TLALTIKPAKCHANEJKEJ

¿Tlenon kijtoua Biblia? ToTajtsin “okichijchiu in tlaltikpaktli niman kuajli okitlalij xpara san ijki onyas, yej para ipan ma chantikan on ­tlaltikpaktlakamej” (ISAÍAS 45:18).

TLALTIKPAKTLI

¿Tlenon kijtoua Biblia? “Chika sekimej tlakamej tlakatij, oksekimej mikij, pero in tlaltikpaktli xkaman nopatla” (ECLESIASTÉS 1:4).

¿TLENON KIJTOSNEKI? Biblia kijtoua ika yejuin tlaltikpaktli xkeman popoliuis niman nochipa ompa chantilos. Kuakon, ¿tlenon kijtosneki ijkuak Biblia kijtoua ika popoliuis tlaltikpaktli?

XNEMILI YEJUIN. Biblia kijtoua ika tlaltikpaktli popoliuis ijkon ken opanok ijkuak nemiya Noé. Ijkuakon melak xkuajli tlen nochiuaya (Génesis 6:​13). Maski ijkon, Noé kitlakamatiya toTajtsin, ika yejon toTajtsin okimakixti Noé niman ichanejkauan, san ika, okinpopolo akin xkuajkualtin. Biblia techijlia tlen opanok: “Itechkopa on atl ye uejkaui Dios no okapachoj in tlaltikpaktli niman okixoxotonij” (2 Pedro 3:6). Yejon tlen inpan onochiuj akin ijkuakon nemiyaj. San ika, ¿tlenon opopoliuj? Opopoliujkej tlaltikpakchanejkej, xyejuin tlaltikpaktli. Kuakon, ijkuak Biblia kijtoua ika popoliuis yejuin tlaltikpaktli, xkijtosneki ika popoliuis yejuin tlaltikpaktli kampa tichantij. Kijtosneki ika san popoliuiskej tlaltikpakchanejkej akin kichiuaj tlen xkuajli.

NOCHI TLEN XKUAJLI

¿Tlenon kijtoua Biblia? “Niman sa achijtsin poliui, akin xkuajli iyojlo xok nemis; tejua tikintejtemos kanon nemij, niman yejuamej xok nemiskej ompa. San ika, akin yolyemankej ­nemiskej ipan tlaltikpaktli, niman melauak kinextiskej inyolpakilis ika ueyi yolseuilistli” (SALMO 37:​10, 11, TNM).

¿TLENON KIJTOSNEKI? Apachiuilistli tlen opanok ijkuak nemiya Noé xokipopolo nochi tlen xkuajli. Sakin, miyekej tlaltikpakchanejkej oksejpa opeuj kinchiuiliaj tlen xkuajli oksekimej. Sa achijtsin poliui niman toTajtsin kichiuas maka sa maonia tlen xkuajli. Ijkon ken okijto salmista, “akin xkuajli iyojlo xok nemis”. ITekiuajyo toTajtsin kipopolos nochi tlen xkuajli. Yejuin Tekiuajyotl onka iluikak niman kinyekanas akin kitlakamatij toTajtsin.

XNEMILI YEJUIN. ¿Tlenon inpan nochiuas gobiernos? ¿Kipaleuiskej iTekiuajyo toTajtsin? Ka. Biblia kijtoua ika yejuamej hasta kixnamikiskej iTekiuajyo toTajtsin (Salmo 2:2). Kuakon, ¿tlenon panos? ITekiuajyo toTajtsin kinpopolos nochi gobiernos “niman san yejua nochipa nemis” (Daniel 2:​44, TNM). ¿Tleka tlaltikpakchanejkej xok yejuamej tlayekanaskej?

¿Tlenon kijtoua Biblia? “Se tlaltikpakchane nion xkimati kanon cholos ijkuak nejnemi” (JEREMÍAS 10:​23, TNM).

¿TLENON KIJTOSNEKI? Tlaltikpakchanejkej xokinchijchiujkej niman ijkon sano yejuamej manoyekanakan. Ika yejon, xuelij kinyekanaj oksekimej.

XNEMILI YEJUIN. Enciclopedia Britannica Academic kijtoua ika “gobiernos xuelis kichiuaskej maka maonia apistli, kokolistin, guerras, maka yakaj makipolo tomin niman maka kanaj matlaixpoliui”. Niman noijki kijtoua: “Miyekej kinemiliaj ika tla san oniaskia se gobierno ipan nochi tlaltikpaktli ueliskia kiyektlaliskia nochi tlen xkuajli.” San ika, maski nochi gobiernos san sekan tlayekanaskiaj, xueliskiaj kipopoloskiaj tlen xkuajli pampa akin tlayekanaskiaj noijki tlajtlakolejkej. San iTekiuajyo toTajtsin uelis kipopolos nochi tlen xkuajli panotika.

Biblia kijtoua ika akin kichiuaj tlen kuajli xnoneki nomojtiskej ijkuak tlapopoliuis, noneki yolpakiskej pampa ijkuak ijkon panos toTajtsin tlayektlalis niman kipopolos nochi tlen xkuajli.

¿Kemanon nochiuas yejuin? Ipan okse tlamachtijli tikitaskej tlen Biblia kijtoua.