“Barranna saate diaffinoonnina jaattine agadhe!”—MAATEWOOSI 25:13.

“[Hirqinoonni] yanna mamooteetiro diaffinoonnina feeffattine agadhe.”—MAARQOOSI 13:33.

Konni daafira, uullate aana tini alame baˈanno yanna afinohu mittuno dino. Ikkollana, Maganu goofimarchu daanno ‘barranna saate’ hirqino woy murino. (Maatewoosi 24:36) Hatto yaa kayinni goofimarchu daara gambisinota anfanni gari horo dino yaateni? Deeˈni. Yesuusi rosaanosi goofimarchu gambisinota leellishshanno ikkito wodanchitanno gede kulinonsa.

Yesuusi kulinoti addi addi ikkito ‘diru goofimarchira malaateho.’ Yesuusi togo yiino: “Gosa gosate aana, gashshootu gashshootu aana ola kayisanno. Addi addi darga hudenna baattote huxano ikkanno.” (Maatewoosi 24:3, 7) Qoleno Yesuusi, “dhibbu” woy taraabbe guddanno fayya daggannota coyiˈrino. (Luqaasi 21:11) Yesuusi balaxe masaalino masaalo woˈmitanna laootto?

Yannankera manna olu, hude, baattote huxanonna xoqolanno dhibbi baasa shetisino. Lawishshaho, 2004nni Hindete Wuqiyanoose giddo baatto baasa huxidheenna kaˈino hombobalatte 225,000 manna shitino. Qoleno sasu diri giddo Koroonu fayya alamete doyichora 6.9 miliyoone ikkanno manna guddino. Yesuusi togoo ikkito alamete goofimarchi gambisinota leellishanno malaate ikkitinota coyiˈrino.

Qullaawu Maxaafi, alamete goofimarchi daara albaanni noo yanna, “goofimarchu yanna” yaanno. (2 Pheexiroosi 3:3, 4) Layinki Ximootewoosi 3:1-5, goofimarchu yannara mannu amanyooti anganni fulannota kultanno. (“ Alamete Goofimarchi Daara Albaanni” yitanno saaxine lai.) Yannankera mannu umosi baxannoha, hafuuraamo, kaajjadonna baxillu nookkiha ikkinota wodanchootto? Tinino alamete goofimarchi lowo geeshsha gambise dayino yannara heeˈnoommota leellishshanno.

Ikkina goofimarchu yanna mageeshsha keeshshitanno? Qullaawu Maxaafi, “shiima yanna” calla keeshshitannota kulanno. Hakkiinni, Maganu “baatto huntannore” hunanno.—Yohaannisi Ajuuja 11:15-18; 12:12.

Maganu tenne busha alame hunanno barranna saate balaxe mure kaino. (Maatewoosi 24:36) Ikkirono, Maganu ‘ayino baˈˈara dihasiˈranno’; tini hagiirsiissannote. (2 Pheexiroosi 3:9) Maganu mannu ooso fajjosi rosse doogonsa biddi assidhanno gede faro fanino. Mayira? Korkaatuno, tenne alame goofimarcho gante saˈne isi abbannote haaro alamera gannate ikkitino baattora heeˈnammora hasiˈranno.

Maganu, mannu Mangistesi giddo haaro alamera heeˈrate maa assa hasiissannonsaro rosanno gede alamete doyichora sabbakate looso loonsanni gede assanni no. Yesuusi Maganu Mangisteha dancha duduwo, “gobba baalate” sabbankannita coyiˈrino. (Maatewoosi 24:14) Alamete doyichora noori Yihowa Farciˈraasine, Qullaawu Maxaafi giddo noo hexxo mannaho kultanninna sabbakkanni lowo biliyoone saate soqqantino. Yesuusi goofimarchu daara albaanni konne sabbakate looso uulla woˈmate aana loonsannita coyiˈrino.

Mannu gashshootira yanna gooffe daggino. Ikkollana, tini alame baˈanno woyite gatte saˈe Maganu qaale eino garinni Gannate ikkitanno uullara heeˈra dandaatto. Aane noo birxichira hattee haaro alamera heeˈrate maa assa hasiissannohero ronseemmo.