Aea Te Openga e Tae Mai Ei? Ta Iesu i Akakite
Mei ta tatou i kite mai i roto i te atikara mua, me taiku te Pipiria no runga i te openga o teia ao, kare te aiteanga e ka takoreia te enua e te tangata katoa. Mari ra, ka takoreia teia akatereanga kino e te aronga tei turu i te reira. Kua akakite ainei te Pipiria aea e tae mai ei te openga o teia akatereanga kino?
AKAMANAKO E RUA APINGA TA IESU I AKAKITE NO RUNGA I TE OPENGA:
“Kia matakite ia kotou, kare kotou i kite i te rā, e te ora.”—MATAIO 25:13.
“E matakite oki ia kotou, e akamaroiroi, e e pure; kare oki taua tuatau ra i kitea e kotou.”—MAREKO 13:33.
No reira kare e tangata i kite tikai aea te openga o teia akatereanga e tae mai ei. Inara, kua akanoo te Atua i te “tuatau”—te ‘rā e te ora’—kia tae mai te openga. (Mataio 24:36) Ko te aiteanga ainei e kare takiri tatou e kite me kua vaitata mai te openga? Kare. Kua akakite a Iesu ki tana au pipi i te au akairo te ka akapapu mai e kua vaitata te openga.
TE AKAIRO
Teia tetai au akairo e kua vaitata “te openga o teianei ao.” Karanga a Iesu: “E tu mai tetai enua e tamaki mai ki tetai enua, e tetai basileia e tamaki mai ki tetai basileia: e onge oki, e te maki-mate, e ngaruerue te enua i tera ngai, i tera ngai.” (Mataio 24:3, 7) Ka tupu katoa te “maki-mate”—takapini i te ao. (Luka 21:11) Te kite ra ainei koe i teia au mea ta Iesu i taputou?
Te tupu nei te tamaki, te onge, te ngaruerue enua e te au maki rikarika i teia tuatau. Ei akaraanga, i te 2004, kua tupu tetai ngaruerue enua kino tikai i te pae moana Initia e kua akatupu te reira i tetai tsunami tei tamate atu e 225,000 tangata. I roto i te toru mataiti, kua mate atu e 6.9 mirioni tangata mei te maki COVID-19. Karanga a Iesu e me tupu teia au mea, te vaitata maira te openga o teia akatereanga.
“TE AU RĀ OPENGA”
Karanga te Pipiria e ko te tuatau i mua ua ake i te openga, ko “te au rā openga” te reira. (2 Petero 3:3, 4) Akakite a 2 Timoteo 3:1-5, e ka kino atu te tu o te tangata i te au rā openga. (Akara i te pia “ I Mua ua Ake i te Openga o Teia Ao.”) Te kite ra ainei koe i te tu noinoi, karapii e te rotoriri i roto i te tangata i teia tuatau? E akapapuanga katoa teia e te vaitata maira te openga o teia ao.
Eaa te roa o te au rā openga? Karanga te Pipiria e “tuatau poto ua” te reira. E oti ka takore te Atua i te “aronga i mate ei to te ao ra.”—Apokalupo 11:15-18; 12:12.
VAITATA MAIRA TE ENUA PARATAITO!
Kua akanoo takere a Iehova i te rā e te ora kia takore i teia ao kino. (Mataio 24:36) Inara, e nuti meitaki tetai—“kare rava [te Atua] i anoano e kia mate atu tetai.” (2 Petero 3:9) Te oronga nei Aia i te tuatau no te tangata kia ariu mai ki tana aratakianga. Eaa te tumu? No te mea kua inangaro aia kia ora mai tatou mei te openga o teia ao, e kia tae ki roto i tona ao ou, te enua parataito.
Kua akanoo a Iehova i tetai porokaramu apii Pipiria takapini i te ao. Kia apii i te tangata akapeea ratou e tae ei ki roto i te ao ou i raro i te tutara anga a tona Patireia. Karanga a Iesu, ka tutu aereia te nuti meitaki o te Patireia “e kako rava ake te ao katoa nei.” (Mataio 24:14) Takapini i teia ao, kua akapou te Au Kite o Iehova e pirioni ua atu ora no te tutu aere e te apii i te nuti meitaki i roto i te Pipiria. Karanga a Iesu e ka tutu aereia teia karere i te ao katoa i mua ake ka tae mai ei te openga.
Kua vaitata mai te openga o ta te tangata akatereanga. Inara ko te nuti meitaki, ka rauka ia koe kia ora mai mei te openga o teia ao, e kia tae ki te enua Parataito ta te Atua i taputou. Ka uriuri te atikara ka aru mai akapeea koe e tae ei ki roto i tera ao ou.
Kua oronga mai te totou a Iesu no te “au rā openga” i tetai manakonakoanga no tatou
Ka Reka Katoa Koe i Teia
TE PUNANGA TIAKI
Aea te Patireia o te Atua e Tutara ai te Enua?
Inangaro te pipi tiratiratu a Iesu i te kite i te reira. Akapeea aia te pau anga i ta ratou uianga?
PAUANGA PIPIRIA
Eaa te Akairo o “te au Rā Openga,” me kore “te au Tuatau Openga”?
Totou te Pipiria i te au mea e manganui te ka akairo i te au rā openga i te taime okotai.
