LIBISËMBË

Di soni di di Bëibel ta taki: Gadu „an mbei di goonliba u sösö, ma a seti ën u libisëmbë sa libi nëën”.​—JESAAJA 45:18.

DI GOONLIBA

Di soni di di Bëibel ta taki: „Libisëmbë ta dëdë, nöö woto libisëmbë ta ko, ma di goonliba hën a o dë u nöömö.”​—PELEIKIMA 1:4.

DI SONI DI A KË TAKI: Di Bëibel ta mbei u ko fusutan taa soni an o sa booko di goonliba ka u dë aki, nöö hii juu libisëmbë o ta libi nëën. Ma nöö andi a kë taki te a ta taki taa di goonliba o kaba?

BUTA PAKISEI A DI SONI AKI: Di Bëibel ta tei di kaba u di goonliba di o ko abiti möön, maaka ku di soni di bi pasa a di ten u Noa. A di ten dë, hogidu bi hia a goonliba aki seei (Kenesesi 6:13). Ma Noa hën a bi ta libi a wan leti fasi. Fëën mbei Gadu tjubi Noa ku hën wosudendu, ma a bi kii hii dee hogihati sëmbë ku wan gaan wata di a bi mbei ko. Luku andi di Bëibel bi taki u lei unfa soni bi waka a di ten dë. A bi taki taa: „Ku dee soni dë, a poi di goonliba u di ten dë, u di a mbei wan gaan wata ko singi hii di goonliba kaba a sösö” (2 Petuisi 3:6). Di soni aki bi dë di kaba u di goonliba u di ten dë. Wë andi bi poi kaba a sösö? Na di goonliba hën bi booko kaba a sösö, ma dee hogihati sëmbë dee bi ta libi a goonliba aki de Gadu bi puu a di goonliba. Fëën mbei te di Bëibel ta taki u kaba u di goonliba, nöö an kë taki taa di goonliba seei hën o booko kaba a sösö. Ma a kë taki taa dee hogihati sëmbë dee ta libi a goonliba aki de an o dë möön, söseei dee soni di dee hogihati sëmbë aki seti buta a goonliba aki seei an o dë möön tu.

FUKA KU HOGIDU

Di soni di di Bëibel ta taki: „Wan sati pisiten nöö fika, nöö hogihati sëmbë an o dë möön. Joo luku di kamian ka de bi dë, ma de an o sai dë möön. Ma dee sakafasi sëmbë o feni di goonliba, nöö de o piizii seei biga bööböö libi o dë pasa maaka.”​—PSALÖM 37:10, 11.

DI SONI DI A KË TAKI: Wë di gaan wata di bi ko kii dee hogihati sëmbë kaba a di ten u Noa, an bi mbei taa hogihati sëmbë an ko a goonliba möön. Baka di gaan wata dë, sëmbë bi bigi ta du hogi a goonliba baka, nöö de bi toona ta mbei di libi ta taanga da wotowan. Ma abiti möön Gadu o poi dee hogihati sëmbë kaba awaa. Di psalöm sikifima bi taki taa: „Hogihati sëmbë an o dë möön.” Gadu o mbei di Könuköndë fëën puu hii hogidu a goonliba aki, nöö di Könuköndë dë o dë a liba ala ta tii dee libisëmbë a goonliba aki, di o ta saka deseei a Gadu basu.

BUTA PAKISEI A DI SONI AKI: Dee tiima u di goonliba aki o kë dë ku di Könuköndë u Gadu a wan së u? Wë di Bëibel ta lei taa de an o kë dë ku di tii u Gadu a wan së. De o hopo fia ku di Könuköndë u Gadu (Psalöm 2:2). Andi o pasa te u kaba fëën? Wë di Könuköndë u Gadu o puu hii dee tii u libisëmbë a pasi, nöö „di könuköndë seei o dë u nöömö” (Daniëli 2:44). Ma faandi mbei di fasi fa libisëmbë ta tii an musu dë möön?

Di soni di di Bëibel ta taki: „Na wan libisëmbë seei di ta waka sa taki naasë a musu tuwë futu.”​—JELEMIA 10:23.

DI SONI DI A KË TAKI: Gadu an bi mbei libisëmbë u de ta tii deseei. De an ta tii wotowan a wan bunu fasi, söseei de an ta seeka dee fuka u di goonliba aki kumafa de musu seeka.

BUTA PAKISEI A DI SONI AKI: Öndösukuma ko si taa dee tiima u di goonliba aki „an sa puu soni kuma hangi pena, siki, feti, hogidu, ku te gaan ventu nasö gaan wata ko poi kamian. So sëmbë ta biibi taa wan tii di o ta tii hii di goonliba wanwan sa seeka dee fuka aki”. Ma aluwasi ee hii dee tii u goonliba tuu ko a wan u de seeka dee fuka u di goonliba aki, tökuseei de an o sa dou di maaka dë, u di zöndu libisëmbë an sa seeka dee fuka aki. Di Könuköndë u Gadu nöö abi makiti tjika faa sa du di soni dë.

Wë te di Bëibel ta taki u kaba u di hogi goonliba aki, nöö an dë wan soni di dee bunuhati sëmbë musu ta fëëë. Di soni aki da wan bunu buka, u di Gadu o seeka di goonliba ko dë wan njunjun goonliba di o suti u libi seei!

Na un ten di soni aki o pasa? Wë a di woto di ta ko di Bëibel o piki di hakisi aki.