenemwene.”—SAMU 37:10, 11.

OMWO VYALUMBUNUKILA: Vilinga vyavipi vize vafumishileko kulivaji lyamumakumbi aNowa vyaputukile cheka. Omu mwahichile lwola kufuma halivaji, vatu vakuhuka vaputukile cheka kuyanjisa vakwavo. Oloze kalinwomu Kalunga afumiseko vilinga vyakuhuka vyosena, ngana muze ambile muka-kwimba jisamu ngwenyi: “Vaka-kuhuka kaveshi kupwako chekako.” Kalunga mwakafumisako vilinga vyavipi vyosena kuzachisa Wangana wenyi, uze wapwa fulumende yamwilu yize nayikayula vaka-kumwononoka hano hamavu hosena.

ACHISHINGANYEKENU HACHUMECHI: Kutala vaka-kuyula vamuno mukaye, navaketavila kukundwiza Wangana waKalunga tahi? Mbimbiliya yasolola ngwayo kaveshi kukaukundwizako. Mukuhona chavo mangana navakemanyina Wangana waKalunga nakole. (Samu 2:2) Vyuma muka navikafumamo? Wangana waKalunga naukashisa jifulumende javatu josena “kaha ukiko naukapwangako haya myaka yosena.” (Ndanyele 2:44) Mwomwo ika viyulo vyavatu navakavifumishilako?

Vyuma yahanjika Mbimbiliya: “Mutu katwama nangolo jakulitwaminyina iveneko.”—YELEMIYA 10:23.

OMWO VYALUMBUNUKILA: Vatu kavavatengele mangana valiyulenga vaveneko. Kavahasa kuyula vakwavo nakukumisa ukalu vali nakumonako.

ACHISHINGANYEKENU HACHUMECHI: Mukanda waBritannica Academic wamba ngwawo: “Jifulumende jinahono kufumisako uhutu, nazala namisongo, naukalu wakulijila, najijita chipwe ulyanyi naukalu weka.” Wahanjika nawa ngwawo: ‘Fulumende yakaye kosena yikiko kaha yinahase kukumisa ukalu kana.’ Numba tuhu jifulumende javatu josena, najizachila hamwe oloze kajeshi kuhasa kufumisako ukalu kanako mwomwo jikwechi vaka-kuyula vaze kavakupukako. Wangana waKalunga ukiko kaha watwama nangolo jakufumisako ukalu wosena muno mukaye.

Shikaho kweseka naMbimbiliya vatu vavilinga vyamwaza kavatela kwivwa woma kukuma chakano kaye kavilinga vyavipiko. Vatela kutalilila chuma kana, mwomwo kano kaye kanalyenyeka ngana, navakakashisa kukaye kakahya kamwaza kaze mwakahakako Kalunga.

Uno vyuma kana navikasoloka mwaka uka? Chihande chinakavangizaho nachisolola omwo Mbimbiliya yakumbulula chihula kana.