“Endeeai kũsyaĩĩsya, nũndũ mũyĩsĩ mũthenya ũsu kana saa ũsu.” —MATHAYO 25:13.

“Ĩkalai mwĩ metho, endeeai kũsyaĩĩsya, nũndũ mũyĩsĩ ĩvinda yĩla yĩnyuvĩtwe nĩ ĩndĩĩ.”—MALIKO 13:33.

Kwoou vai mũndũ o na ũmwe ĩũlũ wa nthĩ wĩsĩ nesa nĩ ĩndĩĩ mũminũkĩlyo wa ĩvinda yĩĩ ĩthũku ũkavika. Ĩndĩ Ngai e na ‘ĩvinda yĩla ũnyuvĩte,’ kana ‘mũthenya na saa’ sya kũete mũminũkĩlyo. (Mathayo 24:36) Ũu nĩ kwonany’a kana vai ũndũ twĩsa kũmanya mũminũkĩlyo ũsu ũivika? Aiee. Yesũ nĩwatavisye amanyĩw’a make maũndũ meana ũna ala makamatetheesya kũmanya kana mũminũkĩlyo wĩ vakuvĩ vyũ.

Maũndũ aa Yesũ wawetie nĩmo wonany’o wa “mũminũkĩlyo wa ĩvinda yĩĩ.” Aisye: “Mbaĩ ĩkookĩlĩla mbaĩ na ũsumbĩ ũkookĩlĩla ũsumbĩ, na kũkeethĩwa ũnyivu wa lĩu na ithingitho sya nthĩ kũũ na kũũ.” (Mathayo 24:3, 7) O na ĩngĩ, aisye kũkeethĩwa na “mowau ma kũkwatanw’a” na meũnyaaĩkw’a na mĩtũkĩ. (Luka 21:11) We nĩwĩyoneete maũndũ asu Yesũ wathanie?

Ũmũnthĩ andũ aingĩ nĩmaũmĩaa nũndũ wa makaũ, mayũa, ithingitho sya nthĩ, o vamwe na mowau mateũthela. Kwa ngelekany’o, mwakanĩ wa 2004, kĩthingitho kĩmwe kĩnene nĩkyaumĩlile Ũkanganĩ wa India na kyaete tsunami yooaie andũ ta 225,000. Na kwa vandũ va mwaka ũmwe na kĩndũ, ũwau mũthũku wa COVID-19 nũnooaie andũ ta milioni 2.6 ĩũlũ wa nthĩ. Yesũ aisye maũndũ ta asu nĩmo makonany’a kana mũminũkĩlyo wa ĩvinda yĩĩ yathe wĩ vakuvĩ.

Ĩvinda yĩla yĩtialĩte mũthya ũtanavika yĩtĩtwe nĩ Mbivilia ‘mĩthenya ya mũminũkĩlyo.’ (2 Vetelo 3:3, 4) Ĩandĩko ya 2 Timotheo 3:1-5 yonanĩtye kana andũ ma mĩthenya ya mũminũkĩlyo makeethĩwa na mĩkalĩle mĩthũku vyũ. (Sisya ĩsandũkũ “ Kavinda Kakuvĩ Mũminũkĩlyo Ũtanavika.”) We ũmũnthĩ nĩwonaa andũ meyendete, me ĩtomo, ai, na matendete angĩ? Ũsu nĩ wonany’o ũngĩ ũtũĩkĩĩthasya kana mũminũkĩlyo wĩ vakuvĩ vyũ.

Mĩthenya ĩno ya mũminũkĩlyo yĩkua ĩvinda yĩana ata? Mbivilia yonanĩtye kana ĩtialĩtye “kavinda o kanini.” Na ĩndĩ kavinda kau kathela, Ngai ayosa ĩtambya ya “kũmananga ala manangaa nthĩ.”—Ũvuany’o 11:15-18; 12:12.

Ngai nĩwatwie mũthenya na saa ila ũkaete mũminũkĩlyo wa ĩvinda yĩĩ tũtwĩe. (Mathayo 24:36) Ĩndĩ ũvoo mũseo nĩ kana Ngai “ndendaa o na ũmwe . . . anangwe.” (2 Vetelo 3:9) Nũnengete andũ mwanya wa kũvĩndũka na maiatĩĩa myolooto yake. Nĩkĩ? Nũndũ endaa tũvonoke mũminũkĩlyo wa nthĩ ĩno na tũyĩkala ĩla nthĩ nzaũ ũtwathĩte ĩtakethĩwa na thĩna o na ũmwe.

Ngai nĩwĩkĩte mũvango aĩkĩĩthye kana andũ nthĩ yonthe nĩmamanyĩw’a kĩla maĩle kwĩka nĩ kana meĩthĩwa vo yĩla Ũsumbĩ wake ũkatw’ĩkĩthya maũndũ onthe meũ. Yesũ aisye ũvoo mũseo ĩũlũ wa Ũsumbĩ wa Ngai ũkatavanw’a “nthĩ yonthe.” (Mathayo 24:14) Mwakanĩ wa 2019, Ngũsĩ sya Yeova nthĩ yonthe syatũmĩie masaa mbee wa mbilioni ilĩ iitavany’a na kũmanyĩsya andũ wĩkwatyo mũseo ũla wĩ Mbivilianĩ. Wĩa ũsu wa kũtavany’a nĩw’o Yesũ waisye ũkatethw’a mũthya ũtanavika.

Ĩvinda ya andũ ya kwĩsumbĩka yĩkilyĩ kũthela. Ĩndĩ we no ũvonoke mũminũkĩlyo wa nthĩ ĩno na ũyĩkala ĩla nthĩ nzaũ Ngai ũtwathĩte. Kĩlungu kĩla kĩatĩĩe kĩneeneete maũndũ ala waĩle kwĩka nĩ kana wĩĩkala nthĩ ĩsu nzaũ.