«Vikʼiluk-o me asatik, yuʼun mu xanabeik li skʼakʼalile xchiʼuk mi jaʼuk li yoraile» (MATEO 25:13).

«Teuk-o me asatik, vikʼiluk-o me asatik, yuʼun mu xanaʼik kʼusi ora chkʼot li yorail akʼbile» (MARKOS 13:33).

Jaʼ yuʼun, mu buchʼu snaʼ bakʼin chtal li slajebal kʼusitik oy ta balumile. Pe li Diose yakʼojbe xa «skʼakʼalil xchiʼuk yorail» bakʼin chtal li slajebale (Mateo 24:36). ¿Mi jaʼ skʼan xal ti mu kʼuxi xuʼ jnaʼtik bakʼin chtal li slajebale? Moʼoj, li Jesuse laj yalbe yajchankʼoptak ti oy kʼusitik chkʼotanuk ta pasel ti jaʼ svinajeb ti poʼot xa xtal li slajebal kʼakʼale.

Li kʼusitik chkʼot ta pasele jaʼ senyail ti jutuk xa skʼan xichʼ lajesel li kʼusitik oy ta balumile. Xi laj yal li Jesuse: «Chlik skontrain sbaik jujun mukʼta jteklum, chlik skontrain sbaik ajvaliletik, chtal viʼnal xchiʼuk ch-echʼ nikel ta buyuk noʼox» (Mateo 24:3, 7). Laj yal xtok ti chtal tsatsal chameletike (Lukas 21:11). ¿Mi xavil ti yakal xa chkʼot ta pasel li albil kʼop laj yal Jesuse?

Avie, oy epal krixchanoetik yakal chil svokolik ta skoj paskʼop, viʼnal, nikeletik xchiʼuk jeltos chameletik. Jech kʼuchaʼal li ta 2004, echʼ tsunami ta skoj li tsatsal nikel ti echʼ li ta mukʼta nab Indicoe, la smil te van 225,000 krixchanoetik. Jech xtok, ta oxib jabile, li coronaviruse (COVID-19) cham yuʼun mas ta 6.9 miyon krixchanoetik ta spʼejel balumil. Li kʼusitik chkʼotanuk ta pasel taje, yaloj xa onoʼox Jesus ti jaʼ svinajeb ti jutuk xa skʼan slajebal li kʼusitike.

Li Vivliae chalbe skʼoplal ti kʼalal jutuk xa ox skʼan xlaj li kʼusitik ta balumile, oy kʼuuk sjalil ti chichʼ biiltasel kʼuchaʼal «slajebal xa [kʼakʼal]» (2 Pedro 3:3, 4). Jech kʼuchaʼal chal li 2 Timoteo 3:1 kʼalal ta 5, li ta slajebal kʼakʼale, tsok tajek stalelal li krixchanoetike (kʼelo li rekuadro « Kʼalal jutuk xa ox skʼan xtal li slajebal balumile»). Li krixchanoetike tskʼan sba stukik, tsmaj sbaik, batem ta yoʼontonik takʼin xchiʼuk chilbajinik li yantike, ¿mi mu jechuk chavil? Taje jaʼ sprevail ti jutuk xa tajek skʼan xichʼ lajesel li balumile.

¿Kʼu sjalil chjalij li slajebal kʼakʼale? Li Vivliae chal ti muʼyuk mas chjalije. Vaʼun, li Diose tslajes «li buchʼutik yakal tsokesik li balumile» (Apokalipsis 11:15-18; 12:12).

Li Diose yakʼojbe xa skʼakʼalil xchiʼuk yorail ti tslajesbe skʼoplal li kʼusitik chopol oy ta balumile (Mateo 24:36). Pe «mu skʼan ti oy buchʼu xbat ta lajelal junuke» (2 Pedro 3:9). Jaʼ yuʼun, chakʼbutik to yorail ti xkojtikintik xchiʼuk ti jchʼunbetik smantale. ¿Kʼu yuʼun? Yuʼun tskʼan ti kuxuluk xijkomutik mi laj yichʼ lajesel li balumile xchiʼuk ti xijnakiutik ta jun achʼ balumil ti kʼatajem xa ta paraisoe.

Li Diose xchapanoj jun chanubtasel sventa jnaʼtik kʼusi xuʼ jpastik sventa xijkuxiutik li ta achʼ balumil ti jaʼ tsventain li Ajvalilal yuʼune. Xi laj yal li Jesuse: «Li lekil aʼyejetik ta sventa li Ajvalilale ta xichʼ cholel ta spʼejel balumil» (Mateo 24:14). Li ta 2019, li stestigotak Jeova ta spʼejel balumile la xcholik mantal mas ta smiyonal xa noʼox oraetik xchiʼuk la xchanubtasik krixchanoetik ta sventa li spatobil oʼontonal chakʼ Vivliae. Li Jesuse laj yal ti chichʼ cholel li lekil aʼyejetik ta spʼejel balumil kʼalal skʼan to xtal li slajebale.

Chapbil xa skʼakʼalil bakʼin chichʼ lajesel li ajvaliletik liʼ ta balumile. Pe li lekil aʼyeje jaʼ ti xuʼ kuxul xijkomutik mi laj yichʼ lajesel li balumile xchiʼuk ti xijkuxiutik ta jun paraiso ti yaloj chakʼ li Diose. Li ta yan xchanobile, chal kʼusi xuʼ jpastik sventa xijkuxiutik li ta achʼ balumile.