TAUNIMANIMA

Baibul eto: Dirava ese “tanobada na . . . se karaia kava, to taunimanima ese bae noholaia totona e karaia.”​—ISAIA 45:18, NWT.

TANOBADA (PLANET)

Baibul eto: “Uru ta e lao bubunimu, ma uru ta e vara isimu; a tanobada na e mia hanaihanaimu.”​—KOHELETE 1:4.

UNA ANINA: Baibul ese e hadibadamu, Dirava ese tanobada na basine hadikaia, a taunimanima ese bae noholaia hanaihanai. To, “tanobada na baine lao bubuni” anina be dahaka?

MANI BA LALOA: Ina “tanobada na baine lao bubuni” karana na Baibul ese Noa ena nega ai e vara ḡauna ida e haheḡereḡerea. Una nega ai, ‘tanobada na daḡedaḡe ai vada e honu honu dae.’ (Genese 6:13) To, Noa na kara maoromaoro tauna. Una dainai, Dirava ese Noa bona ena bese na e hamauridia to kara dika taudia be utu-utu badana amo e hamasedia. Baibul ese una nega ai e vara ḡauna na ini e herevalaia toma, eto: “Una tanobada na gadobada ese e habubunia, bena vada e ore.” (2 Petro 3:6) Noa ena nega ai tanobada na unu e lao bubuni toma. Una anina be dahaka? Dirava na tanobada korikorina se haorea, to tanobada ai e nohova kara dika taudia iboudiai e hamasedia ore. Una dainai, 1 Ioane 2:17 ena hereva, “tanobada na baine lao bubuni,” na Dirava ese ina tano korikorina baine hadikaia karana se herevalaia. Lasi, to “tanobada na baine lao bubuni” anina binai: Dirava ese ina tano latana ai e nohomu kara dika taudia iboudiai bona edia system dikadia na baine haoredia vaitani.

KARA DIKA TAUDIA BONA EDIA PROBLEM IBOUDIAI

Baibul eto: “Asi vanahana kara dika tauna baine puki; ena gabu ba tahua, to basio davaria; A manau taudia ese tano bae abia; maino ena harihari-bada idia ese bae moalelaia.”​—SALAMO 37:10, 11.

UNA ANINA: Noa ena nega ai, Dirava ese kara dika taudia iboudiai na utu-utu badana amo e hamasedia. To una murinai, kara dika taudia ese taunimanima na ma e hahisidia loumu. Bona Dirava ese idia iboudiai na kahirakahira be hamasediamu. Salamo 37:10 eto: “Kara dika tauna baine puki.” Dirava na ena Gavamani amo kara dika taudia baine hamasedia​—una Gavamani na guba amo tano bae noholaia kara maoromaoro taudia baine lohiadia.

MANI BA LALOA: Hari ina nega ai tanobada e biaguamu taudia ese Dirava ena Gavamani e matauraiamu, a? Lasi. Badina Baibul na eto, idia ese Dirava ena Gavamani e inai heniamu. (Salamo 2:2) Una dainai, dahaka be varamu? “[Dirava ena Gavamani] ese [taunimanima edia gavamani] iboudiai na baine hamakohidia sisisisi bona baine hadokodia, bena [Dirava ena Gavamani sibona] baine gini hanaihanai.” (Daniel 2:44; NWT) To dahaka dainai Dirava ese taunimanima edia gavamani iboudiai na be haoredia vaitanimu?

Baibul eto: “Taunimanima ena raka na ia sibona ese basine gwauraia hidi.”​—IEREMIA 10:23.

UNA ANINA: Taunimanima ese bamodia na basie lohiadia dibamu. Badina be idia ese e biagudiamu taudia na e hahisidiamu bona edia problem ihanamodia daladia danu na asi dibadia.

MANI BA LALOA: Buka ta (Britannica Academic) eto, taunimanima edia gavamani na problem ihanamodia daladia asi dibadia, problem haida bini, “ogoḡami, hitolo, gorere, tano laga, bona tuari o daḡedaḡe karadia idauidau.” Una buka ma eto: “Haida . . . na e laloamu, bema taunimanima edia gavamani iboudiai na bae lalo tamona, unu problem iboudiai na bae haore diba.” To dounu, unu gavamani ai e lohiamu taudia iboudiai na dia ḡoḡoevadadae dainai, atai ai ta gwauraimu problem iboudiai na basie hanamo diba. Dirava ena guba Gavamanina sibona ena siahu na heḡereḡere, tanobada idoinai e varamu problem iboudiai baine haoredia vaitani.

Taunabunai, Baibul ese e hahedinaraiamu, ina tanobada (Satana ena system dikana) baine ore herevana dainai, taunimanima namodia bae gari na asi anina. To, idia na bae moale badina be taunimanima ese e hadikaia tanobada gunana na Dirava ena tanobada matamatana ese gabuna be abiamu!

Unu iboudiai be edena nega ai be varamu? Rau 7-9 sivaraina ese Baibul ena haere be herevalaiamu.