“Woto wã, bɩ y kell n gũ, yãmb sẽn pa mi daarã la wakatã yĩnga.”—MATIYE 25:13.

“Bɩ yãmb kell n gũ la y ra gũs ye. Bala yãmb pa mi wakat ning Wẽnnaam sẽn yãkã sẽn na n yɩ sasa ning ye.” —MARK 13:33.

Dẽnd ned baa a ye pa mi wakat ning takɩ dũni-wẽn-kãngã sẽn na n sa ye. Wẽnnaam yaool n yãka daarã la wakat ning takɩ dũni-kãngã sẽn na n sa wã. (Matiye 24:36) Woto rat n yeelame tɩ d pa tol tõe n bãng dũniyã saab sã n kolgame bɩ? Ayo. A Zeezi yeela a karen-biisã tɩ b na n yãa yɛl buud toor-toor sẽn na n zĩnd tɩ yɩ bãnd n wilg tɩ dũniyã saab ta n saame.

Yɛl nins a Zeezi sẽn sõdgã ra na n yɩɩ bãnd sẽn wilgd “tɩ yaa dũniyã saab wakate.” A yeelame: “Buud na n yika zabr ne buud a to, tɩ rĩung me yik zabr ne rĩung a to. Kom la tẽn-digimdg na n zĩnda zĩig-zĩiga.” (Matiye 24:3, 7) A yeelame tɩ “bã-longds” na n zĩndame. (Luk 21:11) Yãmb nee yɛl nins a Zeezi sẽn togsã sẽn pidsd rũndã-rũndã bɩ?

Rũndã-rũndã, nebã namsda wʋsgo, komã, zabã, tẽn-digimdgã, la bãas buud toor-toorã yĩnga. Wala makre, yʋʋmd 2004, tẽn-digimdg-kãseng n zĩnd mogr ning b sẽn boond tɩ Oseyã ẽndiyẽ wã pʋgẽ, tɩ koomã zẽk n wa kãag nebã rot la a kʋ neb tus 225 000. Yʋʋm a tãab pʋgẽ bala, koronavirisã bã-longdgã kʋʋ sẽn kolg neb milyõ a 7 dũniyã gill zugu. A Zeezi yeelame tɩ yel-kãensã fãa na n yɩɩ bãnd sẽn wilgd tɩ dũniyã saab ta n saame.

Biiblã wilgame tɩ sã n wa ket bilf tɩ dũniyã saab ta, wakat kãng yaa “yaoolem wakate.” (2 Pɩyɛɛr 3:3, 4) Yiib Tɩmote 3:1-5 wã pʋgẽ, b wilgame tɩ yaoolem wakatã, nebã pa na n le tar yel-manesem sẽn yaa sõma ye. (Ges-y zĩ-gũbrã: “ Dũniyã saab sã n wa ket bilf bala.”) Yãmb pa ne tɩ rũndã-rũndã, neb wʋsg yaa rat-m-ye rãmba, yão-be-neba, nen-kɛglem dãmba, la neb sẽn pa nong b taabã sɩda? Woto fãa me wilgda vẽeneg tɩ dũniyã saab ta n saame.

Yaoolem wakatã na n kaoosa wakat a wãna? Biiblã wilgdame tɩ na n yɩɩ ‘wakat bilf bala.’ Rẽ poore, Wẽnnaam na n sãama “neb  nins sẽn sãamd tẽngã.”—Vẽnegre 11:15-18; 12:12.

Wẽnnaam zoe n yãka daarã, la wakat ning a sẽn na n sãam dũni-wẽn-kãngã. (Matiye 24:36) Baa ne rẽ, koe-noog n be. Yaa tɩ Wẽnnaam “pa rat tɩ ned baa a ye sãam ye.” (2 Pɩyɛɛr 3:9) A kõo ninsaalbã weer tɩ b tõe n bao n bãng a raabã la b sak yẽ. Bõe yĩnga? Bala a ratame tɩ d paam n põs dũniyã saab sasa, n vɩɩmd dũni-paalgã pʋgẽ, wakat ning tẽngã sẽn na n lebg arzãnã.

Wẽnnaam gesame tɩ b sõngd nebã, sẽn na yɩl tɩ b bãng b sẽn tõe n maan to-to n wa paam n vɩɩmd dũni-paalgã pʋgẽ, a Rĩungã naam sasa. A Zeezi yeelame tɩ Wẽnnaam Rĩungã koɛɛgã na n moona “dũniyã tɛk fãa.” (Matiye 24:14) A Zeova Kaset rãmbã rɩkda lɛɛr milyaar-dãmb n moond koe-noogã dũniyã gill zugu, la b sõngd nebã tɩ b bãngd Biiblã sẽn yet bũmb ning tɩ wilgdẽ tɩ manegr n watã. A Zeezi yeelame tɩ b na n moona koɛɛgã dũniyã gill zugu, nand tɩ dũniyã saab ta.

Ninsaalbã naam taa a tɛk la bala. La koe-noogã yaa tɩ y tõe n paam n põsa dũni-kãngã saabã sasa, n vɩɩmd tẽngã Wẽnnaam sẽn pʋlem tɩ na n lebga arzãnã zugu. Sõsg ning sẽn pʋgdã wilgda y sẽn tõe n maan to-to n wa paam n vɩɩmd dũni-paalgã pʋgẽ.