“Padagos kamong magbantay huli ta dai nindo aram an aldaw ni an oras.”—MATEO 25:13.

“Magdanay kamong mapagbantay, magdanay kamong mata, huli ta dai nindo aram kun nuarin an itinalaan na panahon.”—MARCOS 13:33.

Kaya mayo nin siisay man sa daga an nakakaaram kun nuarin talaga maabot an katapusan kan sistemang ini nin mga bagay. Pero may “itinalaan na panahon” na an Diyos—sarong espesipikong “aldaw asin oras”—kun nuarin maabot an katapusan. (Mateo 24:36) Buot sabihon daw kaini, mayo lamang nin paagi para maaraman ta kun madali na an katapusan? Dai. Sinabi ni Jesus sa saiyang mga disipulo na abangan an mga pangyayari na magpaparisa na harani na an katapusan.

An mga pangyayaring iyan an magigin tanda kan “pagtatapos kan sistema nin mga bagay.” Sinabi ni Jesus: “An nasyon makikilaban sa nasyon asin an kahadian makikilaban sa kahadian, asin magkakaigwa nin sunod-sunod na kakulangan nin kakanon saka linog sa manlain-lain na lugar.” (Mateo 24:3, 7) Sinabi man niya na magkakaigwa nin “epidemya”—mga naglalakop na hilang. (Lucas 21:11) Nahihiling mo na daw na nangyayari na an mga iprinopesiyang iyan ni Jesus?

Nagsasakit ngunyan an mga tawo dahil sa giyera, kakulangan nin kakanon, saka linog, pati sa sunod-sunod na mga hilang. Halimbawa kan 2004, dahil sa makusugon na linog sa Indian Ocean nagka-tsunami na guminadan nin mga 225,000 katawo. Sa laog nin tulong taon, mga 6.9 milyon an nagkagaradan sa bilog na kinaban dahil sa COVID-19 na pandemya. Sinabi ni Jesus na an mga pangyayaring ini tanda na harani na an katapusan kan sistemang ini nin mga bagay.

Inaapod kan Bibliya na “huring mga aldaw” an panahon bago mag-abot an katapusan. (2 Pedro 3:3, 4) Sinasabi sa 2 Timoteo 3:1-5 na sa huring mga aldaw an mga pamantayan sa moral kan mga tawo maruro. (Hilingon an kahon na “ Bago Mag-abot an Katapusan kan Kinaban.”) May nahihiling ka daw ngunyan na mga tawong makasadiri, mahanab, maisog, saka mayong pagkamuot sa kapwa? Patunay man iyan na nabubuhay na kita sa panahon na madali na talagang mag-abot an katapusan kan kinaban.

Gurano kahaloy an huring mga aldaw? Sinasabi kan Bibliya na ‘halipot sanang panahon’ iyan. Pagkatapos, paparaon nin Diyos an “mga nagraraot kan daga.”—Kapahayagan 11:15-18; 12:12.

May itinalaan nang aldaw asin oras an Diyos kun nuarin niya tatapuson an presenteng maraot na sistemang ini nin mga bagay. (Mateo 24:36) Pero, may saro pang maugmang bareta—“habo [nin Diyos na] malaglag an siisay man.” (2 Pedro 3:9) Tinatawan niya nin pagkakataon an mga tawo na manudan saka masunod an mga pamantayan niya. Taano? Dahil gusto niya kitang makaligtas sa katapusan kan kinaban na ini saka mabuhay sa saiyang bagong kinaban pag an daga magin paraiso na.

May inorganisar an Diyos na sarong programa nin pagtutukdo sa bilog na kinaban para maaraman kan mga tawo kun paano sinda magigin parte kan bagong kinaban sa irarom kan saiyang Kahadian. Sinabi ni Jesus na an maugmang bareta manungod sa Kahadian nin Diyos ihuhulit “sa bilog na kinaban.” (Mateo 24:14) Sa bilog na kinaban, an mga Saksi ni Jehova naggagamit nin binilyon na oras sa paghuhulit asin pagtutukdo sa mga tawo kan mensahe nin paglaom kan Bibliya. Sinabi ni Jesus na an paghuhulit na ini gigibuhon sa bilog na daga bago mag-abot an katapusan.

An panahon kan pamamahala nin tawo patapos na. Pero an maugmang bareta, puwede kang makaligtas sa katapusan kan kinaban asin mag-istar sa paraisong daga na ipinanuga nin Diyos. Ipapaliwanag sa sunod na artikulo kun paano ka puwedeng mabuhay sa bagong kinaban na iyan.