«Wikʼilukme asitik ta spisil-ora, melel ma naʼbiluk awuʼunik te bin kʼajkʼalil sok te jayeb ora» (MATEO 25:13).

«Kuxulukme awoʼtanik sok wikʼilukme asitik, melel ma naʼbiluk awuʼunik te bin kʼajkʼalil stsaoj te Diose» (MARCOS 13:33).

Liʼ ta Balumilal maʼyuk machʼa ya snaʼ te bin-ora ya xtal te slajibal kʼajkʼale. Yan stukel te Diose yakʼoj jun tiempo, «bin kʼajkʼalil sok te jayeb ora» ya xtal te slajibal kʼajkʼale (Mateo 24:36). ¿Yabal skʼan ya yal-abi te maʼyuk bin-utʼil ya jnaʼtik teme nopolix te slajibal kʼajkʼale? Maʼuk. Te Jesús la yalbey te jnopojeletik te ya xchiknaj señailetik te kʼalal nopolix-a te slajibal kʼajkʼal.

Spisil ini jaʼ te señailetik yuʼun «te slajibal kʼajkʼale». Te Jesús jich la yal: «Yame skontrain sbaik te nacionetik sok yame skontrain sbaik te ajwaliletike, yame xtal tulan wiʼnal sok tulan nijkel ta bayuk» (Mateo 24:3, 7). Jaʼnix jich la yal te ya xtal «tulan chamel» (Lucas 21:11). ¿Yakixbal ta kʼoel ta pasel ya awil te bin la yal te Jesús?

Bayal ants winiketik ya sta swokolik yuʼun te guerraetik, te wiʼnal, te nijkel sok te chameletik. Jich bitʼil ta 2004 te kʼalal kʼax te tulan nijkel ta océano Índico la yakʼ te kʼax te snojel jaʼ, te la smil 225,000 ta tul ants winiketik. Te oxeb jaʼbil, te chamel te COVID-19 la smil kʼaxem ta 6.9 millón ta tul ants winiketik ta swolol Balumilal. Te Jesús la yal te kʼalal ya xkʼax spisil ini, ya yakʼ ta naʼel te nopolix ay te slajibal kʼajkʼal.

Te Biblia ya yal te kʼalal nopolix-a te ya xlaj skʼoplal te bintik chopol ya xkʼax jun tiempo te ya sbiilin te «slajibal kʼajkʼale» (2 Pedro 3:3, 4). Jich bitʼil ya yal te 2 Timoteo 3:1-5 ta slajibal kʼajkʼal ya xjelon stalel te ants winiketike (ilawil te recuadro « Te kʼalal nopolix-a te slajibal kʼajkʼal»). ¿Jichbal ya ata ta ilel te ay sbikʼtal yoʼtan te ants winiketik, te ya xbolobik, te kʼux ta yoʼtanik te takʼin sok te ma kʼux ta yoʼtan te yantike? Jaʼ yan señail te yakotikix ta kuxinel ta slajibal kʼajkʼal.

¿Jayeb tiempo ya xjalaj te slajibal kʼajkʼale? Te Biblia ya yal te ma jalukixe. Jich yuʼun te Dios yame slajin «te machʼatik yakik ta sjinel te balumilale» (Apocalipsis 11:15-18; 12:12).

Te Dios yakʼojix te bin kʼajkʼalil sok te bin-ora ya slajin te bintik chopole (Mateo 24:36). Pero ma jaʼuknax-abi, jaʼnix jich te Dios «ma skʼan te ni jtuluk ya yichʼ lajinel» (2 Pedro 3:9). Jich yuʼun yakʼojbotik tiempo yuʼun ya jnaʼbeytik sba sok te yakuk jchʼuunbeytik te smantale. ¿Binwan yuʼun? Melel jaʼ ya skʼan te manchuk ya kichʼtik lajinel sok te yakuk xkuxinotik ta jun achʼ balumilal te ya xkʼatpʼuj ta nichimal kʼinal.

Te Dios schajpanoj jun nojptesel ta swenta te Biblia yuʼun ya jnaʼtik bin ya skʼan ya jpastik yuʼun ya xkuxinotik ta jun yachʼil Balumilal. Te Jesús la yal te ya «xpujk ta alel ta swolol balumilal» te lek yachʼil kʼop yuʼun te Wentainel yuʼun Dios (Mateo 24:14). Ta swolol Balumilal te testigoetik yuʼun Jehová bayal billón ora nojpteswanik sok la yalik te bin ya yal te Biblia. Te Jesús la yal te ya yichʼ scholel te skʼop Dios ta swolol Balumilal kʼalal mato xtal-a te slajibal kʼajkʼale.

Jich yuʼun nopolix ya yichʼ lajinel spisil te ajwaliletik yuʼun te balumilal. Pero te bin leke jaʼ te ya xjuʼ te kuxul ya xjilotik sok te ya x-ayinotik ta jun Nichimal Kʼinal te yaloj te Diose. Ta yan artículo ya yichʼ alel te bin ya xjuʼ ya jpastik yuʼun ya xkuxinotik ta achʼ balumilal.