QE XJAL

¿Tiʼ in tzaj tqʼamaʼn Tyol Dios?: Mintiʼ kubʼ tbʼinchaʼn Dios Txʼotxʼ «tuʼn tten noq kukx, noq oʼkx o tbʼincha tuʼn kyten xjal twitz» (ISAÍAS 45:18).

AJU TXʼOTXʼ

¿Tiʼ in tzaj tqʼamaʼn Tyol Dios?: «Kykyaqil xjal in che kyim, ex in che ul itzʼj txqantl te kyxel, atzunte txʼotxʼ mintiʼ in chʼexpaj» (ECLESIASTÉS 1:4).

¿TIʼ T-XILEN JLU?: In tzaj tqʼamaʼn Tyol Dios qa mlayx kubʼ najsaʼn Txʼotxʼ ex qa kukx che anqʼil xjal twitz. Qa ikju, ¿alqiʼjtzun in yolin aj ttzaj tqʼamaʼn qa tzul xitbʼil?

XIMANA TIʼJ JLU: In tzaj tqʼamaʼn Tyol Dios qa chʼixme axju xitbʼil tzul ik tzeʼn bʼaj toj tqʼijlalil Noé. Toj ambʼil aju, otoq noj twitz Txʼotxʼ tuʼn nim nya bʼaʼn (Génesis 6:13). Atzunte Noé bʼin te Dios ex tuʼntzunju klet tuʼn junx kyukʼil toj tja. Oʼkx qe xjal nya bʼaʼn kymod kubʼ t-xiten Dios. In tzaj tqʼamaʼn Tyol Dios tiʼ bʼaj: «Kykyaqil qeju ateʼ twitz txʼotxʼ ojtxi e kyaj mulqʼaj tjaqʼ aʼ ex e naj» (2 Pedro 3:6). Atzun xitbʼil bʼaj toj ambʼil aju. Pero ¿kubʼpe xiten Txʼotxʼ? Mintiʼ, oʼkx e kubʼ xiten qe xjal in che bʼinchan nya bʼaʼn. Tuʼntzunju, aj tyolin Tyol Dios tiʼj xitbʼil, mintiʼ in tzaj tqʼamaʼn qa kbʼel xiten Txʼotxʼ. Sino in tzaj tqʼamaʼn qa che kbʼel xiten xjal in che bʼinchan nya bʼaʼn.

TKYAQILJU NYA BʼAʼN AT TWITZ TXʼOTXʼ

¿Tiʼ in tzaj tqʼamaʼn Tyol Dios?: «Noq chʼintl taj tuʼn kykubʼ naj qeju mya bʼaʼn, maske ma tzʼok tena jyolte kye pero mlay che knet tuʼna. Atzun qe xjal mans che okel etzal teju txʼotxʼ, ex puro tuj txubʼtxaj che tel» (SALMO 37:10, 11).

¿TIʼ T-XILEN JLU?: Tej otoqxi tzikʼ Diluvio, e ok ten xjal bʼinchalte nya bʼaʼn juntl maj ex tzaj nya bʼaʼn kyiʼj kykyaqil xjal. Tuʼntzunju, mintiʼ kubʼ naj tkyaqil nya bʼaʼn tej ttzaj Diluvio toj tqʼijlalil Noé. Pero toj chʼintl ambʼil, kbʼel tnajsaʼn Dios tkyaqil nya bʼaʼn te jumajx. Ik tzeʼn tqʼama salmista, che bʼel «naj qeju mya bʼaʼn». Kʼajbʼel Tkawbʼil Dios tuʼn tuʼn tkubʼ tnajsaʼn nya bʼaʼn. Atz taʼ Tkawbʼil Dios toj kyaʼj ex kkawil kyibʼaj xjal bʼaʼn che nimen te Dios.

XIMANA TIʼJ JLU: ¿Tiʼ kbʼajel kyiʼj xjal in che kawin toj ambʼil jaʼlo? ¿Che onilpe tiʼj Tkawbʼil Dios? In tzaj tqʼamaʼn Biblia qa mlay che onin, axpe ikx, che okel te aj qʼoj tiʼj Tkawbʼil Dios (Salmo 2:2). ¿Tiʼtzun kbʼajel? Kʼokel Tkawbʼil Dios te kyxel gobierno ateʼ toj ambʼil jaʼlo ex oʼkx te «ktel te jumajx» (Daniel 2:44). ¿Tiquʼn ya mlay che kawin xjal?

¿Tiʼ in tzaj tqʼamaʼn Tyol Dios?: «Mya ax te xjal tajaw tchwinqlal, ex mlay tzʼel tnikʼ xjal tiʼj alkye bʼe bʼaʼn tuʼn tbʼet tuj» (JEREMÍAS 10:23).

¿TIʼ T-XILEN JLU?: Mintiʼ e kubʼ bʼinchaʼn xjal tuʼn kykawin kyibʼaj txqantl. Tuʼntzunju, mintiʼ in che kawin toj tumel ex mintiʼ in kanet tumel kyuʼn tuʼn tel kyiʼn nya bʼaʼn.

XIMANA TIʼJ JLU: In tzaj tqʼamaʼn enciclopedia Britannica Academic qa «mlay kubʼ kyiʼj aj qʼoj ateʼ twitz tkyaqil Txʼotxʼ [kyuʼn aj kawil] ik tzeʼn mebʼayil, weʼyaj, yabʼil, qe xitbʼil in che tzaj tuʼnx twitz txʼotxʼ, nimaq qʼoj, ex junjuntl bʼiybʼil». Ax ikx in tzaj tqʼamaʼntl jlu: «Ateʼ junjun xjal in kubʼ kyximen qa oʼkx jun aj kawil twitz tkyaqil Txʼotxʼ jaku kubʼ kyiʼj aj qʼoj lu tuʼn». Noqtzun tuʼnj, maske ma tzʼok kymojbʼan kyibʼ kykyaqil aj kawil, mlayx kanet tumel kyuʼn tuʼn t-xi kybʼinchaʼn tiʼj tkyaqil nya bʼaʼn tuʼnju aj il qe. Oʼkx Tkawbʼil Dios at tipumal tuʼn tel tiʼn tkyaqil nya bʼaʼn at twitz tkyaqil Txʼotxʼ ex jaku kubʼ tnajsaʼn te jumajx.

Ik tzeʼn in tzaj tqʼamaʼn Tyol Dios, mintiʼ tuʼn kytzaj xobʼ tbʼanel xjal aj tul xitbʼil tiʼj tkyaqil nya bʼaʼn. Sino in che tzalaj aj tok kybʼiʼn tbʼanel tqanil qa kbʼel xiten tkyaqil nya bʼaʼn ex qa kʼokel Txʼotxʼ te jun tbʼanel najbʼil tuʼn Dios.

¿Toj alkye ambʼil kbʼajel jlu? Toj juntl xnaqʼtzbʼil tzul chikʼbʼaʼn tiʼ in tzaj tqʼamaʼn Tyol Dios.