„Hën wë mbei mi ta bai unu e, taa be un dë seei kabakaba hiniwanten. Biga wan sabi di juu di mi o toona ko a goonliba.”​—MATEOSI 25:13.

„Hën mbei un musu dë kabakaba këëë ta watji mi. Biga wan sa na un juu mi o ko.”​—MAIKUSI 13:33.

Te u luku dee soni aki, nöö u ta si taa na wan sëmbë a goonliba sabi na un ten di hogi goonliba aki o kaba. Ma Gadu buta di „juu” ku di daka kaa di di kaba o ko (Mateosi 24:36). Di soni aki kë taki taa wa sa ko sabi gbelin ee di kaba zuntu ö? Wë u sa ko sabi di soni aki. Jesosi bi piki dee bakama fëën wantu soni di bi o ta pasa, di bi o lei taa di kaba zuntu.

Dee soni di Jesosi bi taki taa bi o pasa bi o dë di ’maaka taa di ten u dë aki o kaba’. Jesosi bi taki taa: „Di juu dë, nöö wan köndë o hopo go feti ku di woto köndë, wan könu o hopo go feti ku wan woto könu, gaan hangi o ko, goonliba o ta seki, kamian o ta bai ta latja” (Mateosi 24:3, 7). A bi taki söseei taa „taku siki” bi o dë (Lukasi 21:11). I ta si dee soni dee Jesosi bi taki u de, ta pasa a di goonliba u?

A di ten aki sömëni sëmbë ta pena u di feti ta feti, u di hangi pena dë, u di goon ta seki ta latja kamian, söseei u di taku siki dë di ta kii sömëni sëmbë. A di jaa 2004, goon bi seki a di Indische Oceaan sö gaanfa taa wan gaan wata bi ko di bi kii söwan 225.000 sëmbë. Di kolona siki bi kii söwan 6.900.000 sëmbë a hii goonliba a dii jaa dendu. Jesosi bi taki taa dee lö soni aki, de bi o lei taa di kaba u di goonliba aki zuntu.

Te di Bëibel ta taki u dee lasiti daka, nöö a ta taki u di kölö pisiten ufö di kaba u di goonliba (2 Petuisi 3:3, 4). A 2 Timoteo 3:1-5 u ta lesi taa a dee lasiti daka, sëmbë an bi o ta tja deseei a wan fasi di fiti. (Luku di pisi „ Di pisiten ufö di kaba u di goonliba”.) I ta si sëmbë di ta pakisei deseei nöö u? Nasö i ta si sëmbë di abi langahati, di hati u de ta boonu gaanfa, söseei di abi woto fasi di an bunu ö? Dee soni aki seei ta lei taa u ta libi zuntu ku di kaba u di goonliba.

Un longi dee lasiti daka o dë? Di Bëibel ta taki taa a o dë u wan sati pisiten. Baka di dë, Gadu o kii dee sëmbë dee ta poi di goonliba.​—Akoalimbo 11:15-18.

Gadu buta di juu ku di daka kaa ka a o poi di hogi goonliba aki (Mateosi 24:36). Ma wan bunu buka dë. Gadu „an kë fu na wan kodo sëmbë musu lasi kaba a sösö” (2 Petuisi 3:9). Fëën mbei a ta da libisëmbë di okasi u de ko sabi ën, söseei u de du andi a kë. Faandi mbei a ta du di soni aki? U di a kë fuu pasa di kaba u di goonliba aki libilibi, go a di njunjun goonliba di o dë wan paladëisi.

Gadu seeka soni sö taa sëmbë ta peleiki a hii së u di goonliba, u heepi wotowan u de ko sabi andi de musu du ee de kë dë a di tii fëën basu a di njunjun goonliba. Jesosi bi taki taa di bunu buka u di Könuköndë bi o paaja a „hii goonliba” (Mateosi 24:14). Dee Jehovah Kotoigi dee dë a hii së u goonliba ta peleiki milionmilion juu longi ta lei sëmbë soni u Bëibel. Jesosi bi taki taa di wooko aki bi o du a hii di goonliba ufö di kaba ko.

Di tii di libisëmbë ta tii o kaba abiti möön. Ma wan bunu buka dë. I sa pasa di kaba u di goonliba aki libilibi, nöö i sa go a di Paladëisi di Gadu paamusi u taa woo feni.