TE ANTS WINIKETIK

¿Bin ya yal te Bibliae? Te Dios «ma tojoluc la spas [te Balumilal], ha la spas scuenta yuʼun ay machʼatic ya xnahinic tey a» (ISAÍAS 45:18).

TE BALUMILAL

¿Bin ya yal te Bibliae? «Jcaj tsʼumbalil ya xcʼax, jcaj tsʼumbalil ya xtal, pero stalel ya xhil te qʼuinale» (ECLESIASTÉS 1:4).

TE BIN YA SKʼAN YA YAL. Te Biblia ya yal te Balumilal maʼyuk bin-ora ya yichʼ lajinel sok te ay machʼatik ya xnainik tey-a. Jaʼ yuʼun ¿bin-nix ya skʼan ya yal-a te ya yichʼ lajinel te balumilale?

NOPA TA SWENTA INI. Te Biblia ya spajaltaybey skʼoplal te slajibal balumilal sok te bin kʼax ta skʼajkʼalel te Noé. Ta yorail-abi «nojel ta utsʼinwanej te qʼuinale» (Génesis 6:13). Manchukme jich-abi, te Noé la schʼuunbey smantal te Diose, jaʼ yuʼun kuxul jil sok te sfamilia pero lajik ta Pulemal stukelik te machʼatik ma lek stalelik. Te Biblia ya yal «te la yichʼ lajinel te balumilal te kʼalal noj ta jaʼ» (2 Pedro 3:6). Jich laj te balumilal ta yorail-abi. Pero ¿bin-a te la yichʼ lajinele? Ma jaʼuk te Balumilale, jaʼ te ants winiketik te ma lek stalelike. Jich yuʼun kʼalal te Biblia ya yal te ya yichʼ lajinel te balumilal, ma jaʼuk ya skʼan ya yal te ya yichʼ lajinel te Balumilal te banti yakotik ta kuxinel. Te bin ya skʼan ya yale jaʼ te ya yichʼ lajinel te ants winiketik te ma lek stalelike.

TE WOKOLILETIK SOK TE BIN MA LEK YA YICHʼ PASEL

¿Bin ya yal te Bibliae? «Nopol ya xchʼay bahel te machʼa chopol; yac ale, pero ma ba tey ayix a. Yan te machʼatic manso yoʼtanic ya me yichʼic hilel te qʼuinal soc ya me smulanic bayel lamal qʼuinal» (SALMO 37:10, 11).

TE BIN YA SKʼAN YA YAL. Te kʼalal kʼaxix-a te Pulemale, te chopol ants winiketik jajch yutsʼinik te yantike, jich yuʼun te Pulemal ta skʼajkʼalel te Noé ma laj yuʼun spisil te bintik chopole. Pero te Dios nopolix ya xbajt slajin ta jkʼaxel te machʼatik ma lek stalelike. Jich bitʼil la yal te salmista: «Ya xchʼay bahel te machʼa chopol». Te Dios ya xbajt slajin te machʼatik ma lek stalelik ta swenta te Wentainel yuʼune, te jaʼ jun gobierno te ay ta chʼulchan te ya swentain spisil te ants winiketik te ya schʼuunbey skʼop te Diose.

NOPA TA SWENTA INI. ¿Bin ya xkʼot ta pasel ta stojolik te ajwaliletik yuʼun te balumilal? ¿Lekbal ya yilik te Wentainel yuʼun te Diose? Te Biblia ya yal te maʼuke. Te bin ya xbajt spasike, jaʼ te ya xbajt skontrainik (Salmo 2:2). ¿Bin ya xkʼot ta pasel? Te Wentainel yuʼun Dios ya slajinlan spisil te ajwaliletik yuʼun te balumilal sok jaʼnax «sbahtel qʼuinal ya xhil stuquel» (Daniel 2:44). Pero ¿bin yuʼun ma xbajt wentainwanukix te ajwaliletik yuʼun te balumilal?

¿Bin ya yal te Bibliae? «Te ants-winic ma haʼuc scuentahinej te be yuʼune» (JEREMÍAS 10:23).

TE BIN YA SKʼAN YA YAL. Te ants winiketik ma la yichʼik pasel yuʼun jaʼnix ya swentain sbaik, jaʼ yuʼun ma juʼem yuʼunik swentainel o ta schajpanbeyel swokolik te yantik ants winiketik.

NOPA TA SWENTA INI. Te enciclopedia Britannica Academic ya yal te ajwaliletik yuʼun te yanyantik nacionetik «ma juʼem yuʼunik slajinel te pobreil, te wiʼnal, te chameletik, te bintik ya xjinawan jilel, te guerra sok te j-utsʼinwanejetik». Jich ya yalxan: «Ay machʼatik [...] ya yalik te jtulnax ajwalil ya xjuʼ ya slajin spisil te wokoliletike». Jaʼukmeto manchukme ya syom sba spisil te ajwaliletik, mananix kʼan lajuk yuʼunik-a te wokoliletik te ay ta Balumilal, melel jmulawil ants winiketik. Te Wentainel yuʼun Dios jaʼnax ay yuʼel yuʼun ya slajin ta jkʼaxel spisil te wokoliletik te ay ta Balumilal.

Jich bitʼil ya yal te Biblia, te machʼatik lek stalelik ma skʼan ya xiʼik te slajibal te chopol balumilal ini. Kʼax lek te bin yakotik ta smaliyel, melel te Dios ya slajin spisil te bintik chopol yuʼun ya yachʼubtes te Balumilale.

¿Binwan-ora ya xkʼot ta pasel? Ta yan artículo ya scholbey skʼoplal te bin ya yal te Biblia.