LATAMANIN

¿Tuku wan Biblia? Dios «ni tlawalh [Katiyatni] xlakata nitu nalilakan, wata tlawalh xlakata nalatamakan anta» (ISAÍAS 45:18).

KATIYATNI

¿Tuku wan Biblia? «Makgapitsi nikgo chu amakgapitsi lakachimparakgo, pero katiyatni nikxni katisputli» (ECLESIASTÉS 1:4).

¿TUKU WAMPUTUN? Biblia lichuwinan pi Katiyatni nikxni katimalakgsputuka chu ankgalhin nalatamakan. Wa xlakata, ¿tuku kilhchanima akxni lichuwinan xlisputni kakilhtamaku?

KALILAKPUWANTI UMA. Biblia tamalakxtumi xlisputni uma kakilhtamaku tuku lalh kxkakilhtamaku Noé. Amacha kilhtamaku, Katiyatni “xlitatsamanit tuku nitlan” (Génesis 6:13). Pero Noé chatum chixku tiku xkgalhakgaxmata Dios, wa xlakata Dios kalakgmaxtulh xla chu xfamilia, pero kamalakgsputulh kmunkaklat tiku lixkajnit xlikatsikgo. Biblia lichuwinan pi latamanin xala ama kilhtamaku kamalakgsputuka akxni «chuchut makgtsilh putum katiyatni» (2 Pedro 3:6). Pero ¿tuku masputuka? Ni wa Katiyatni masputuka, wata wa latamanin tiku nitlan xlikatsikgo. Wa xlakata, akxni Biblia lichuwinan xlisputni kakilhtamaku, ni kilhchanima pi namasputukan Katiyatni. Wata kilhchanima pi nakamalakgsputukan tiku lixkajnit likatsikgo chu tuku tlawakgonit.

TAʼAKGLHUWIT CHU TUKU NITLAN

¿Tuku wan Biblia? «Chu nialh lhuwa kilhtamaku, chu tiku lixkajni likatsi nialh katitawilalh; chu akxni naputsaya niku xwi, nialhtu wi nawan. Pero tiku tlan likatsikgo wa nakamaxkikan katiyatni, chu xlikana lu lipaxuw natawilakgo» (SALMO 37:10, 11).

¿TUKU WAMPUTUN? Akxni xtitaxtunita Munkaklat, latamaparakgolh tiku lixkajnit xlikatsikgo chu katlawaniparakgolh tuku nitlan putum latamanin. Wa xlakata munkaklat nema analh kxkilhtamaku Noé ni masputulh putum tuku nitlan xʼanan, pero nialh makgas Dios namasputu putum tuku nitlan. Chuna la wa salmista, «tiku lixkajni likatsi nialh katitawilalh». Dios namaklakaskin xTamapakgsin xalak akgapun xlakata namasputu putum tuku nitlan, uma Tamapakgsin namapakgsinan kxlikalanka kakilhtamaku chu nakamapakgsi tiku nakgalhakgaxmatkgo Dios.

KALILAKPUWANTI UMA. ¿Tuku nakaʼakgspula mapakgsinanin? ¿Namakgtayakgo xTamapakgsin Dios? Biblia wan pi ni. Wata natalalakatawakakgo (Salmo 2:2). ¿La nakitaxtu putum uma? Akxni xTamapakgsin Dios natawila xlakgxokgo mapakgsinanin xalak kakilhtamaku kajwatiya uma «tamapakgsin xliputum kilhtamaku natawila» (Daniel 2:44). Pero ¿tuku xlakata latamanin nialh katimapakgsinankgolh?

¿Tuku wan Biblia? «Chixku ni lakgchan xʼakstu napulalinkan» (JEREMÍAS 10:23).

¿TUKU WAMPUTUN? Latamanin ni kamalakatsukika xlakata xʼakstukan nakamapakgsikan. Wa xlakata nila kamapakgsikgo amakgapitsin chu nila kalakkaxtlawanikgo xtaʼakglhuwitkan.

KALILAKPUWANTI UMA. Enciclopedia Britannica Academic wan pi mapakgsinanin xalak tanu tanu países «nila masputukgo talimaxkgen, tatsinkstat, tajatat, tuku masputunan, guerra chu atanu tuku nitlan». Chu wampara: «Makgapitsi [...] lakpuwankgo pi tlan xmasputuka putum uma tuku nitlan komo kaj chatum mapakgsina xʼanalh kxlikalanka katiyatni». Chu maski putum mapakgsinanin makxtum xlakgolh, nila xlakkaxtlawakgolh taʼakglhuwit xlakata xlakan makglakgalhinanin litaxtukgo. Kajwatiya xTamapakgsin Dios tlan namasputu putum kilhtamaku taʼakglhuwit nema anan kxlikalanka katiyatni.

Wa xlakata, chuna la wan Biblia, latamanin tiku tlan likatsikgo ni xlipekuanitkan xlisputni kakilhtamaku, uma wamputun xalixkajnit kakilhtamaku niku lamaw. Wata xatapaxuwan nakgalhkgalhiyaw pi kachilh, xlakata uma xamakgan kakilhtamaku nalilakgpalikan xasasti xkakilhtamaku Dios.

¿Tuku kilhtamaku nakgantaxtu uma? Artículo nema stala kinkawaniyan tuku lichuwinan Biblia.