Ki Jou Lafen Di Moun Kay Wivé? Sa Jézi Té Di
Kon nou fin apwann an atik-la avan sala, lè Bib-la palé di lafen di moun, sa pa vlé di latè-a menm kay détwi, ében tout moun ki asou’y kay détwi. Pito sa, i ka palé di bout lé méchan èk bout tout sé mové bagay-la ki ka fèt asou latè. Mé ès Bib-la di anyen pou fè nou sav ki jou lafen di moun kay vwéman fèt?
ANNOU ÈGZANMINÉ DÉ BAGAY JÉZI TÉ DI KONSÈNÉ LAFEN DI MOUN:
“Véyé, paski ou pa konnèt ki jou ében ki nèditan Gason Lézòm-lan kay vini.”—MAFYOU 25:13.
“Pwan bon pokosyon épi kontiné èspéyé, paski zòt pa sav lè jou-a kay vini.”—MAK 13:33.
Kon sa pyèsonn asou latè pa konnèt ki jou lafen di moun kay wivé. Kanmenm, Bondyé ja mété yon “jou,” anfen yon “nèditan,” pou lafen di moun fèt. (Mafyou 24:36) Ès sa vlé di la pa ni pyès mannyè pou nou sav ki jou lafen di moun kay vwéman fèt? Nou sa ni an ti lidé. Jézi té di sé disip li-a la ni sèten bagay yo té kay wè ki té kay moutwé bout-la pwé.
SA MOUN TÉ KAY WÈ
Sé bagay sala ki té kay fèt té kay bay moun an ti lidé ki lè “tan-an kay bout.” Jézi di: “Nasyon kay goumen kont nasyon épi wéyòm kay ataké yonn a lòt. La kay ni lafen èk twanblanntè adan an chay koté.” (Mafyou 24:3, 7) Jézi osi di la té kay ni “tout sòt diféwan maladi.” (Louk 21:11) Ès ou ja ka wè sé bagay-la Jézi di ki té kay fèt?
Jòdi jou, moun owon latè ka soufè a kòz di mové ladjè, lafen, twanblanntè, èvèk tout sòt kalité vyé maladi. Pa ègzanp, an lanné dé mil kat (2004), an mové twanblanntè ki fèt ko yo kwiyé Indian Ocean, annékòz an gwo lanm lanmè lévé ki tjwé apochan dé san venn senk mil (225,000) moun. Koumansé lanne dé mil diznèf (2019) pou wivé lanné dé mil venndé (2022) maladi COVID pwan lavi pwèskè sèt milyon (7,000,000) moun. Jézi té di bagay kon sa té kay moutwé lafen di moun, ében bout tout movèzté byen pwé.
“DÈNYÉ TAN-AN”
Bib-la kwiyé ti tan-an avan lafen di moun “dènyé tan-an.” (2 Pita 3:3, 4) Dézyenm Timòfi 3:1-5 di an dènyé tan majòwité di moun pa té kay viv an ling épi wèg Bondyé. (Gadé sèksyon-an: “ Ti Tan-an Avan Lafen Di Moun.”) An tan jòdi, ès ou ka wè moun ki ka gadé pou kò yo tousèl, moun ki vowas, moun ki bwital, èk moun ki pa enmen lézòt? Sa osi ka moutwé nou lafen di moun, ében bout tan-an byen pwé.
Konmen tan sa kay pwan pou dènyé tan-an pasé? Silon Labib, tan sala kay byen kout. Apwé sa, Bondyé kay détwi “sé moun-an ki ka détwi latè sala.”—Wévélasyon 11:15-18; 12:12.
LATÈ-A KAY VINI AN PAWADI TOU TALÈ!
Bondyé ja mété jou-a èk nèditan-an i kay mennen an bout pou tout sé mové bagay-la ki ka fèt asou latè. (Mafyou 24:36) Mé, la ni pli bon nouvèl toujou: Bondyé “pa vlé pyèsonn péwi.” (2 Pita 3:9) I ka bay lézòm chans pou mété lavi yo an ling épi wèg li. Pouki i ka fè sa? Paski i vlé nou chapé lafen di moun, èk viv an latè nèf-la i kay mennen-an, sa vlé di an pawadi-a.
Bondyé ja fè asiwé tout moun sa apwann sa yo ni pou fè pou yo sa viv an latè nèf-la anba lotowité Wéyòm li. Jézi té di moun té kay pwéché bon nouvèl-la konsèné Wéyòm Bondyé “toupatou an latè-a.” (Mafyou 24:14) Témwen Jéhova owon latè ka pasé plizyè bilyon nèditan ka pwéché èk enstwi moun bèl èspwa-a ki an Bib-la. Jézi té di yo té kay fè twavay sala an tout latè-a avan tan-an bout.
Lézòm pa ni djè tan ankò pou yo kondwi. Kanmenm la ni lòt bon nouvèl toujou. Ou sa chapé lè Bondyé tiwé tout movèzté, èk ou sa viv an Pawadi-a i pwonmèt-la. Mé, ki sa ou ni pou fè pou’w sa chapé? Ou kay twouvé wépons-lan an lòt atik-la.
Pwofèsi-a Jézi bay konsèné “dènyé tan” ka ban nou wézon pou ni èspwa
