Ka Takoreia Ainei Teia Ao?
Penei kua rongo ana koe i ta te Pipiria akakiteanga e ka takoreia teianei ao. (1 Ioane 2:17) Te akakite ra ainei te reira e ka takoreia te tangata katoatoa? Ka riro ainei te enua ei ngai tanea e kare e mea ora i reira?
TE PAU ANGA A TE PIPIRIA KI TEIA NGA UIANGA, KARE!
Eaa te Mea Kare e Takoreia?
TE TANGATA
Akakite te Pipiria: “Kare [te Atua] i anga [i te enua] ei mea puapinga kore ua; kua anga ra aia kia tangataia.”—ISAIA 45:18.
TE ENUA
Akakite te Pipiria: “Te kore nei tetai uki, e te kitea maira tetai uki: kareka te enua nei, te vai ua nei rai ïa.”—KOHELETA 1:4.
EAA TE AITEANGA: Akakite te Pipiria e kare rava te enua e takoreia, e ka noo ua rai te tangata i reira. Eaa i reira te aiteanga e ka takoreia teia ao?
AKAMANAKO: Kua akaaite te Pipiria i te openga o teia ao ki tei tupu i to Noa tuatau. I tera tuatau, “kua ki oki te enua i te takinga-kino.” (Genese 6:13) Inara, e tangata tuatua tika a Noa. No reira kua akaora te Atua ia Noa e tona ngutuare tangata, e kua takore Aia i te tangata rave kino na roto i te Vai Diluvi. Tei tupu, akakite te Pipiria: “I mate ei te reira enua i te tapoki angaia e te tai.” (2 Petero 3:6) Kua takoreia te ao o tera tuatau. Inara, eaa tikai tei takoreia? Kare ko te enua, mari ra ko te aronga rave kino i runga i te enua. No reira, me taiku te Pipiria no runga i te openga o teia ao, kare te reira e ko te takore anga i te enua. Mari ra, ko te openga o te au tangata rave kino i runga i te enua, e ta ratou akatereanga.
Eaa te ka Takoreia?
AU KINO E TE MANAMANATA
Akakite te Pipiria: “E roa poto ake, e kare ua te tangata kino ra, koia tika rai, ka akara koe i tona ngai, e kare ua! Kareka te aronga maru ra, ka noo ïa i te enua, e ka rekareka ratou i te maata o te au ra.”—SALAMO 37:10, 11.
EAA TE AITEANGA: Kare te Vai Diluvi i to Noa tuatau i takore takiri ana i te kino. Muri ake i te Vai Diluvi, kua akatupu akaou te tangata i te kino ki te katoatoa. Inara, kare e roa atu, ka takore te Atua i te au tangata rave kino. Akakite te tata salamo: “Kare ua te tangata kino ra.” Ka takore te Atua i te au tangata rave kino na roto i tona Patireia—e kavamani i te rangi te ka tutara ki rungao i te au tangata tei akarongo ki te Atua.
AKAMANAKO: Ka āriki ainei te au arataki o te enua o teia tuatau i te tutara a te Patireia o te Atua? Akakite te Pipiria e kare. Ma te tu neneva, ka patoi ratou i te Patireia o te Atua. (Salamo 2:2) Eaa te ka tupu? Ka mono te Patireia o te Atua i te au kavamani pouroa a te tangata, e “ka vai rai te reira e tuatau ua atu.” (Daniela 2:44) Inara, eaa ka anoanoia ai kia ope te tutara a te tangata?
KA ANOANOIA—Kia Ope te Tutara a te Tangata
Akakite te Pipiria: “Kare tei te tangata e aere nei, i te akono i tona uaorai takainga tapuae.”—IEREMIA 10:23.
EAA TE AITEANGA: Kare te tangata i angaia kia tutara ia ratou uaorai. Kare e rauka ia ratou i te akatere i tetai ke e te akatano i to ratou au manamanata.
AKAMANAKO: Akakite te Britannica Academic e kare i rauka ake i te au kavamani tatakitai i te “akameitaki mai i te kino o te putaua, te onge, te maki, te tumatetenga natura, te tamaki e te takinokino. Tetai pae, . . . irinaki ratou e ka anoanoia e tai kavamani no teianei ao no te akatikatika i teia au manamanata.” Inara, noatu me ka taokotai te au kavamani katoatoa a te tangata, kare rai e rauka ia ratou i te akameitaki i te au kino tei taikuia, no te mea e au tangata apa ua ratou. Ko te Patireia o te Atua anake te kavamani te ka rauka i te akatikatika i te au manamanata pouroa o te ao nei.
No reira, kia tau ki te Pipiria, ko te openga o teia ao—teia akatereanga kino—kare teia i tetai mea kia mataku te au tangata tei rave i te meitaki. Mari ra, ka tapapa ratou i te reira no te mea ka monoia teia ao taito ki te ao ou e te manea tikai a te Atua!
Aea teia e tupu ei? Ka akamārama te atikara ka aru mai i te pauanga a te Pipiria.