VANTU

Mbimbiliya nguayo: Njambi ka “tangele [mavu ku pua] cihuolohuohuo.” Vunoni “ua a vumbile linga [vantu] va kaleho.”—ISAYA 45:18.

MAVU

Mbimbiliya nguayo: “Visemua viija, co visemua viya, oloni kaye anga vene ka kakala myaka yoshe.”—EKELESIASTE 1:4. (Livulu lya Shukulu Kalunga)

ECI CA LOMBOLOKA NGECIZE: Kuliya na Mbimbiliya mavu ka a ka nongo, vunoni a ka tualelelaho ku pua limbo lia vantu. Amba honi mavu a ka kotoka mu njili ika?

HILULENU HALI EVI: Mbimbiliya ya setekesa ku kotoka ca mavu na viuma via solokele ku matangua a Noa. Ku ntsimbu ize mavu a ‘sulile na luozi’ ni nguetu vukenia. (Njenisisi 6:13) Vunoni, Noa ua puile mukua vuoloke. Ngeci Njambi uohielele Noa na vusoko vueni na ku nongesa vakua vupi na livazi. Mu ku handeka via solokele ku ntsimbu ize, Mbimbiliya nguayo: “Mavu aze a kele haze a nongele na akeo vene, omo mema a a sulisile.” (2 Petulu 3:6) Mavu a ku ntsimbu ize a kotokele. Vunoni vika mpundu via nongele? Kati mavu mpundu, vunoni vantu vakua vupi va kele ha mavu. Ngeci mukemuo, ku kotoka ca mavu ci ya tumbula Mbimbiliya ka ca puile ku nonga ca mavu mpundu. Vunoni ca pua ku nonga ca vantu vakua vupi va kala ha mavu na cifua ci va tumbikilamo viuma.

VISOTI NA VUPI

Mbimbiliya nguayo: “Muomu kantsimbu lika, kaha mukua vupi ka li ka kalako: Cili, u ka yongola vukalo vueni cikuma, kaha ka li ka kalako. Vunoni vakua ku konkama va ka suana cifuti, Kaha va ka viukilila mu ku-lana ca ciyulo.”—VISAMO 37:10, 11.

ECI CA LOMBOLOKA NGECIZE: Livazi lia ku matangua a Noa ka lia manusuile vupi vuose mu vutuntu. Ngeci mukemuo, mu nima ya livazi vakua vupi va kaluuisile naua miono ya vantu. Vunoni vuovuno Njambi a nongesa vupi vuose, ngue mua handekele mukua visamo, ngueni: “Mukua vupi ka li ka kalako.” Njambi tangua a ka nongesa vupi vuose ku hitila mu Vuangana vueni. Vuangana vuaco vua pua nguvulu ya muilu ize i ka sika mavu a vakua vuviuke.

HILULENU HALI EVI: Vuno vantuamena va mavu va ka kalako ku ntsimbu oyo, va ka tava Vuangana vua Njambi linga vu ka sike vukevuo ni? Mbimbiliya ya muesa ngecize ka va ka tava, vunoni va ka linga vuheve vua ku luisa Vuangana vua Njambi. (Visamo 2:2) Vika vi kezamo? Vuangana vua Njambi vu ka hinga mu cihela ca vinguvulu viose via hano ha mavu kaha vukevuo lika “vu ka mana ku miaka yose ya ya-ye.” (Ndaniele 2:44) Omo lia vika honi vinguvulu via mavu via pande ku vi tundisako?

Mbimbiliya nguayo: “Ka muesi muli muntu mukua ku enda ku liinikila vinanga vieni.”—YELEMIYA 10:23.

ECI CA LOMBOLOKA NGECIZE: Vantu ka va va tangele na vuhasi vua ku lisika vakevo vavene. Vakua ku sika ve ku lisina ngoco, ka ve ku hasa ku sika vuino vantu ni ku manusula mpundu visoti viavo.

HILULENU HALI EVI: Limo livulu ngualio cifua ci ali tepelamo mavuangana a vantu ka a hasa ku “manusula visoti vie ku tu pindisa ntsimbu yose, ngeci mua vuhutu, ndzala, mavezi, viyovo via mavu, vindzita na vukenia vukuavo.” (Britannica Academic) Livulu liaco lia vuezako naua ngualio: “Vamo va tsiliela nguavo ku manusula evi visoti vi tua tandanga ku vanga noho ku panga nguvulu imo lika mu mavu ose.” Vunoni ambe nga mavuangana ose a ha mavu a lipandakana, kasi vene vantuamena vaco ka va tantulukile, kaha ka va hasa ku manesa visoti vi tua tandanga helu. Vuangana vua Njambi, vukevuo lika vuli na ngolo ya ku manusula mu vutuntu visoti vi ve ku pinda navio vantu.

Ngeci mukemuo, kuliya na Mbimbiliya ku kotoka ca mavu, ni nguetu, ca viuma viose via ku vihia, ka ca pandele ku vuisa liova vantu vakua ku linga via cili. Vunoni, ca pande ku pua viuma vi va na pande ku lavelela. Muomu ano mavu a api, tangua Njambi a ka a nongesa na ku hingisamo mavu a aha a cili.

Tangua lika honi vi ka lipuisamo viose evi? Cimpande ci na hatako ci muesa cikumbululo ca Mbimbiliya ku cihula eci.