KʼUIRIPU

Ambe enga Biblia uandajka: “Tata Diosï no ísku kueraasti [Echerini], sino paraka irekanhapiringa” (ISAÍAS 45:18).

ECHERI

Ambe enga Biblia uandajka: “Máruksï andajpenusïndi ka máruksï uarhisïndi, joperu Echeri méntkisï jauati” (ECLESIASTÉS 1:4).

¿AMBE ARHIKUEKASÏNI? Biblia uandasïndi eska Echeri no méni kʼamajkunhaaka ka eska méntkisï irenhaaka. Jiájkani, ¿ambe arhikuekasïni enga uandajka eska parhakpini kʼamaraaka?

ERATSI JE INI AMBE. Biblia terukutantasïndi jiáni enga parhakpini kʼamakurhiaka imani ambe jingoni enga úkuarhipka Noéri jurhiatikuecha jimbo. Imani tiempuni, parhakpinirhu “uinintaspti atajperakua ambe” (Génesis 6:13). Joperu, Noé kurhajchasïreendi Tata Diosïni, jimbosï Tata Diosï tsípiti pakatapti imani ka imeeri familiani, joperu kʼamajkuaspti no sési úrichani kʼéri janikua ma jimbo. Biblia uandasïndi ambe enga úkuarhipka: “Ióntki anapu parhakpini kʼamarasti itsï jimbo” (2 Pedru 3:6). Ísïsï kʼamarapti parhakpini imani tiempuni. Joperu, ¿ambesï kʼamakuarhipi? No Echerispti, sino kʼuiripu no sési úricha. Ísï jimbo, enga Biblia uandajka eska parhakpini kʼamakurhiaka, no arhikuekasïndi eska Echerisï kʼamakurhiaka, sino eskaksï kʼuiripu no sési úrichasï kʼamajkunhaaka ka iámindu ima ambe engaksï újka.

UANDANHIATECHA KA NO SÉSI JÁSÏ AMBE

Ambe enga Biblia uandajka: “Nóteru ióni jimbo, no sési úrichaksï nóteru jauatia; ka exeakari nani engaksï japka ka imaksï nóteru jauatia. Peru echeri kaxumbiticheriuati, ka sésiksï pʼikuarheraati jimboka kánikua pínandikua jauaka” (SALMO 37:10, 11).

¿AMBE ARHIKUEKASÏNI? Dilubiu enga Noéri jurhiatikuecha jimbo úkuarhipka no kʼamajkuspti iámindu no sési jásï ambe. Ísï tátsekua, kʼuiripu no sési úrichaksï ménderu no sési úkuaspti máteru kʼuiripuechani. Joperu nóteru ióni jimbo, Tata Diosï kʼamajkuati para méntkisï iámindu no sési jásï ambe. Eska na uandapka ima enga salmuni karapka “no sési úrichaksï nóteru jauatia”. Tata Diosï imeeri Reinuni úraati enga auandarhu jaka para kʼamajkuni iámindu no sési jásï ambeni ka para juramukuani imeechani engaksï kurhajchajka imani.

ERATSI JE INI AMBE. ¿Ambeksï úkuarhinchaa kʼuiripuecheri juramukuecha? ¿Apoiariuaksï Tata Diosïri Reinuni? Biblia uandasïndi eska nómbe. Niáraatiksï jamberi Tata Diosïri Reinueri enemigu úkuarhini (Salmo 2:2). ¿Néna kʼamaraa iámindu i ambe? Tata Diosïri Reinu juramuati ka kénditauati kʼuiripuecheri juramukuechani “ka imajkusï jauati para méntkisï” (Daniel 2:44). Joperu, ¿andiksïsï kʼuiripuecha nóteru jatsiaia para juramuni?

Ambe enga Biblia uandajka: “Kʼuiripu enga xanharani jaka ni sikiera sésikua jatsi para exeni nani enga ísï jatsika para xanharani” (JEREMÍAS 10:23).

¿AMBE ARHIKUEKASÏNI? Kʼuiripuechaksï no kueraakata jarhasti paraksï imeecha mismu juramukuarhini. Jimboksïsï no újti sési juramukuani máteruechani ka ni sési peentani kʼuiripuecheri uandanhiatechani.

ERATSI JE INI AMBE. Ensiklopedia Britannica Academic uandasïndi eskaksï parhakpini anapu juramuticha “no uaaka orhepani uérakuani kʼérati uandanhiatechani engaksï ma parhakpinirhu jaka, komu no jatsikuarhekua ambe, kʼarhingua, pʼamechakuechani, desastresi naturalichani, guerrechani ka no sési kámberakua ambeni”. Ka ístu uandasïndi: “Máruksï [...] eratsesïndi eska solu gobiernu ma enga ma parhakpinirhu juramuaka, uaaka kénditaani ini kʼérati uandanhiatechani para méntkisï”. Nájkirukaksï iámindu juramuticha májku kʼéri úkurhintapiringa, imeecha engaksï juramuni japiringa kʼuiripuechepirindiksï engaksï kʼamanharhintstika ka engaksï no jatsika uinhapikua paraksï kénditaani uandanhiatechani engachi antesi uandaakia. Tata Diosïri Reinujkusï jatsiti uinhapikua para sési peuantani iámu parhakpinirhu anapu uandanhiatechani para méntkisï.

Seguni eska na arhijka Biblia, ambakiti kʼuiripuechaksï no jatsipirini para chéni enga parhakpini kʼamajkunhaaka, enga arhikuekajka kʼamajkukua iámindu no sési jásï ambeeri. Sánderu sési, jindeesti ambe ma engachi kánikua tsípikua jingoni erokuarhini jaka, jimboka i parhakpini enga xáni no sési jánhaskuarhika, nóteru jauakia ka Tata Diosï jimbanhi parhakpini ma úntaati enga kánikua sési jándeaka.

¿Káni úkuarhia i ambe? Máteru jorhenguarhikua jimbochi exeaka ambe enga Biblia uandajka.