IUMI OLKETA MAN

Samting Bible talem: God “no mekem disfala wol fo stap nating, hemi mekem fo pipol i stap long hem.”​—AESAEA 45:18.

PLANET EARTH

Samting Bible talem: “Evriwan i bon kam long disfala wol, an bihaen olketa dae nomoa. Bat oltaem, disfala wol hemi stap semsem nomoa.”​—EKLESIASTES 1:4.

DISWAN MINIM: Olsem Bible storyim, no enitaem earth bae distroe and pipol bae stap olowe lo hem. So taem Bible sei world bae finis, wat nao datwan minim?

TINGIM DISWAN: Bible comparem end blo world witim samting wea happen lo taem blo Noah. Lo datfala taem, earth “ful nao long evri ravis samting wea olketa pipol ya i mekem.” (Jenesis 6:13) Bat, Noah hem raeteous man. So God sevem Noah and famili blo hem, bat Hem iusim flood for distroem nogud pipol. Bible storyim samting wea happen lo datfala taem. Hem sei, “taem wata hem kavarem full earth” hem “finisim pipol wea stap long datfala taem.” (2 Peter 3:6) Datwan hem end blo world lo datfala taem. Bat wat nao distroe? Earth no distroe, nogud pipol wea stap lo earth nao distroe. So taem Bible storyim end blo world, datwan no minim end blo planet earth. Bat hem minim end blo nogud pipol wea stap lo earth and olketa organization blo olketa.

OLKETA PROBLEM AND NOGUD PIPOL

Samting Bible talem: “No longtaem, bae olketa nogud pipol i lus. Nomata yu lukaotem olketa, bae yu no save faendem olketa. Olketa pipol wea i hambol, bae olketa onam lan wea [Jehovah] hemi bin promisim fo olketa. Nao bae olketa ya i hapi, bikos olketa stap gudfala, an olketa garem plande samting.”​—SAMS 37:10, 11.

DISWAN MINIM: Flood lo taem blo Noah hem distroem nogud pipol, bat bihaen lo flood nogud pipol staka moa. Olketa mekem laef blo evriwan hard moa. Klosap nao God bae distroem nogud pipol. Man wea raetem psalm hem sei: “Bae olketa nogud pipol i lus.” God bae iusim Kingdom blo hem for distroem nogud pipol. Datfala Kingdom hem wanfala gavman wea stap lo heven and rulim full earth ovarem pipol wea obeyim God.

TINGIM DISWAN: Hao, olketa world leader bae willing for sapotim Kingdom blo God? Bible sei olketa bae no duim datwan. Olketa bae againstim Kingdom blo God, wea datwan hem karangge samting for duim. (Sams 2:2) Wat nao bae happen? Kingdom blo God bae changem evri gavman blo man, and “rul blong hem bae hemi stap . . . olowe.” (Daniel 2:44) Bat why nao olketa gavman blo man mas finis?

Samting Bible talem: “Man no fit for lead bat hem needim [God] nao for leadim hem.”​—JEREMIAH 10:23, NW.

DISWAN MINIM: God no wakem iumi olketa man for rulim iumiseleva. Taem man rul hem no savve kontrolem nara pipol and hem no savve stretem olketa problem blo olketa.

TINGIM DISWAN: Datfala buk Britannica Academic sei luk olsem olketa gavman blo man no fit for “stretem olketa problem olsem wei for poor, hangre, sik, natural disaster, and war or olketa nara criminal samting.” Datfala buk sei moa: “Samfala pipol. . . tingse sapos wanfala gavman nomoa rulim full world then bae hem fit for stretem olketa nogud samting hia.” Bat nomata sapos evri gavman lo world waka tugeta, olketa man wea rulim world no perfect and olketa no fit for stretem olketa problem wea buk hia storyim. Kingdom blo God nomoa hem only gavman wea garem paoa for stretem evri problem lo world for olowe.

Dastawe, taem Bible storyim end blo disfala nogud world, olketa gud pipol shud no fraetem datwan. Bat hem samting for luk forward for hem, bikos niu world blo God nao bae changem disfala nogud world!

Wat taem nao evri samting hia bae happen? Next article bae storyim ansa from Bible for datfala kwestin.