ABANTU

Eki Baibuli erikugamba: Ruhanga “[tarahangiire ensi busha], kureka akagihanga kutuurwamu.”​—ISAAYA 45:18.

ENSI ERIKUTUURWAMU

Eki Baibuli erikugamba: ‘Obusingye niburugaho, n’obundi nibwija, kwonka ensi yo neegumaho obutwire bwona.’​—OMUBUURIZI 1:4.

EKI KIRIKUMANYISA: Baibuli neeyoreka ngu ensi terikwija kucwekyerezibwa, kandi ngu neija kuguma neetuurwamu ebiro byona. Mbwenu emperu y’ensi niki?

YETEGYEREZE EKI: Baibuli neegyeragyeranisa emperu y’ensi egi n’ebyabaireho omu biro bya Noa. Omu bwire obwo, ensi ekaba ‘eijwire eiraro’ nari obushaarizi. (Okutandika 6:13) Kwonka, Noa akaba ahikiriire. N’ahabw’ekyo Ruhanga akamucungura n’eka ye, kwonka akoresa omwegyemure kucwekyereza ababi. Obwire obwo Baibuli neebugambaho eti: “Ensi eyaabaire eriho ekagaruka yaashwekwa amaizi g’omwegyemure, yaamirwa.” (2 Petero 3:6) Egyo ekaba eri emperu y’ensi. Kwonka shi ekyacwekyereziibwe niki? Ti nsi ei turikutuuraho, beitu n’abantu babi abaabaire bari omu nsi. N’ahabw’ekyo Baibuli ku erikugamba aha mperu y’ensi, neeba etarikugamba aha kucwekyerera kw’ensi ei turikutuuraho. Kureka, neeba neemanyisa emperu y’abantu ababi abari omu nsi, n’entebeekanisa zoona eziri omu nsi egi.

OBUREMEEZI N’EBIKORWA BIBI

Eki Baibuli erikugamba: ‘Bwanyima y’akaanya kakye omubi naija kuba atakiriho, buzima noija kumusherura aha mwanya gwe, oshangye atariho. Kwonka abacureezi nibaija kuhungura ensi, beesiime ahabw’okugira obusingye bwingi.’​—ZAABURI 37:10, 11.

EKI KIRIKUMANYISA: Omwegyemure gw’omu bwire bwa Noa tiguracwekyereize ebikorwa bibi byona kuhweraho kimwe. Bwanyima y’Omwegyemure ogwo, abantu ababi bakareetera buri omwe obusaasi bw’amaani. Kwonka juba, Ruhanga naija kuhezaho ebikorwa bibi byona. Nk’oku omuhandiiki wa zaaburi yaagizire: ‘Ababi nibaija kuba batakiriho.’ Ruhanga naija kwihaho ebikorwa bibi byona arikukoresa Obukama bwe, gavumenti eraabe eri omu iguru erikutegyeka abantu abahikiriire.

YETEGYEREZE EKI: Mbwenu shi abarikutegyeka ensi hati nibaija kushagika Obukama bwa Ruhanga? Baibuli neeyoreka ngu tibarikwija kubushagika. Omu bushema bwabo, nibaija kubuhakanisa. (Zaaburi 2:2) Nihaija kurugamu ki? Obukama bwa Ruhanga nibwija kuza omu mwanya gwa gavumenti zoona ez’abantu, kandi ‘bwo bwonka nibwija kugumaho’ ebiro byona. (Danieli 2:44) Kwonka shi ahabw’enki obutegyeki bw’abantu bwine kuhendera?

Eki Baibuli erikugamba: ‘Tikiri mu bushoboorozi bw’omuntu kwehabura mu rugyendo rwe.’​—YEREMIA 10:23.

EKI KIRIKUMANYISA: Abantu tibarahangirwe kwetegyeka. Baremirwe kutegyeka gye n’okwihaho oburemeezi oburi omu nsi.

YETEGYEREZE EKI: Ekitabo Britannica Academic nikigira ngu tihariho gavumenti “erikubaasa kwihaho obworo, enjara, endwara, ebihikiirizi, n’entaro nari obushaarizi.” Kandi nikigumizamu kiti: “Abandi nibaikiriza ngu gavumenti erikutegyeka ensi yoona niyo erikubaasa kucwamu omuringo murungi gw’okwihaho ebintu bibi ebyo.” Kwonka, n’obu gavumenti zoona zaakwegaita hamwe, nabwo ensi neeba neekitegyekwa abantu abatahikiriire abatarikubaasa kwihaho oburemeezi obwagambwaho aha ruguru. Obukama bwa Ruhanga bwonka nibwo bwine amaani g’okwihaho oburemeezi bwona obutwire.

N’ahabw’ekyo, kurugiirira ahari Baibuli, emperu y’ensi egi, nari entebeekanisa z’ensi egi ti kintu eki abantu abarungi baine kutiina. Kureka, n’ekintu eki twine kugirira ekihika ahakuba ensi ya Ruhanga ensya eboneire munonga neija kuza omu mwanya gw’egi esiisikaire!

Ebi byona nibiija kubaho ryari? Ekicweka ekirikukurataho nikiija kugarukamu ekibuuzo eki.