JA KRISTYANOʼIKI

¿Jas wa xyala ja Biblia? Ja Dyosi «mi lom ita skʼulan [ja Luʼumi], stojbʼes bʼa oj ajyuk swinkil» (ISAÍAS 45:18).

JA LUʼUMI

¿Jas wa xyala ja Biblia? «Jun lame ixuk winik wa xwaji, sok jun lame ixuk winik wa xjaki; pe ja luʼumi tolabida oj ajyuk» (ECLESIASTÉS 1:4).

¿JAS WA STOJOLAN? Ja Biblia wa xyala ke ja Luʼumi nunka oj chʼaysnajel sok tolabida oj ajyuk swinkil. Anto, ¿jas wa xkʼan yal yajni wa staʼa tiʼal sbʼaja xchʼakelal ja luʼumkʼinali?

PENSARAʼAN JA IT. Ja Biblia wa xya slaj ja xchʼakelal ja luʼumkʼinal it sok ja jas ekʼ ja bʼa styempo ja Noé. Ja bʼa tyempo jaw, ja Luʼumi «bʼutʼel xa spekʼjel chikʼ» (Génesis 6:13). Pe ja Noé wajni juni winik bʼa wa skʼuʼanyi ja Dyosi, ja yuj ajikan sakʼan ja yeʼn sok ja spamilya, pe xchʼaya el snajel ja matik malo ja bʼa bʼutʼ jaʼi. Ja Biblia wa xchiktes ja jas ekʼi: «Ja luʼumkʼinal ja bʼa tyempo jaw chʼayji snajel yajni bʼutʼ jaʼi» (2 Pedro 3:6). Ja yuj jachni chʼayji snajel ja luʼumkʼinal ajyi ja bʼa tyempo jaw. Pe ¿jasa chʼayji snajeli? Mini jaʼuk ja luʼumi, jani ja kristyano matik malo. Ja yuj, yajni ja Biblia wa staʼa tiʼal ja xchʼakelal ja luʼumkʼinali, mi jaʼuk wan yaljel ja xchʼakelal ja Luʼum bʼaytiki. Jani wan yaljel sbʼaja xchʼakelal ja kristyano matik malo sok ja tikʼe mandaranel yaʼuneje kujlajuki.

JA WOKOLIKI SOK JA JASTIK MALO

¿Jas wa xyala ja Biblia? «Sok tʼusanxta skʼana, sok ja matik jel malo mixa oj ajyuk; sok ama xa leʼa, mixa ayuk. Pe ja matik chʼin wa xyaʼa sbʼaji oj sbʼajuke ja luʼumi, sok jel oj yabʼye stsamalil ajyel laman» (SALMO 37:10, 11).

¿JAS WA STOJOLAN? Tsaʼan ja bʼa bʼutʼ jaʼi, cha kʼeni ajyuk kristyanoʼik bʼa malo bʼa sjomoyi ja sakʼanil ja tuk. Ja yuj ja bʼutʼ jaʼ bʼa styempo ja Noé mini xchʼaya el snajel juntiro ja bʼa malo, pe ojxtani xchʼay-el snajel bʼa juntiro ja Dyosi. Jastalni yala ja tsʼebʼanumi, «ja matik jel malo mixa oj ajyuk». Ja Dyosi oj xchʼaysnajel ja jastik malo yajel makunuk ja sGobyerno, jun Gobyerno bʼa sutanal ja Luʼumi bʼa ti wa xtax bʼa satkʼinal sok oj yayi mandar ja kristyanoʼik kʼuʼabʼal ayesoki.

PENSARAʼAN JA IT. ¿Jas oj ekʼ sbʼaje ja gobyernoʼiki? ¿Oj maʼ skoltaye ja sGobyerno ja Dyosi? Ja Biblia wa xyala ke miyuk. Jaʼuktoma, ojni och yile kontra (Salmo 2:2). ¿Jasa oj ekʼuk? Ja sGobyerno ja Dyosi ojni slokʼoluk spetsanil ja gobyernoʼiki sok «kechanta ni yeʼn oj kan kulan bʼa tolabida» (Daniel 2:44). Pe ¿jas yuj tʼilan oj yaʼekan yajel mandar ja kristyanoʼiki?

¿Jas wa xyala ja Biblia? «Sok mini ja winik wan bʼejyeli wa sbʼajin oj stoj ja sbʼeji» (JEREMÍAS 10:23).

¿JAS WA STOJOLAN? Ja kristyanoʼiki mini kʼulajiye bʼa oj ya sbʼaje mandar. Ja yuj mini xbʼobʼ yaweyi lek mandar ja tuk kristyanoʼiki sok mi xbʼobʼ stojbʼeseyi ja swokoleʼi.

PENSARAʼAN JA IT. Ja enciclopedia Britannica Academic wa xyala ke ja gobyernoʼik bʼa tuktukil paisi mini xbʼobʼ «xchʼaye ja skontraʼe ay ja bʼa sutanal ja luʼumi jastal ja pobreʼil, ja waʼin, ja chamelik, ja desgrasyaʼik sok ja guerraʼik, sok tuk tikʼe ixtalanel». Cha wa xyala: «Jujuntik [...] wa skʼuʼane ke lekbʼi kechan ay jun gobyerno bʼa sutanal ja luʼumi ojni bʼobʼ skʼul ganar ja niwak kontraʼalik it bʼa tolabida». Pe ama stsomo sbʼaje spetsanil ja gobyernoʼiki, ja luʼumkʼinal ojtoni ajuk mandar yuj winike mulanumik bʼa mini xbʼobʼ xchʼaye snajel ja wokolik jtaʼatikta tiʼali. Ja sGobyerno ja Dyos kechani yeʼn ja gobyerno ayiʼoj ja ipal bʼa oj stojbʼes bʼa tolabida ja wokolik bʼa spetsanil ja Luʼumkʼinali.

Jastalni wa xyala ja Biblia, ja kristyano bʼa leki mini ke oj xiwukyuj ja xchʼakelal ja luʼumkʼinali, wa xkʼan kaltik, ja xchʼakelal ja luʼumkʼinal it jel malo bʼaytiki. Jaʼuktoma, juni jasunuk bʼa gustoxta oj majlaytik, yujni ja luʼumkʼinal it bʼa jelxa jomeli oj slokʼoluk ja yajkʼachil sluʼumkʼinal ja Dyosi.

¿Jas ora oj ekʼuk ja it? Ja artikulo ti nochani wa xcholo ja jas wa xyala ja Biblia.