“Kalei tyipahi, mokonda onwe kamwii nii onthiki nii oola.” — MATEUSI 25:13.

“Tualeiko tyalunguka, tualeiko tyipahi, mokonda omuvo wanakua kamuwii.” — MALUKU 13:33.

Naina tyilekesa okuti petupu omunthu nawike wii onthiki ouye uno mauya okuhanyuako. Mahi Huku “wanakale” “onthiki noola” onthyulilo maiya. (Mateusi 24:36) Mahi otyo katyilekesa okuti, onthue katutyivili okunoñgonoka inkha onthyulilo ili popepi. Sesusi wapopilile ovalongwa vae, vatale nawa ovipuka vilekesa okuti onthyulilo ili popepi.

Sesusi wapopile ovipuka ovinyingi, mavimoneka tyina onthyulilo youye uno iheneye. Ovipuka ovio, ovio ankho mavilekesa okuti onthyulilo ili popepi. Sesusi wapopile okuti: “Otyilongo matyikalwisa otyilongo otyikuavo, ouhamba maukalwisa ouhamba omukuavo. Kovilongo ovinyingi makukamoneka ovinimawe nondyala.” (Mateusi 24:3, 7) Tupu wapopile okuti makumoneka ‘omikihi’ ponomphangu ononyingi. (Luka 21:11) Okuti uhole okumona ovipuka ovio Sesusi apopile?

Hono ovanthu vamona ononkhumbi mokonda yovilwa nondyala novinimawe nomauvela omanyingi. Mongeleka menima lyo 2004 elunga Índico alihandye omaande aipaa ovanthu valamba po 225.000. Momanima etatu omukihi wo Kolona Vilu mouye auho waipaa ovanthu ovanyingi vehungi ponomiliau 6,9. Sesusi wapopile okuti ovipuka ovio, ovio mavilekesa okuti onthyulilo youye uno ili popepi.

Tyina onthyulilo yeheneye, Ombimbiliya ipopia okuti nkhele matukala “mononthiki mbahulilila.” (2 Petulu 3:3, 4) Omukanda 2 Timotiu 3:1-5, upopia okuti kononthiki mbahulila ovanthu kamaveketavela ovitumino vya Huku. (Tala okakasa kati “ Tyina Kuakamba Katutu Opo Onthyulilo Iye.”) Okuti uhole okumona okuti ovanthu mononthiki mbetu vena elungavi, vayondya vakuavo, ovakalavi tupu vetupu oluembia? Otyo natyo tyilekesa okuti tuli konthyulilo youye uno.

Ononthiki mbahulilila mambukala omuvo ulifuepi? Ombimbiliya ipopia okuti mambukala “omuvo uhehi.” Pahe, Huku ahanyeko “vana vahanya ohi.” — Eholololo 11:15-18, okatoi; 12:12.

Huku wanaka-le onthiki noola mahanyeko ouye uno wovivi. (Mateusi 24:36) Mahi tupu Huku “kahande nawike eye okuhanyuako.” (2 Petulu 3:9) Otyo Huku ekahi nokuavelela omuvo kanda munthu, opo elilongese okueendela movitumino viae. Omokonda yatyi? Omokonda uhanda kanda munthu eye okuhupa tyina ameya okuhanyako ouye uno, akakala mouye omupe.

Mouye auho, Huku ukahi nokukuatesako ovanthu okunoñgonoka etyi vesukisa okulinga opo vakakale mouye omupe, maukatuminwa Nouhamba wae. Sesusi wapopia okuti onondaka onongwa Mbouhamba wa Huku mambukaiviswa “kombanda yohi aiho.” (Mateusi 24:14) Onombangi mba Siovaa vaundapa movilinga viokuivisa onoola onombiliau. Vaivisa nokulongesa ovanthu mouye auho etyi Ombimbiliya ipopia. Sesusi wapopile okuti otyilinga otyo matyilingwa kombanda yohi aiho tyina onthyulilo youye uno yeheneye.

Ovatumini vouye uno vena omuvo wehehi. Mahi ove upondola okuhupa tyina ouye uno uhanyuako, okala-ko apeho kombanda yohi ino, mouye omupe Huku alaa. Onthele mailandulako maipopi oityi ove wesukisa okulinga opo ukakale mouye omupe mauya.