“Ngoco vene vingilenu, muomu ka mu tantekeya, cipue litangua, cipue ola.”—MATEO 25:13.

“Zangamenu, vingilenu, muomu ka mu tantekeya ntsimbu ize.”—MAKO 13:33.

Ngeci mukemuo, na umo uahi hano ha mavu a tantekeya mpundu tangua lika ku kotoka ci keza. Vunoni Njambi, ua hangula mpundu ntsimbu, ni nguetu “litangua” na “ola” i ci keza ku kotoka. (Mateo 24:36) Vuno eci ca lomboloka ngecize na mumo mueka mu tu hasa ku linga muahi, linga tu tantekeye nga ku kotoka ci li mu hiehi ni? Houe. Yesu ua lekele vandongesi veni va lavelele ku soloka ca vimo viuma vie ku muesele ngecize ku kotoka ci li mu hiehi.

Viuma via tandangele Yesu, vikevio vie ku puile citantekeyeso ca “ku-kotoka ca mavu.” Yesu ua handekele ngueni: “Cifuti ci ka katukila cifuti, na vuangana ku vuangana; kaha ku ka kala ndzala, na mandunduma a mavu kueka na kueka.” (Mateo 24:3, 7) Kaha ua handekele naua ngueni ku ka kala “misongo ya ku litambuisa.” (Luka 21:11) Vuno nenu mue ku limuena evi viuma via polofetele Yesu ni?

Vindzita, vindzala, mandunduma na mavezi a ku linga na ha meso vui, vie ku yandesa vantu mu mavu ose. Ca ku muenako, mu 2004, limo lindunduma lia kama lia lingisile mema a fume mu kalunga ka Índia na ku tsiha vantu va ku pua 225,000. Mu miaka itatu, musongo ua ku litambuisa ua COVID-19 ua nongesele vantu va ku pua 6,9 milhões, mu mavu ose. Yesu ua handekele ngueni, ku soloka cevi viuma, ci ka pua citantekeyeso ci ka muesa ngecize ku kotoka ci li mu hiehi.

Mbimbiliya ya luka ntsimbu ya hata ku hiehi na ku kotoka ca viuma nguayo: “Matangua a ku sulumuina.” (2 Petulu 3:3, 4) 2 Timoteo 3:1-5, nguauo, ku matangua a ku kotokela, ku vihia ca vilinga via vantu ci ka livuezelela. (Talenu cikasa “ Ntsimbu Kanda ku Kotoka ca Mavu ci Hete.”) Vuno nenu mue ku mona vantu va lilema vakevo vavene, vakua lizangamena, vakua vukenia na vifua vikuavo ni? Evi navio, via pua vifua via muesa ngecize tuli na ku yoyela ku hiehi cikuma na ku kotoka ca mavu.

Vuno matangua a ku kotokela a ka ambata ntsimbu ingahi? Mbimbiliya ya kumbulula nguayo ‘kantsimbu ka kandende lika.’ Kaha Njambi a ka “enieka vaze venieka mavu.”—Ku-Solola 11:15-18 na 12:12.

Njambi ua hangula laza litangua na ntsimbu lia ka neha ku kotoka ca ano mavu a ku vihia. (Mateo 24:36) Vunoni, kuli muzimbu ukuavo ua cili: Njambi “ka hianga ngecize umosi a ka nonge.” (2 Petulu 3:9) Ngeci mukemuo, ali na ku hana ntsimbu ku vantu, linga vononoke ku vitume vieni. Omo lia vika? Muomu a tonda tu kovoke ku mavu ano a ku vihia na ku yoyela mu mavu a aha aze a ka pua citungu.

Njambi ua tumbika cimo cipanga ca ku longesa mu mavu ose, linga a kuase vantu va ka pue mutamba ua mavu a aha a vu ka sika Vuangana vueni. Yesu ua handekele ngecize muzimbu ua cili ua Vuangana vua Njambi, va ka u ambulula “ku vifuti viose.” (Mateo 24:14) Vakaleho va Yehova mu mavu ose, va pangesele viola makulukazi na makulukazi mu ku ambulula na ku longesa vantu muzimbu ua mu Mbimbiliya. Yesu ua polofetele ngecize, eci cipanga ca ku ambulula va ka ci linga mu mavu ose, amba vuose ku kotoka ci keza.

Ntsimbu ya ku sika ca vantu vuovuno i hua. Vunoni muzimbu ua cili uno. Mu ka hasa ku ovoka ku ku nonga ca ano mavu a ku vihia na ku ka yoyela mu mavu a aha, a kulahesa Njambi ngueni a ka pua Citungu. Cimpande ci na hatako ci ka lombolola vi mua pande ku linga, mangana mu ka yoyele mu mavu aco.