“Ngakho-ke hlalani lilindile ngoba kalilazi ilanga kumbe ihola.”—UMATHEWU 25:13.

“Hlalani lilindile, hlalani liphapheme ngoba kalikwazi ukuthi sinini isikhathi esibekiweyo.”—UMAKHO 13:33.

Yikho-ke akulamuntu emhlabeni okwaziyo ukuthi ukuphela komumo lo wezinto kuzafika nini sibili. Kodwa uNkulunkulu ‘ulesikhathi asibekileyo’, ‘ilanga lehola’ lapho ukuphela okuzafika khona. (UMathewu 24:36) Kambe lokhu sekusitsho ukuthi akulandlela esingabona ngayo ukuthi ukuphela sekuseduze? Hatshi. UJesu watshela abafundi bakhe ukuthi bananzelele izinto ezithile ezazizatshengisa ukuthi ukuphela sekuseduze.

Izinto uJesu akhuluma ngazo zazizakuba yisibonakaliso ‘sesiphetho somumo lo wezinto.’ Wathi: “Isizwe sizavukela isizwe, lombuso uvukele umbuso, futhi kuzakuba lokuswelakala kokudla kanye lokuzamazama komhlaba ezindaweni ezehlukeneyo.” (UMathewu 24:3, 7) Waphinda wathi kuzakuba “lemikhuhlane emibi” njalo ememethekayo. (ULukha 21:11) Uyakubona okwakhulunywa nguJesu kugcwaliseka?

Abantu bathwele nzima ngenxa yezimpi, indlala, ukuzamazama komhlaba lemikhuhlane elokhu isiba minengi. Ngokwesibonelo, ngo-2004 kwaba lokuzamazama komhlaba okukhulu e-Indian Ocean okwabangela ukuthi kube le-tsunami eyabulala abantu abangaba ngu-225 000. Ikanti i-COVID-19 yona ibulele abantu abangaba yi-6,9 miliyoni emhlabeni wonke eminyakeni emithathu nje kuphela. UJesu wathi izinto ezinje zazizatshengisa ukuthi ukuphela komumo lo wezinto sekuseduze.

IBhayibhili libiza isikhathi esandulela ukuphela ngokuthi ‘zinsuku zokucina.’ (2 UPhetro 3:3, 4) U-2 Thimothi 3:1-5 uveza ukuthi ezinsukwini zokucina abantu bazakuba babi kakhulu. (Khangela ibhokisi elithi  “Okuzakwenzakala Ukuphela Sekuzafika.”) Uyababona yini abantu abangelandaba labanye, abayizihwaba, abalodlakela labangathandi abanye? Lokhu lakho kutshengisa ukuthi ukuphela sekuseduze kakhulu.

Izinsuku zokucina zizathatha isikhathi esingakanani? IBhayibhili lithi zizathatha ‘isikhathi esifitshane.’ Ngemva kwalokho uNkulunkulu uzachitha “ababhubhisa umhlaba.”—ISambulo 11:15-18, lamabala angaphansi; 12:12.

UNkulunkulu uselibekile ilanga lehola lapho azatshabalalisa khona umumo lo wezinto omubi. (UMathewu 24:36) Kodwa kulezinye futhi izindaba ezinhle. UNkulunkulu “kafisi ukuthi loba ngubani abhujiswe.” (2 UPhetro 3:9) Unika ngamunye wethu ithuba lokuthi afunde ngentando yakhe futhi amlalele. Lokhu ukwenza ngoba efuna sisinde nxa umhlaba lo omubi usubhujiswa futhi siphile emhlabeni omutsha olipharadayisi.

UNkulunkulu uhlele ukuthi abantu bonke bafunde ukuthi bangenzani ukuze baphile emhlabeni omutsha bebuswa nguMbuso wakhe. UJesu wathi izindaba ezinhle zoMbuso kaNkulunkulu zazizatshunyayelwa “emhlabeni wonke.” (UMathewu 24:14) OFakazi bakaJehova emhlabeni jikelele batshumayele futhi bafundisa abantu ngeBhayibhili okwamahola amanengi kakhulu. UJesu wathi umsebenzi lo wawuzakwenziwa emhlabeni wonke ukuphela kungakafiki.

Ukubusa kwabantu sekukomlindi uyacina! Kodwa indaba ezinhle yikuthi ungasinda ekupheleni komhlaba lo njalo uphile emhlabeni olipharadayisi esiwuthenjiswe nguNkulunkulu. Esihlokweni esilandelayo sizaxoxa ngokuthi ungenzani ukuze uphile emhlabeni omutsha.