“Tjenyatakon tiyo, tsokʼoa, nga̱ tsín tsa ʼyao jme nichxinni, kʼoa jme orani” (MATEO 25:13).

“Tikuindao, tiyochonʼndao, tʼetsʼoao, nga̱ likui ʼyao kʼianibe nga kʼoakoa̱n” (MARCOS 13:33).

Nijngojin chjota xi be kʼiani kjoetʼa jmeni xi chon sonʼnde. Tonga je Niná jetíjnachoa̱le nichxin kao hora kʼiani kʼoakoa̱n (Mateo 24:36). A kui xi tsonile jebi nga tsínkʼia sʼe̱jinná kʼiani kjoetʼa jmeni xi chon sonʼnde. Mai. Je Jesús kʼoakitsole je chjotatjenngile nga kuenta katasʼín jmeni xi koa̱n kʼianga jetíjnachrian nichxin.

Je Jesús tongini kʼoakitso jokoa̱nchon kʼianga jetífikjetʼa nichxin. I kitso: “Kuisótje̱nne naxinandá kontrale xi kjaʼaí naxinandá, kʼoa kjoatéxoma kuisótje̱nne xi kjaʼaí kjoatéxoma. Sʼe̱ chʼin, kʼoa sʼe̱ kjinrá, kʼoa cháon kjoaʼa nkjín ʼnde” (Mateo 24:3, 7). Kʼoati kitso nga “chʼinʼbi” koa̱n (Lucas 21:11). A tíbitjoson jmeni xi kitso Jesús.

Je chjota nʼio tse kjoañʼai tjíofaʼá xi totʼatsʼe kjoajchán, kjinrá, cháon kao chʼin. Tobʼelañá, kʼianga nó 2004 nga jaʼa cháon ya jinndáchikon Índico, jngo tsunami kichone chjota kʼoa 225,000 chjota jeson. Nga jan nó tsʼato 6,9 millón chjota kisikʼien je chʼin COVID-19 jngo tjíjtsa Sonʼnde. Je Jesús kʼoakitso nga kui jebi xi koako kʼianga jemachrianle nga kjoetʼa nichxin.

Je Biblia “nichxin xi kjoetʼa” tsole jmeni xi koa̱n tongini nga kjoetʼa jmeni xi chon sonʼnde (2 Pedro 3:3, 4). Ya 2 Timoteo 3:1-5 kʼoatso nga tsín tindasʼin koaikaoni yaole chjota nga to jetífikjetʼa nichxin (chótsenlai je recuadro “ Jokoa̱nkjoan chjota nga to jetífikjetʼa nichxin”). A ʼyaní nga kʼoakjoan ndʼaibi je chjota, nga to yaole fini, nga tsʼen, nga tao̱n ngisa tsjoake, kʼoa nga totaon be xi kjaʼaí. Jebi kʼoati kui bakó nga jemachrianle nga kjoetʼa nichxin.

Jókji tse sʼe̱jna je nichxin xi kjoetʼa. Je Biblia kʼoatso nga tochoatse sʼe̱jna nichxin jebi. Kʼoa xijekoa̱n, je Niná sikjeson je xi tjíosíkitsón Sonʼnde (Apocalipsis 11:15-18; 12:12).

Je Niná jetíjnachoa̱le nichxin kao hora kʼianga kjoaʼaísíkje jmeni xi chon sonʼnde (Mateo 24:36). Tonga je Niná alikui mele nga kjoesoán (2 Pedro 3:9). Kuinga títsjoáʼndeniná nga kataʼyaxkoaan kʼoa nga si̱tjosonlee. Nga̱ kui xi mele nga kʼoangilee yaoná kʼoa nga kuiyoaa kʼianga jeʼndenaxó koa̱n je Sonʼnde.

Jé Niná xotísʼín nga tíʼmiyason Énle jngo tjíjtsa Sonʼnde, ánni nga jchañá jmeni xi sʼiaan nga koa̱n kuiyoaa ya sonʼnde chjotse kʼianga koatexoma je Chjotaxále. Je Jesús kʼoakitso nga sa̱kóyason Énle Niná “ngakijnda sonʼnde” (Mateo 24:14). Je testigole Jeobá xi tjío jngo tjíjtsa Sonʼnde jmi millón hora tsoyason kʼoa tsoyale chjota jmeni xi tso je Biblia. Je Jesús kʼoakitso nga tjínnele sa̱kóyason jngo tjíjtsa Sonʼnde nga kjesa fetʼajin nichxin.

Tochoatsesa nga koatexoma je chjotaxá sonʼnde. Je Énle Niná kʼoatso nga koa̱n kuitjátojin tjínkoaan kʼianga kjoaʼaí kjoaxkón kʼoa nga ya kuiyoaa ya sonʼndenaxó. Ya kjoaʼmiya xi ijngo kui jchaa jméni xi sʼiaan nga koa̱n kuiyoaa ya sonʼnde chjotse.