«Qʼuelan jacan ajyanic porque mi ni oja naex jas ora oj cocon jan ja ba satqʼuinali» (MATEO 25:13).

«Jayuj chapan ajyanic. Qʼuelan jacan ajyanic. [...] porque mi xa naahuex jas ora oj jaconi» (MARCOS 13:33).

Ja yuj mini june ja bʼa Luʼumi wa snaʼa jas mero ora oj jakuk ja xchʼakelal ja Luʼumkʼinali. Pe ja Dyosi stsaʼunejxa jun tyempo, «ja cʼacʼu jahui, soc ja mero yorail» bʼa oj jakuk ja chʼakelali (Mateo 24:36). ¿Wan maʼ stojolan ja it mey jun modo bʼa snajel ta mojanxa ja chʼakelali? Miyuk. Ja Jesús yala yabʼ ja snebʼumaniki bʼa awaj sate jitsan jastik oj ekʼuk bʼa oj xchiktes jelxa mojan ja chʼakelali.

Ja jastik oj ekʼuki jani wa senyaʼan «oj xa cʼot ticʼan ja tiempo jumasa iti». Ja Jesús yala: «Ja lugar jumasa, puro coraja oj yil sbaje. Ja gobierno jumasa oj ochuque pleito [...] Jel oj ajyuc ja huaini, jaxa ba tuctuquil ja lugari, jel oj ajyuc ja templori» (Mateo 24:3, 7). Ja yeʼn cha yala ke oj ajyuk «jitzan chamel» (Lucas 21:11). ¿Wan maʼ xa wila jastal wan kʼotel smeranil ja jas yalakan oj ekʼuk ja Jesús?

Jitsan kristyano wa xwokolaniye yuj smul ja guerraʼik bʼa jel xiwela sbʼaj, ja waʼin, ja terremotoʼik sok ja chamelik bʼa tikʼanxta wa staʼawotik. Jun sjejel, ja bʼa 2004 ekʼ jun tsatsal terremoto ja bʼa océano Índico sok ya ajyuk jun tsunami bʼa smila junuk 225,000 kristyano. Bʼa oxe jabʼil, ja chamel wa spuku sbʼaj ja COVID-19 smila junuk 6,9 millonik kristyano bʼa sutanal ja Luʼumi. Ja Jesús yala ke ja tikʼe jastik junuk it oj xchiktes ke jelxa mojan ja xchʼakelal ja Luʼumkʼinali.

Ja Biblia wa xyala ke yajni ojxa jakuk ja chʼakelal oj ajyuk jun tyempo bʼa oj sbʼiʼiluk ja «tsaʼanikxta kʼakʼu» (2 Pedro 3:3, 4, TNM). Jastalni wa xyala ja 2 Timoteo 3:1-5, ja bʼa tsaʼanikxta kʼakʼu ja kristyanoʼiki mixa oj skis-e ja jastik bʼa toj kujlajeli (kʼela ja rekuagro « Ja yajni ojxa jakuk ja xchʼakelal ja luʼumkʼinali»). ¿Wan maxa wila ke ja kristyanoʼik bʼa jtyempotiki kechanta yeʼn wa xwaj skʼujol sbʼaje, wa spekʼawe chikʼ, wa syajtaye ja takʼin sok wa xyixtalane ja tuki? Ja it cha juni preba bʼa jelxa mojan aytik ja bʼa xchʼakulabʼil ja luʼumkʼinali.

¿Janekʼ tyempo oj albʼuk ja tsaʼanikxta kʼakʼu? Ja Biblia wa xyala ke tʼusan tyempo.  Anto ja Dyos tixa oj xchʼay-el snajel ‹ja matik wan sjomjel ja Luʼumi› (Apocalipsis 11:15-18; 12:12).

Ja Dyosi spilunejxa ja skʼakʼujil sok ja yoraʼil bʼa oj xchʼay-el snajel ja luʼumkʼinal it jel malo (Mateo 24:36). Pe ayto mas: ja Dyosi «Mi huas scʼana ay maʼ oj chʼayuc» (2 Pedro 3:9). Ja yuj wani xyaʼakan bʼa oj jnatik sbʼaj sok la jkʼuʼuktikyi. ¿Jas yuj? Yujni ja yeʼn wa skʼana ke oj ta jsakʼaniltik ja bʼa xchʼakelal ja luʼumkʼinal it sok ajyel sakʼan ja bʼa yajkʼachil luʼumkʼinal oj yijani, jun luʼumkʼinal paxelxa jun kʼachinubʼ.

Ja Dyosi xchapunej jun programa bʼa sjejel bʼa Biblia bʼa sutanal ja luʼumkʼinali bʼa jachuk jpetsaniltik oj bʼobʼ jnebʼtik ja jas tʼilan oj jkʼuluktik bʼa ajyel sakʼan ja bʼa yajkʼachil luʼumkʼinal jaw oj ya mandar ja sGobyerno. Ja Jesús yala ke ja lekil rasonik bʼa sGobyerno ja Dyosi ojni cholxuk «ba spetzanil ja lugari» (Mateo 24:14). Ja taʼumantiʼik bʼa Jyoba bʼa sutanal ja luʼumi wa spilawe mil miyonik oraʼik bʼa xcholjel sok sjejel ja tsamal smajlajel wa xyaʼa ja Biblia. Ja Jesús yala ke ja campaña bʼa xcholjel it ojni kʼulaxuk bʼa sutanal ja Luʼum bʼajtanto oj jakuk ja chʼakelali.

Ja yuj wa xbʼobʼ kaltik, ja gobyernoʼik bʼa luʼumkʼinal it bʼisubʼalxta ja kʼakʼu wa xkanyujile. Pe ja jas tsamal yabʼjeli ojni bʼobʼ kankotik sakʼan ja bʼa xchʼakelal ja luʼumkʼinal it sok ajyel sakʼan ja bʼa kʼachinubʼ skʼapunej ja Dyosi. Ja bʼa artikulo jakumi oj xcholkabʼtik jasa tʼilan oj jkʼuluktik bʼa ajyel sakʼan ja bʼa yajkʼachil luʼum.