“Nyanyameni omwo kumuzibuka litangwa nambe simbu.”—MATEO 25:13.

“Nyanyameni, kengeleleni, omwo kumuzibuka simbu omwo ikaija.”—MAKO 13:33.

Ngeci, naumo wahi hano hasi azibuka hakakahwila kano kaye. Oloni Njambi nangula laja ‘litangwa na simbu’ hakakahwila. (Mateo 24:36) Kuma oku kulumbununa ngwabo kutwasa kuzibuka indi mamaneselelo a kaye ali muyehi ndi? Embwe. Yesu walekele bandongesi bendi byuma bimo bije bikamwesa ngwabyo kukotoka kwa kaye kuli muyehi.

Yesu wendekele byuma bimo bije bimwesa ngwabyo “kukotoka kwa kaye” kuli muyehi. Wendekele ngwendi: “Lifuti limo likalwa nzita na lifuti likwabo, co bumwene bukalwisa bumwene bukwabo. Kukakala njala ya lyangengela na mandunduma ku mitambela ya kuliseza-seza.” (Mateo 24:3, 7) Wendekele lalo ngwendi kukakala “mishongo ya kulitambwisa.” (Luka 21:11) Kuma muli na kulimwena ebi byuma byapolofwetele Yesu ndi?

Ano matangwa banu bali na kuyanda mwafwa ya binzita, njala, mandunduma na mishongo ya kuliseza-seza. Cakumwenako, mu 2004, lindunduma lije lyalingiwile ku Indian Ocean lyanenele mankimba akama aje atsiile banu ba kweta ku 225,000. Mu myaka itatu mushongo wa COVID-19 unatsii banu ba kweta ku 6.9 milyoni mu kaye koshe. Yesu wendekele ngwendi ebi byuma mubikalingiwa, bikamwesa ngwabyo kukotoka kwa kano kaye kuli muyehi.

Mbimbiliya inatumbula matangwa a mamaneselelelo ngwayo “matangwa a kukotoka.” (2 Petulu 3:3, 4) Mukanda wa 2 Timateo 3:1-5 unamwesa ngwawo mu matangwa a kukotoka, banu bakakala na bifwa byabibi manene. (Taleni cipalo ca “ Byuma Bikalingiwa Simbu Kanda Kaye Kakotoke.”) Kuma mukamono banu baje balishaka manene bakebo babenya, baje bakala na nuna, ba kukenyuka na baje kubalizemene umo na mukwabo ndi? Obu nabwo bunapu bukaleho bumwesa ngwabwo tuli ku mamaneselelo a matangwa a kukotoka kwa kaye.

Matangwa a kukotoka akalako ha simbu ya kupwa hali? Mbimbiliya ngwayo kunasala lika “kasimbu kakandondo,” co Njambi anyongesa ‘baje bali na kubiisa kaye.’—Kujombolola 11:15-18; 12:12.

Njambi nangula laja litangwa na simbu yakanyongesa kano kaye kakabi. (Mateo 24:36) Oloni Njambi “kashaka umo akanyonge.” Co ou unapu muzimbu waubwa manene. (2 Petulu 3:9) Natwana simbu ya kulilongesa byendi na kumwononoka. Mwafwa bika? Mwafwa ashaka ngwendi tukoboke omwo akanyongesa kano kaye, co tukayoye mu Paradaisi hano hasi.

Njambi nabwahesa ngwendi banu mu kaye koshe balilongese mubakayoyela mu kaye kakaha omwo Bumwene bwendi bukayula. Yesu wendekele ngwendi muzimbu waubwa wa Bumwene bwa Njambi bakawambulwila “mu kaye mwoshe.” (Mateo 24:14) Bakaleho ba Yehova mu kaye koshe bali na kwambulula na kulongesa banu Mbimbiliya ha maola a mangi-mangi. Yesu wendekele ngwendi eci cipangi ca kwambulula bakacilinga mu kaye koshe simbu kanda kaye kakotoke.

Simbu ya bifulumende bya banu ololo ihwa. Oloni kuli muzimbu waubwa. Mwasa kukoboka omwo kano kaye bakakanyongesa na kukayoya mu Paradaisi hano hasi ngwe mwanakulahesa Njambi. Mu ñanda inatako, tusimutwiya bimunapande kulinga mangana mukayoye omu mu kaye kakaha.