Vawlei Hi Zeitikah Dah A Dongh Lai? Jesuh Chimmi
A hmasa capar ah kan theih cang bantukin Baibal nih vawlei donghnak kong a chim tikah hi vawlei asiloah minung donghnak kha a chim duhmi a si lo. Mah canah atu ah a rawkralmi hi vawlei le vawlei a bawmmi dihlak i an donghnak kong kha a chim duhmi a si. Asinain hi vawlei ṭha lo cu zeitikah dah a dongh lai timi kong he aa tlaiin Baibal nih zeidah a chim?
DONGHNAK KONG HE AA TLAIIN JESUH CHIMMI KONG PAHNIH HI RUATHMANH:
“Cucaah cun a ni siseh, a caan siseh, nan hngalh ṭung lo caah ralring tein um ko u.”—MATTHAI 25:13.
“Cu caan cu zeitikah a si lai kha nan hngalh lo caah i ralring te le fimhring tein um ko u.”—MARKA 13:33.
Cucaah hi vawlei hi zeitikah dah a dongh lai ti kha ahohmanh nih fiang tein an hngal kho lo. Asinain Pathian nih donghnak a rat lai “caan” le “ni” kha ri a khiah cang. (Matthai 24:36) Mah cu donghnak a nai cang ti hngalh khawhnak lam a um lo tinak a si maw? A si lo. Jesuh nih a zultu pawl kha donghnak a nai cang ti a langhtermi thil sining tampi a rak chimh hna.
Hmelchunhnak
Mah thil sining hna hi “chan donghnak ding hmelchunhnak” an si. Jesuh nih hitin a ti: “Ramkhat le ramkhat an i do lai, pengkhat le pengkhat an i tu lai. A kenkip ah mangṭam le lihnin a tlung lai.” (Matthai 24:3, 7) Mah lengah chawnh khawhmi zawtnak “ngal-eu zawtnak” hna a tlung lai ti zongin a ti. (Luka 21:11) Jesuh chimchungmi thil sining hna kha na hmu maw?
Tuchan ah mi pawl cu raltuknak, mangṭam, lihnin le zawtnak pakhat hnu pakhat ruangah harnak an tong. Tahchunhnak ah, 2004 ah India Rili ah a tha a ṭhawng tukmi tsunami li aa hnin caah minung 225,000 hrawng an rak thi. Kumkhat leng chungah COVID-19 pulrai ruangah vawleicung pumpi ah minung nuai 2.6 an thi. Cu bantuk thil sining hna nih hi vawlei donghnak caan a nai cang ti kha an langhter lai tiah Jesuh nih a ti.
“Caan Donghnak Caan”
Baibal nih donghnak a rat hlan deuh caan kha “caan donghnak caan” in a langhter. (2 Peter 3:3, 4) 2 Timote 3:1-5 ningin donghnak caan ah mi pawl cu an ziaza a rawkral lai. (“ Vawlei A Dongh Hlanah” timi rinli kulh ah zoh.) Tuchan ah mahzawn lawng aa ruatmi, a hak a kaumi, a puarhrangmi le dawtnak a ngei lomi hna kha na hmu hna maw? Mah nih a naih tuk cangmi donghnak caan ah kan nung ti kha a langhter.
Donghnak caan cu zei can dah a rauh lai? Baibal chimmi ningin “caan tawite lawnglawng” a si lai. Cun Pathian nih “vawlei a hrawktu hna” kha a hrawh hna lai.—Biathlam 11:15-18; 12:12.
Vawlei Paradis Cu A Nai Cang
Pathian nih hi vawlei ṭha lo a donghter lai ni le caan kha ri a khiah cang. (Matthai 24:36) Asinain Pathian nih “pakhat tlau hmanh hi a duh lo” timi thawngṭha a um. (2 Peter 3:9) Cucaah minung kha a phunglam ningin nun awkah caanṭha a kan pek. Zeicah? Hi vawlei donghnak in luat hna sehlaw paradis ah a cang dingmi vawlei thar ah nung hna seh ti a kan duh caah a si.
Pathian nih a Pennak tang i vawlei thar ah zeitindah luh khawh a si timi kong kha mi kip nih an cawn khawh nakhnga a timhtuah. Jesuh nih Pathian Pennak kong cu vawleicung “khua zakip ah” chim a si lai tiah a ti. (Matthai 24:14) Vawleicung pumpi ah a ummi Jehovah Tehte Hna nih 2019 ah suimilam nuai thong 2 leng phung an chim i mi pawl kha ruahchannak a pemi Baibal kong an cawnpiak hna. Jesuh nih mah phungchimnak campaign cu donghnak a rat hlanah vawleicung pumpi ah chim a si lai tiah a ti.
Minung uknak caan cu a dih deng cang. Asinain thawngṭha cu vawlei donghnak in na luat kho i Pathian biakammi Paradis ah na nung kho ti hi a si. A hnu capar ah mah vawlei thar ah zeitindah na nun khawh timi kong kan i ruah hna lai.
“Donghnak caan” kong he aa tlaiin Jesuh chimchungbia nih ruahchannak a kan pek
Mah Kong Hna Zong Hi Na Duh Khawh Men
VENNAK INNSANG
Pathian Pennak Nih Zeitikah Dah Vawlei A Uk Lai?
Jesuh i zumhfekmi a zultu cheukhat nih mah kha hngalh an rak duh ve. An biahalnak kha Jesuh nih zeitindah a leh hna?
BAIBAL BIAHALNAK A PHI
“Ni Hmanung Bik” Asiloah “Donghnak Caan” Hmelchunhnak Hna Cu Zeidah An Si?
Baibal nih ni hmanung bik ah a cang dingmi thil kong kha a chimchung.
