LI KRIXCHANOETIKE

¿Kʼusi chal li Vivliae? Li Diose «mu jecheʼuk noʼox la [smeltsan li balumile, yuʼun] la smeltsan sventa xichʼ [naklebinel]» (ISAIAS 45:18).

LI BALUMILE

¿Kʼusi chal li Vivliae? «Chtal jkʼol kuxlejal, chbat jkʼol kuxlejal, pe li balumile te oy-o sbatel osil» (EKLESIASTES 1:4).

¿KʼUSI SKʼAN XAL? Li Vivliae chal ti muʼyuk chichʼ lajesel li balumile, yuʼun te oy-o sbatel osil. Jaʼ yuʼun chaʼa, ¿kʼusi skʼan xal ti chlaj skʼoplal li balumile?

NOPBO SKʼOPLAL LIʼE. Li Vivliae chal ti xkoʼolaj ta slajebal balumil li kʼusi kʼot ta pasel ta skʼakʼalil Noee, li vaʼ orae noj ta choplejal li balumile (Jenesis 6:13). Li Diose la spoj Noe xchiʼuk yutsʼ yalal ta skoj ti la xchʼunbe smantale. Pe jaʼ la slajes li chopol krixchanoetik ta nojelal ta voʼe. Xi chalbe skʼoplal Vivlia li kʼusi kʼot ta pasele: «Jech noxtoc ta sventa pulel ta voʼ ichʼay li banamile» (2 Pedro 3:6, Xchʼul Cʼop Jtotic Dios, ta skʼop Chenalhó). Jaʼ jech laj yichʼ lajesel balumil li vaʼ kʼakʼale, pe ¿kʼusi ti laj yichʼ lajesele? Maʼuk li balumile, jaʼ li chopol krixchanoetike. Jaʼ yuʼun, kʼalal chalbe skʼoplal Vivlia li slajeb balumile, maʼuk skʼan xal ti chichʼ lajesel li jbalumiltike, jaʼ chalbe skʼoplal ti chichʼ lajesel li chopol krixchanoetike xchiʼuk li kʼusitik spasojanike.

VOKOLILETIK XCHIʼUK CHOPLEJAL

¿Kʼusi chal li Vivliae? «Mu xa jaluk skʼan, vaʼun chchʼay skʼoplal li buchʼutik toj chopolike; chakʼel to ti bu toʼox oyike, pe chʼabal xa te oyik. Yan li manxoetike jaʼ chuʼuninik li balumile xchiʼuk tskʼupinik tajek li jun oʼontonal ti muʼyuk spajebe» (SALMO 37:10, 11).

¿KʼUSI SKʼAN XAL? Kʼalal echʼem xa ox nojelal ta voʼe, lik ayanuk chopol krixchanoetik xtok ti laj yakʼbe svokol li yantike. Pe jutuk xa skʼan slajesbe skʼoplal choplejal ta j-echʼel li Diose. Xi laj yal li jtsʼibajom yuʼun Salmoe: «Chchʼay skʼoplal li buchʼutik toj chopolike». Li Diose tstunes li Ajvalilal yuʼun sventa slajesbe skʼoplal li choplejale, jun ajvalil ti te oy ta vinajele xchiʼuk ti tsventain li krixchanoetik ti chchʼunbeik smantal Diose.

NOPBO SKʼOPLAL LIʼE. ¿Kʼusi chkʼot ta stojolal li ajvaliletik ta balumile? ¿Mi tskoltaik li Ajvalilal yuʼun Diose? Li Vivliae chal ti moʼoje, yuʼun tskontrainik li Ajvalilal yuʼun Diose (Salmo 2:2). Vaʼun, ¿kʼusi chkʼot ta pasel? Li Ajvalilal yuʼun Diose jaʼ ch-och ta xkʼexol li ajvaliletik liʼ ta balumile, «vaʼun stuk xa noʼox te chkom sbatel osil» (Daniel 2:44). Pe ¿kʼu yuʼun ti muʼyuk xa ch-ajvalilajik li krixchanoetike?

¿Kʼusi chal li Vivliae? «Mi jaʼuk xuʼ yuʼun tsbeiltas sba batel stuk li jun krixchano ti yakal chanave» (JEREMIAS 10:23).

¿KʼUSI SKʼAN XAL? Muʼyuk bu laj yichʼik pasel sventa sventain sba stukik li krixchanoetike, yuʼun mu xtojobik ta sventainel li yantike mi jaʼuk xchapaj yuʼunik li svokolike.

NOPBO SKʼOPLAL LIʼE. Xi chal li ensiklopedia Britannica Academic ta sventa li ajvaliletik ta jujun jteklume: «Mu xuʼ yuʼunik slajesbeik skʼoplal li povreal, viʼnal, chameletik, nikel, nojelal ta voʼ o yan kʼusitik, paskʼop xchiʼuk majbail o yan vokoliletike». Xi to chale: «Junantike [...] xchʼunojik ti jun noʼox ajvalil ta spʼejel balumil ti xuʼ slajesbe skʼoplal skotol li kʼusitik taje». Akʼo mi chchap skʼopik li ajvaliletik ta spʼejel balumile, mu xuʼ yuʼunik slajesbeik skʼoplal skotol li vokoliletik laj xa kaltike, yuʼun maʼuk tukʼil krixchanoetik. Yuʼun jaʼ noʼox li Ajvalilal yuʼun Dios xuʼ slajesbe skʼoplal ta sbatel osil skotol li vokoliletik taje.

Jech kʼuchaʼal chal li Vivliae, li lekil krixchanoetike muʼyuk srasonal yuʼunik sventa xiʼik mi laj yichʼ lajesel li balumile, jaʼ xkaltik, ti chlaj skotol li kʼusitik oy ta balumile. Skʼan xkuxetuk koʼontontik jmalatik xkʼot ta pasel, yuʼun li mol balumil liʼe chichʼ kʼextael ta jun achʼ balumil ti yaloj chakʼ Diose.

¿Bakʼin chkʼot ta pasel taje? Li ta yan xchanobile, ta jkʼeltik kʼusi chal li Vivliae.