ANTO

Kɛnɛ kata Bible: Nzambi “kondjitonga [nkɛtɛ], otongatonga koko akayikenge dia anto mbidjasɛka lɔkɔ.”​—ISAYA 45:18.

OKAMA WA NKƐTƐ

Kɛnɛ kata Bible: “Lɔlɔnga lɔmɔtshi mbetaka ko lɔlɔnga lokina ndjaaka, koko nkɛtɛ tshikalaka pondjo.”​—ONDAKI 1:4.

KƐNƐ KALEMBETSHIYA DUI SƆ: Lo ndjela Bible, nkɛtɛ hayolanyemaki pondjo ndo anto wayodjasɛka lɔkɔ. Ko, kakɔna kalanga nembetshiya ekomelo k’andja?

TƆSƐDINGOLE DUI NƐ: Bible mbɛdikaka ekomelo k’andja ɔnɛ la kɛnɛ kakasalema lo nshi ya Nɔa. L’etena kɛsɔ, nkɛtɛ “[kakalole] la akambo wa ngala.” (Etatelo 6:13) Koko, Nɔa aki onto ɔlɔlɔ. Ɔnkɔnɛ, Nzambi akashimbɛ Nɔa nde la nkumbo kande koko Nde akalanya akanga wa kɔlɔ la Mvula k’elola. Lo ntɛkɛta dikambo dia kɛnɛ kakasalema oma laasɔ, Bible mbutaka ɔnɛ: ‘Andja wa lo nshi shɔ wakalanyema lam’akalɔ Mvula k’elola la nkɛtɛ.’ (2 Petero 3:6) Ngasɔ mbakakomɛ andja wa l’etena kɛsɔ. Ko kakɔna kakalanyema? Aha nkɛtɛ, koko akanga wa kɔlɔ wakadjasɛka la nkɛtɛ. Diakɔ diele etena katɛkɛta Bible dikambo di’ekomelo k’andja, tɔ halange mɛnya ɔnɛ okama wa nkɛtɛ ɔnɛ mbayolanyema. Lo dihole dia tɔ mɛnya dui sɔ, tɔ mɛnyaka dia akanga wa kɔlɔ wa la nkɛtɛ mbayolanyema ndo atshunda w’akonya dia vɔ monga kaamɛ.

EKAKATANU NDO AWUI WA KƆLƆ

Kɛnɛ kata Bible: “Etena ka tshitshɛ keto kambotshikala, ko kanga kɔlɔ hatonga nto; wɛ ayoshishima lo dihole diande, ko nde hatonga nto. Koko akanga wa memakana wayokita nkɛtɛ ndo vɔ wayɔngɛnangɛnaka heyama la wɔladi w’efula.”​—OSAMBO 37:10, 11.

KƐNƐ KALEMBETSHIYA DUI SƆ: Mvula k’elola ka lo nshi ya Nɔa kondanya anto wa kɔlɔ mbala kakɔ ɔtɔi lo tshɛ. L’ɔkɔngɔ wa Mvula k’elola, akanga wa kɔlɔ wakanyomoyosala dia lɔsɛnɔ monga kɔlɔ le onto tshɛ. Koko keema edja, Nzambi ayanga nkomiya awui wa kɔlɔ tshɛ. Omembi w’esambo mbutaka ɔnɛ: “Kanga kɔlɔ hatonga nto.” Nzambi ayonya awui wa kɔlɔ tshɛ lo tshimbo ya Diolelo diande, mbuta ate Diolelo diaki Nzambi diayolɛ nkɛtɛ k’otondo lo nshi yayaye etena kayonya Nzambi akanga wa kɔlɔ tshɛ oma la nkɛtɛ.

TƆSƐDINGOLE DUI NƐ: Onde wanɛ walɔmbɔla nkɛtɛ ɛlɔ kɛnɛ wayosukɛ Diolelo dia Nzambi? Bible mɛnyaka dia vɔ hawotosala dui sɔ. La enginya tshɛ, vɔ wayɔlɔsha Diolelo diaki Nzambi. (Osambo 2:2) Etombelo akɔna wayonga? Diolelo diaki Nzambi diayɔhɛna mandji y’ana w’anto tshɛ ndo “diɔamɛ diayotshikala pondjo.” (Danyɛlɛ 2:44) Ko lande na keso l’ohomba dia ɛlɔmbwɛlɔ k’ana w’anto nkomɛ?

Kɛnɛ kata Bible: “Lam’akɛndakɛnda onto, nde bu la lotshungɔ la nɔmbɔla kaanga ekolo ande.”​—JƐRƐMIYA 10:23.

KƐNƐ KALEMBETSHIYA DUI SƆ: Anto kotongama dia ndjalɔmbɔla vɔamɛ. Vɔ salaka olimu wa kɔlɔ etena kalɔmbɔlawɔ anto akina ndo lo woho wambakandolɛ ekakatanu awɔ.

TƆSƐDINGOLE DUI NƐ: Dibuku dimɔtshi (Britannica Academic) mbutaka ɔnɛ, mɛnamaka dia mandji y’anto bu l’akoka wa “nkandola awui wele oko wola, ndjala, hemɔ, mpokoso k’oma lo diangɔ diakatongama ndo ata kana awui akina wa ngala.” Dibuku diakɔ tetemalaka mɛnya ɔnɛ: “Anto amɔtshi . . . mbetawɔka dia paka tshɔi ya lowandji la l’andja w’otondo mbakoka nkandola ekakatanu ɛsɔ lo pondjo.” Koko, oyadi kaanga mandji tshɛ y’ana w’anto kosanganaka tshɛ kaamɛ, andja wayohombaka tetemalaka nɔmbɔma oma le anto wele keema kokele wele bu l’akoka wa nkandola ekakatanu wɔtɛkɛtshiso la diko. Diolelo dia Nzambi mbele tshɔi ya lowandji yele l’akoka wa nkandola ekakatanu tshɛ wa l’andja w’otondo lo pondjo.

Ɔnkɔnɛ lo ndjela Bible, ekomelo k’andja, mbuta ate dikongɛ nɛ di’akambo dia kɔlɔ, bu dui diahomba anto w’ɛlɔlɔ mboka wɔma. Lo dihole dia nsala ngasɔ, ɔsɔ ekɔ dui dia dimɛna efula dialongamɛso, nɛ dia andja w’omusu wa kɔlɔ ɔnɛ wayɔhɛnyama la andja w’oyoyo wa dimɛna efula waki Nzambi!

Etena kakɔna kayosalema awui asɔ tshɛ? Sawo diayela diayolembetshiya ekadimwelo washa Bible.