”Rarirya, mkowaren, snar mkofawiḇa ras ma fafisu ya.”​—MATIUS 25:13.

”Mkosasor mko ma mkowaren! Snar mkofawi fafisu ya ryama nya ḇa.”​—MARKUS 13:33.

Allah dap kwar fafisu risai dunya ine nari ipromes. Kaku, kofawi ḇaḇeri ”ras ma fafisu ani”. (Matius 24:36) Imbape na kofawi papupes ani fyanam kwar ro Yesus wos ḇyena. Randak iwara, Yesus isya ikofenḇair ḇe manfamyan ḇyesi sarisa ḇeḇeso ḇeaḇyair snar papupes dunya ine nari fasaw kaku ipromes.

Sarisa nabor naisya nḇeaḇyair ”papupes supswan” ine. Yesus doḇe, ”Er nari sikḇawes sisampum er ḇese, ma ḇaḇesasoser sisampum ḇaḇesasoser ḇese na. Nari basbiser isya ma rim ḇeba nmun ro moḇ nabor.” (Matius 24:3, 7) I kako doḇe nari dafduf ḇefarpampam isya myun. (Lukas 21:11) Kwara ido sarisa ḇebor nane nasya nḇejadi kwar ke?

Kirine, mamamun, basbiser, ma rim ḇeba, ramnai dafduf ḇemun snonggaku ḇebor nejadi ker ro supswan ḇesiper. Imnis ra, ro 2004, tatawai oso ḇyejadi ro Samudra Hindia ma nafrur tsunami myun indokada snonggaku ri 225.000. Ma ro taun oser inekada, pandemi COVID-19 myun indokada snonggaku ri 2,6 yuta. Yesus ikofen ḇo doḇe snar sarisa ḇebor ḇeḇejadi nane nfasnai kaku papupes ani fyanam kaku kwar.

Refo dap ras mamun Manseren Ḇyedi ḇerama ḇaim ḇe ’ras ḇepupes.’ (2 Petrus 3:3, 4) Suru Timotius 3:1-5, doḇe rari ma roi snonggaku sifrur ro ras ḇepupes nari iḇyeḇa syadi. (Mam kotak ” Fanam ḇe Papupes Dunya Ine.”) Mam ido, snonggaku ro kirine sya sifandun manggunsi, simarisen sna syadadi, siḇarḇor, ma sirarmomen ke? Rari ḇeḇyeḇa snonggaku sfasnai nane kako nfasnaiḇair kaku papupes dunya ine fyanam kaku kwar.

Ras papupes ine imnai isof rodiso? Refo doḇe fasaw monda. Ramnai, Manseren Allah nari byuk samamyai ḇe snonggaku ḇesya ḇefrur supswan ine iḇyeḇa.​—Fasasna faro Yohanes 11:15-18; 12:12.

Manseren Allah dap kwar fafisu risai nari ipyosbur roi ḇeḇyeḇa nakam ḇero dunya ine ma myunpres snonggaku ḇeḇarḇor sya. (Matius 24:36) Ḇape, kaku ya ima ”imewer oso ryo”. (2 Petrus 3:9) Byuk swaf ḇe snonggaku ko fa kofarkor infa kofawi marisen Ḇyena ma kosouser faro I. Imarisen komkei ro papupes dunya ine ma kokenem ro dunya babo, isoine supswan ḇeḇefadwer kwar ḇe moḇ ḇepyum kaku.

Manseren Allah myam kaku insama snonggaku sna swaf fa sfarkor moḇsa sisun ḇe dunya babo ya rai ma sḇe kawasa ro Karajan Allah. Yesus ikofen snar abar ḇepyum Karajan Allah nari ”ḇye ḇeḇaryas ro supswan ḇesiper.” (Matius 24:14) Ro 2019, Saksi-Saksi Yahwe ro supswan ḇesiper sbuk oras syadi ro miliar risuru fa sifnoḇek snonggaku ḇefarkor Refo. Yesus i kako doḇe snar fararur ine nari sifruri fyor ras mamun Manseren Ḇyedi ryama ḇaim.

Dunya ine ma pamarenta nakam nari fasaw kaku napromes. Ḇape, wamgak awer snar na wamkei ma wakenem ro dunya babo Manseren Allah ḇyeasas ya. Nyan ya rarso? Farkarkor ḇeuser ya nari kawos roi ine.