DHANO

Gima Muma wacho: Nyasaye ‘ne ok ochueyo piny kayiem nono, to nochueye mondo ji odagie.’ ​—ISAYA 45:18.

PINYWA MWADAKIENI

Gima Muma wacho: “Tieng’ achiel oa kendo tieng’ machielo biro, piny to osiko nyaka chieng’.” ​—EKLESIASTES 1:4.

TIEND WACHNO: Ka luwore gi Muma, pinyni ok bi kethi. Kinde duto ji biro dakie. Kare, sama Muma wuoyo kuom giko piny, owuoyo kuom ang’o?

PAR ANE: Muma pimo giko mar pinyni gi gima notimore e ndalo Noa. E ndalo Noa, piny nopong’ gi “timbe maricho.” (Chakruok 6:13) Noa to ne en ng’at makare. Omiyo, Nyasaye noreso Noa gi joode, to notieko jomaricho duto ka nokelo Ataro. Muma wuoyo kuom ndalono kowacho kama: ‘Ne oketh piny ma ndalono, ka ne ataro mar pi opong’o piny.’ (2 Petro 3:6) Mano ne en giko piny ma ndalono. Kata kamano, ang’o ma notieki? Notiek jomaricho duto, to ok piny. Kuom mano, sama Muma wuoyo kuom giko piny, mano ok nyis ni ibiro keth piny mwadakieni. Kar mano, owuoyo kuom giko mar jomaricho duto modak e piny, kaachiel gi gik maricho duto.

CHANDRUOK KOD TIMBE MARICHO

Gima Muma wacho: “Odong’ mana kinde matin, to joricho ok nobedie; inimanygi kuonde ma ne gintie, to ok ibi yudogi. To jo mamuol nobed weg piny, kendo ginibed mamor ahinya nikech ginidag gi kuwe.”​—ZABURI 37:10, 11.

TIEND WACHNO: Kata obedo ni Ataro ma ndalo Noa notieko jomaricho, timbe maricho to ne ok orumo e piny chuth. Bang’ Atarono, joma richo nomiyo ngima ochako bedo matek kendo. Kata kamano, machiegnini Nyasaye biro tieko timbe maricho duto. Mana kaka waneno e Zaburino, “joricho ok nobedie.” Nyasaye biro tieko gik maricho duto kotiyo gi Pinyruodhe, ma en sirkand polo ma biro locho e wi dhano duto e piny ngima.

PAR ANE: Be joma locho e piny sani biro rwako loch mar Pinyruodh Nyasaye? Muma wacho ni ooyo. Gibiro kedo gi Pinyruodh Nyasaye. (Zaburi 2:2) Mano biro kelo ang’o? Pinyruodh Nyasaye biro golo sirkende duto mag dhano kae to “noloch nyaka chieng’.” (Daniel 2:44) Kata kamano, ang’o momiyo dwarore ahinya ni otiek loch dhano?

Gima Muma wacho: “Dhano onge gi teko kata mar chiko ondamone.” ​—JEREMIA 10:23.

TIEND WACHNO: Ne ok ochue dhano mondo gibed gi loch e wigi giwegi. Mano e momiyo sama gitemo timo mano, gimedo mana kelo ne jowetegi chandruok.

PAR ANE: Buk miluongo ni Britannica Academic wacho ni: “Nenore maler ni sirkande mag dhano onge gi nyalo mar tieko chandruoge mag dhano e piny ngima moriwo dhier, kech, tuoche, masiche ma ok nyal geng’, lwenje, kod timbe mamoko mag gero.” Kae to omedo wacho niya: “Jomoko neno ni ka sirkal achiel kende e ma nyalo betie e piny mangima, mano nyalo konyo e tieko chandruogego duto.” Kata kamano, kata da bed ni sirkande duto mag dhano nyalo riwore ma gibed gi paro achiel, pod joma biro locho e sirkandego gin dhano morem, ma ok nyal tieko chandruoge ma wasewuoyoego. Pinyruodh Nyasaye kende e sirkal ma nigi nyalo mar tieko chuth chandruoge duto e piny ngima.

Omiyo, ka luwore gi Muma, giko mar piny marachni en gima jo makare ok onego oluor kata matin! En wach maber ma warito gi siso, nikech piny marachni ibiro wil gi piny manyien ma Nyasaye osingo.

Magi duto biro timore karang’o? Sula ma luwo biro miyowa dwoko ma Muma chiwo.