“Nukwo murole, baitu timurukumanya kiro nobukakuba akasumi.”​—MATAYO 25:13.

“Mwerindege, murolege, musabege: baitu timumanyire akasumi nambere kalihikira.”​—MARAKO 13:33.

Busaho omuntu wena omu nsi ow’amanyire ekiro kyonyini nambere okuhwerekerra kw’ensi enu embi kuliizira. Baitu, Ruhanga ataireho “akasumi” rundi ‘ekiro kyonyini n’esaaha’ nambere empero eriizira. (Matayo 24:36) Kinu nikimanyisa ngu tiharoho omulingo gwona ogw’okumanya empero obweraaba eri haihi? Nangwa. Yesu akagambira abegeswa be ebintu bingi ebyakwolekere ngu empero iriire haihi.

Ebintu binu byakubaire akokurorraho ‘ak’ensi enu okuhwaho.’ Yesu akagamba ati: “Ihanga liriramagira ihanga, nomukama aliramagira omukama: halibaho ekiihe nemisisa handi na handi.” (Matayo 24:3, 7) Ekindi, akagamba ngu halibaho “norufu” ekirukumanyisa endwaire ezirukuturra. (Luka 21:11) Ebintu binu Yesu ebiyarangire nobirora?

Obulemu obw’amaani, enjara, n’emisisa, otwaliiremu n’endwaire ez’amaani biriyo nibibonabonesa abantu kasumi kanu. Ekyokurorraho, omu 2004, omusisa ogw’amaani ogwabaire omu nyanja enkooto eya Indian Ocean gukaleetaho ekiyaga eky’amaani ekyaisire abantu abarukuhika nka 225,000. Omu kasumi akʼemyaka esatu, oburwaire bwa Korona bwisire abantu abarukuhika nka 6,900,000 omu nsi yoona. Yesu akagamba ngu ebintu nka binu byakwolekere ngu empero y’ensi enu embi iriire haihi.

Baibuli ebazaaho akasumi akaakubaireho empero etakahikire ‘nk’ebiro ebya ha hanyuma.’ (2 Petero 3:3, 4) 2 Timoseo 3:1-5 egamba ngu ebiro ebya ha hanyuma byakumanyiirwe ha ngeso kweyongera kusiisikara. (Rora akasanduuko “Omu Kaire Kake Empero y’Ensi Etakabaireho.”) Norora abantu abarukwoleka okwegondeza bonka, ab’omururu, abakaali, hamu n’engeso ezindi zoona ezitarumu okugonza omu nsi kasumi kanu? Bunu nabwo bwakaiso oburukwoleka ngu empero y’ensi enu embi iriire haihi muno.

Ebiro ebya ha mpero nibiija kumaraho bwire ki? Kusigikirra ha Baibuli, kaliba “akacu kake.” Hanyuma, Ruhanga naija kuhwerekereza “abo abarukuhwerekereza ensi.”​—Okusuku’rwa 11:15-18, 12:12.

Ruhanga amazire ira kuteekaho ekiro n’esaaha nambere alihwerekereza ensi enu embi. (Matayo 24:36) Baitu, haroho amakuru amarungi agarukukiraho​—Ruhanga ‘tarukugonza omuntu wena okuhwerekerra.’ (2 Petero 3:9) Naaha buli muntu wena omugisa ogw’okumwegaho n’okuhondera endengo ze. Habwaki? Habwokuba n’agonza tukireho okuhwerekerra kw’ensi embi kandi twikale omu nsi ye empyaka ey’eriba efookere orugonjo orurungi.

Ruhanga ataireho entekaniza y’okwegesa abantu omu nsi yoona n’okubakonyera kumanya nk’oku basobora kuba kicweka ky’ensi empyaka ey’eri hansi y’Obukama bwe. Yesu akagamba ngu amakuru amarungi agarukukwata ha Bukama bwa Ruhanga gaakutebeziibwe “omu nsi zona.” (Matayo 24:14) Omu nsi yoona, Abakaiso ba Yahwe bamara obuhumbi nʼobuhumbi bwʼesaaha nibatebeza kandi nibegesa abantu obutumwa bwa Baibuli obw’okunihira. Yesu akagamba ngu kampeini enu ey’okutebeza yakukozerwe omu nsi yoona empero etakahikire.

Akasumi k’obulemi bw’abantu kali haihi kuhwaho. Baitu amakuru amarungi gali ngu n’osobora kukiraho empero y’ensi enu embi kandi okaba kicweka ky’abo abaliba omu Orugonjo Orurungi omu nsi Ruhanga orw’araganiize. Ekicweka ekirukuhonderaho nikiija kubazaaho nk’oku osobora kwikara omu nsi egi empyaka.