“Yipo nye nomu vangararera, morwa kapi mwa diva ezuva novili.”—MATEUSA 25:13.

“Vangarareni oku tomu nomene, yeeyi kapi mwa diva siruwo apa ngasi sika mo.”—MARUKUSA 13:33.

Yipo nye kwato gumwe pevhu ogu ga diva nawa-nawa siruwo apa ngau haga po uzuni ou. Nye, Karunga ga tura po ‘siruwo’ ndi ‘ezuva novili’ apa ngau haga uzuni. (Mateusa 24:36) Eyi ngesi kutanta asi kwato eyi nayi tu vatera tu dive asi ehagero lyouzuni pepi lina kara ndi? Hawe. Jesus kwa tanterere varongwa vendi va nomene yihorokwa eyi ngayi likida asi uzuni ou ntaantani u hage.

Yihorokwa oyo ngayi kara sidiviso “souhura wouzuni.” Jesus kwa tente asi: “Nomuhoko ngadi lirwanesa-rwanesa, ano yirongo nayo ngayi lirwanesa-rwanesa. Nondya ngadi sesupa ntani ngaku kara makankamo gevhu komavango gokulisiga-siga.” (Mateusa 24:3, 7) Ntani hena asi ngapa kara ‘mahamba gomukagu. (Rukasa 21:11) Ove kuna kumona yininke eyi ga tente Jesus ndi?

Naina, vantu kuna kuhepa morwa yita, nzara, makankamo gevhu ntani mauvera gokulitwikida. Pasihonena, momvhura 2004 ekankamo lyenene lyevhu mefuta lyaIndia kwa retesere po ruhanzo ava tumbura asi Tsunami oru rwa dipagere konyara vantu wokusika po-225 000. Ano monomvhura ntatu tupu, ehamba lyomukagu eli ava tumbura asi Korona kwa dipaga konyara vantu wokusika komamiliyona 6, 9 uzuni mudima. Jesus kwa tente asi yihorokwa ngwendi yeeyi kulikida asi ehagero lyouzuni pepi lina kara.

Bibeli kutumbura siruwo komeho u ka hage po uzuni asi ‘mazuva gopouhura.’ (2 Peturusa 3:3, 4) Mwa-2 Timoteusa 3:1-5 kutanta asi pomazuva gopouhura vantu kapi ngava kara nonkareso zongwa. (Tara kakende “ Komeho tupu uzuni u ka hage.”) Ove kuna kumona vantu wokuligazara tupu vene, wokudowokera yininke, wonyanya ntani wokunyenga vakwawo ndi? Eyi nayo kuna kulikida asi ose kuna kuparuka pepi-pepi nehagero lyouzuni ou.

Siruwo sokuhura kupi ngaga gusa mazuva aga gopouhura? Bibeli kutanta asi ‘siruwo esi sina hupu ko sisupi.’ Makura Karunga a ya zonagure po “ava vana kuzonagura evhu.”—Ehororo 11:15-18; 12:12.

Karunga nare ga tura po ezuva novili apa nga hagekesa po uzuni ou woudona. (Mateusa 24:36) Nye mbudi zongwa zeezi asi Karunga “kapi ga hara asi ngapa ka zonauke nampili gumwe.” (2 Peturusa 3:9) Age kuna kutupa mpito tu lironge kuhamena mpango zendi ntani nokumulimburukwa. Morwasinke? Morwa ana hara ngatu paruke ehagero lyouzuni ou nokukakara mouzuni wendi woupe, apa evhu ngali ka kara paradisa.

Karunga ga tura po ewapaiko asi vantu navenye va lironge omu nava vhura kukakara mouzuni woupe mepangero lyoUhompa wendi. Jesus kwa tente asi mbudi zongwa zoUhompa waKarunga ngava zi zuvhisa “mouzuni mudima.” (Mateusa 24:14) Nombangi daJehova mouzuni mudima kwa rugana novili dokusika komabiliyona mokuzuvhisa nokuronga vantu mbudi zomoBibeli. Jesus kwa tente asi sirugana esi sokuzuvhisa tanko ngava si rugana mouzuni mudima ntani nye ngau wiza uhura.

Siruwo sovantu sokupangera ntaantani si hage. Nye mbudi zongwa kuna kara asi kuvhura o paruke ehagero lyouzuni ntani o ka kare moParadisa ezi ga tumbwidira Karunga apa pevhu. Sirongwa sokukwama ko tasi ka zogera omu no vhura kukakara mouzuni woupe.