A kjoe sonʼnde
Tsakui nichxin tjínjinli nga kʼoatso je Biblia nga kjoe sonʼnde (1 Juan 2:17). A kui xi tsonile nga tsín tisʼe̱ni chjota. A to sʼe̱jnakjitia je Sonʼnde axo kuixo̱ya.
JE BIBLIA KʼOATSO NGA TSÍN KʼOAKOA̱N
Xi tsín kjoeson
JE CHJOTA
Jotso Biblia. Je Niná “tsín tsa tokjoatjao kisinda [Sonʼnde], nga kui xá kisindani nga chjota koatioson” (ISAÍAS 45:18).
JE SONʼNDE
Jotso Biblia. “Kʼoakji tsin kʼoa kʼoakji biya je chjota; tonga je sonʼnde tíjna ngantsjai nichxin” (ECLESIASTÉS 1:4).
JMÉ XI TSOYANILE. Je Biblia kʼoatso nga tsínkʼia kuixo̱ya je Sonʼnde kʼoa nga chjota koatioson ngantsjai nichxin. Tonga jmé xi nchja̱ni nga kui síkʼaxki̱ nga kjoetʼa jmeni xi chon sonʼnde.
TIKJAʼAITSJENLAI JEBI. Nga kui nchja̱ni je Biblia nga kjoe sonʼnde kui síngósonkao jokoan nga nichxinle Noé. Nga kui nichxin, “ñaki to kjoatsʼen kijnakitse je sonʼnde” (Génesis 6:13). Nga kisitjosonle Niná je Noé, je Niná tsakʼasjentjai je kʼoa kao familiale, tonga kisikjeson je chjotatsʼen kʼianga jaʼai Jtsínʼio. Je Biblia kʼoatso jokoan, itso: “Kao nandábe kicha je sonʼnde xi kisʼe kʼia nichxinbe nga tsangason nandá” (2 Pedro 3:6). Nga kʼoatso je Biblia nga kicha je sonʼnde, jé chjotatsʼen xi jeson, ali tsakuijin je Sonʼnde xi kicha. Kʼoa kʼianga kʼoatso je Biblia nga kjoetʼa jmeni xi chon sonʼnde, kui nchja̱ni nga kjoeson je chjotatsʼen kʼoa tjóxin ngayeje jmeni xi tjíosʼín.
Xi tjóxin
KJOA XI TJÍN KAO KJOATSʼEN
Jotso Biblia. “Tongi choasa nichxin cha kʼoa je xi tsʼen alikui tikoationi; chótsenní ya jña tsakatio kʼoa likui tijchani. Tonga je xi ndʼé tsʼee koa̱n je sonʼnde, kʼoa ñaki nyʼán sʼin koatio” (SALMO 37:10, 11).
JMÉ XI TSOYANILE. Kʼianga jaʼai Jtsínʼio nga nichxinle Noé, alikui tondiaa kitjoxin je kjoatsʼen. Kʼianga jeki nichxin, ijngokʼá kisʼe chjotatsʼen, xi totaon tsabe xi kjaʼaí. Tonga je Niná jeme tondiaa kjoaʼaxin je kjoatsʼen xi tjín. Tojo kitso je xi kiski salmo, “je xi tsʼen alikui tikoationi”. Je Niná, jé Chjotaxále sichjén nga kjoaʼaxin je kjoatsʼen xi tjín. Chjotaxá jebi yaa ngʼajmi tíjna kʼoa jé koatexomasonle chjota xi sítjosonle Niná.
TIKJAʼAITSJENLAI JEBI. Jmé xi koa̱nle je chjotaxá sonʼnde. A tsjoánganʼiole je Chjotaxále Niná. Mai. Je Biblia kʼoatso nga tosa kontra koatiole je Chjotaxále Niná (Salmo 2:2). Jósʼin kuichomani nga kʼoasʼin. Jé Chjotaxále Niná koatexomangajaole je chjotaxá sonʼnde kʼoa “tojé kʼoéjna ngantsjai nichxin” (Daniel 2:44). Tonga ánni nga tsín tije chjotaxá sonʼnde koatexomasíni.
XI MENÁ kuinga tsín tichjota katabatéxomani
Jotso Biblia. “Likui bakinle je chjota xi tsoʼba nga je koandiaale yaole” (JEREMÍAS 10:23).
JMÉ XI TSOYANILE. Likui kui xá koanndani je chjota nga je koatexomale xínkjín. Kuinga tsín manile nda batéxoma kʼoa tsín male bʼéndajin je kjoa xi tjín.
TIKJAʼAITSJENLAI JEBI. Je enciclopedia Britannica Academic kʼoatso nga je chjotaxá xi tjío jñani kjaʼaí kjaʼaí naxinandá “tsín kjimale tjíobʼéndajin je kjoa xi tjín, jolani, nga ma̱ tinijchá yaoná, nga kjinrá tjín, chʼin, nga kjoaxkón sʼe, kjoajchán kʼoa jmesa kjoatsʼen xi tjín”. Itsosa: “Tjínkʼa [...] xi kʼoasʼin síkjaʼaitsjen nga tokʼia sʼe̱ndajin kjoa jebi kʼiatsa tojngo chjotaxá koatexoma jngo tjíjtsa Sonʼnde”. Ningalani tojngo sʼin yaole chjotaxá, tonga tojo chjotajinni xi koatexoma kʼoa tsínjin koa̱nle kjoaʼaxin ngayeje kjoa xi jekanikʼaxkiaa. Tojé Chjotaxále Niná xi tjínle nganʼio kʼoa xi koa̱nle kʼoendajin kjoa xi tjín jngo tjíjtsa Sonʼnde kʼoa tondiaa kjoaʼaxin.
Tojo tso je Biblia, je chjota xi nda sʼín alikui tso̱kjon nga kjoetʼa jme xi chon sonʼnde. Tosaa koayatsjoa kon nga̱ tjóxin jmeni xi chon sonʼnde ndʼaibi kʼoa ʼndenaxó sikao Niná.
Kʼiáni kʼoakoa̱n jebi. Yaa kjoaʼmiya xi ijngo jchaa jmeni xi tso je Biblia xi tʼatsʼe jebi.
