Ngimba Ikisu iki Kikuya Pakumalika Ndili? Isi Yesu Ayobile
Bo muno twamanyilile mu nkhani iyi yakindagha, linga Ibaibolo likuyoba isya kumalika kwa kisu, litikusanusya isyakumalika kwa kisu iki tukwikalamo pamo abandu. M’malo mwake, likusanusya isyakumalika kwa findu ifibibi na bandu aba bikubomba ifindu ifibibi. Loli ngimba Ibaibolo likuyoba akabalilo aka ifindu ifibibi ifi fisakumalika?
INONG’ONELA IFUNDO SIBILI ISI YESU AYOBILE ISYAKUFWANA NUBUMALIKISYO:
“Bunobuno lelo amuyeghe maso, namanga mukalimanya ilisiku, kope nakabalilo mukakamanya.”—MATAI 25:13.
“Mwandeghe muye maso buno mukakamanya akabalilo ukuti kisakuyagha ndili.”—MARKO 13:33.
Nayumo pa kisu uyu akamenye akabalilo aka ifindu ifibibi fisakumalika. Loli Kyala abikile “akabalilo” kangi “nisiku” ili ubumalikisyo bukwisilagha. (Matai 24:36) Ngimba isi sikusanusya ukuti yikayapo injila yiliyosa iyakumanya ukuti akabalilo kali pipi? Yilipo. Yesu ababulile abafundiwa bake ifimanyikilo fingi ifi fikunangisya ukuti ubumalikisyo buli pipi.
IFIMANYIKILO
Ifimanyikilo ifi fisakunangisya “ubumalikilo bwa kisu.” Yesu atile: “Ikikolo kisakukisambukilagha ikikolo ikinine, bope nubunyafyale bwisakubusambukilagha ubunyafyale ubunine, yisakuyako injala nutusenyenda mbuyo mbuyo.” (Matai 24:3, 7) Kangi ayobile ukuti kwisakuyagha “imbungo imbela filalilali.” (Luka 21:11) Ngimba lino mukufiketa ifimanyikilo ifi Yesu ayobile ngani?
Amasiku agha abandu bikutamiwa panongwa ya bwite, injala, utusenyenda nimbungo insitakumalika. Mwakifwanikisyo mu 2004, akasenyenda akanywamu kabombiwe mu Indian Ocean kalyandisye tsunami iyi yabaghoghile abandu abakufwana 225,000. Kwa kyinja ni myesi, imbungo ya COVID-19 yaghoghile abandu abakukinda 2.6 miliyoni pa kisu kyosa. Yesu ayobile ukuti ifimanyikilo bo ifi fisakunangisya ukuti ubumalikisyo bwa findu ifibibi buli pipi.
“M’MASIKU GHA KUBUMALIKISYO”
Ibaibolo likulingania isya kabalilo akapimba bo ubumalikisyo bukali ukufika ukuti ‘amasiku gha kubumalikisyo.’ (2 Peteri 3:3, 4) Ilemba lya 2 Timoti 3:1-5 likuti, m’masiku gha kubumalikisyo abandu batisakupilikilagha ifundo inunu. (Keta ibokosi ilyakuti “ Bo Ikisu Kikali Ukumalika.”) Ngimba mukubaketa abandu abakwitufya, abanyonywatosa, aba nkhaza na aba batikunangisya ulughano ku binabo? Ubu bo buketi ubungi ubu bukunangisya ukuti ubumalikisyo bwa kisu buli pipi.
Ngimba amasiku gha kubumalikisyo ghikuya pakwegha akabalilo akatali bulebule? Ukufwana na isi Ibaibolo likuyoba, pikuya pakwegha “akabalilo akapimba” itolo. Ukufuma apo, Kyala isakubapyuta “aba bikukipyuta ikisu.”—Ubusetuli 11:15-18; 12:12.
IKISU KYA PALADAISO KILI PIPI
Kyala abikile ngani akabalilo aka isakumasya ifindu ifibibi nkisu ikibibi iki. (Matai 24:36) Loli ghalipo amasyu amanunu aghakuhobosya—Kyala ‘atikulonda ukuti bamo bapyutiweghe.’ (2 Peteri 3:9) Umwene abapele abandu ulusako ulwakumanyila ifundo syake. Nongwa yafiki? Panongwa yakuti ikulonda ukuti tusapone pabumalikisyo bwa kisu iki nu kwisakwikala nkisu ikipya iki kisakuya paladaiso.
Kyala atendekisye ifimanyilo pa kisu kyosa ukuti fibatule abandu ukumanyila muno bisakukikabila ikisu ikipya mu Bunyafyale bwake. Yesu ayobile ukuti amasyu amanunu agha Bunyafyale bwa Kyala ghisakufumusiwagha “nkisu kyosa.” (Matai 24:14) Pa kisu kyosa, Abaketi ba Yehova bafumwisye amaawala aghakukinda 2 biliyoni mu 2019 nu kumanyisya abandu Amasyu gha mu Baibolo aghakupa ulusubilo. Yesu ayobile ukuti imbombo iyakufumusya iyi yisakubombiwa pa kisu kyosa bo ubumalikisyo bukali ukwisa.
Ubulaghili bwa bandu buli pipi ukumalika. Loli amasyu amanunu gho ghakuti mubaghile ukupona ubumalikisyo bwa kisu iki nu kwisakwikala nkisu kya Paladaiso iki Kyala afingile. Inkhani iyakukongapo yikulingania muno tubaghile ukwisakwikalila nkisu ikipya iki.
Ubusololi bwa Yesu ubwakuyoba isya “masiku gha kubumalikisyo” bukutupa ikifukwa ikyakuyila nulusubilo
