“Dzulani no fhaṱuwa ngauri a ni ḓivhi ḓuvha na tshifhinga.”—MATEO 25:13.

“Dzulani no fhaṱuwa ngauri a ni ḓivhi uri tshifhinga tsho vhewaho tshi lini.”—MARKO 13:33.

Ngauralo, a hu na muthu na muthihi kha ḽifhasi ane a ḓivha uri ḽino shango ḽi ḓo fheliswa lini. Naho zwo ralo, Mudzimu o vhea “ḓuvha na tshifhinga” zwine vhufhelo ha ḓo ḓa ngazwo. (Mateo 24:36) Naa izwi zwi amba uri ri nga si kone u ḓivha musi vhufhelo vhu tsini? Hai, ri nga zwi ḓivha. Yesu o vhudza vhafunziwa vhawe uri vha ṱhogomele zwiitea zwo vhalaho zwe zwa vha zwi tshi ḓo sumbedza uri vhufhelo vhu tsini.

Zwenezwo zwiitea zwo vha zwi tshi ḓo ri thusa u vhona uri “vhufhelo ha shango” vhu tsini. Yesu o ri: “Lushaka lu ḓo lwa na luṅwe lushaka na muvhuso wa lwa na muṅwe muvhuso, ha vha na nḓala, ha vha na midzinginyo fhethu hunzhi.” (Mateo 24:3, 7) O dovha a amba uri ho vha hu tshi ḓo vha na “malwadze” o phaḓalalaho. (Luka 21:11) Naa ni khou vhona zwe Yesu a zwi porofita zwi tshi khou itea?

Ṋamusi vhathu vha khou tambudzwa nga dzinndwa, nḓala, midzinginyo na malwadze a sa fheli. Sa tsumbo, nga 2004 ho vha na mudzinginyo muhulwane lwanzheni lwa India we wa ita uri hu vhe na tsunami ye ya vhulaya vhathu vhane vha nga lingana 225 000. Nga miṅwaha miraru, vhulwadze ha COVID-19 ho vhulaya vhathu vha ṱoḓaho u vha miḽioni dza 6.9 ḽifhasini ḽoṱhe. Yesu o amba uri zwenezwi zwiitea zwo vha zwi tshi ḓo sumbedza uri ḽino shango ḽi tsini na u fheliswa.

Bivhili i ṱalusa uri tshifhinga tsha musi vhufhelo vhu tsini tshi vhidzwa ‘maḓuvha a vhufhelo.’ (2 Petro 3:3, 4) U ya nga 2 Timotheo 3:1-5, maḓuvhani a vhufhelo vhathu vho vha vha tshi ḓo tshila nga nḓila i si yavhuḓi. (Sedzani bogisi “ Zwine Zwa Ḓo Itea Musi Vhufhelo Ha Shango Vhu Tsini.”) Naa ano maḓuvha ni vhona vhathu vhane vha ṱoḓa u ḓivhuyedza, vha re na tseḓa, vha mavemu na vhane vha si fune vhaṅwe vhathu? Na zwenezwi zwi sumbedza uri ri tou vha tsini-tsini na u fheliswa ha shango.

Maḓuvha a vhufhelo a ḓo dzhia tshifhinga tshingafhani? Bivhili i amba uri a ḓo dzhia “tshifhinga tshiṱuku.” Ndi hone Mudzimu a tshi ḓo fhelisa “vha tshinyadzaho ḽifhasi.”—Nzumbululo 11:15-18; 12:12.

Mudzimu o no vhea ḓuvha na tshifhinga tshine a ḓo fhelisa ngatsho ḽino shango. (Mateo 24:36) Naho zwo ralo, hu kha ḓi vha na mafhungo maḓifha. Mudzimu “ha ṱoḓi na muthihi a tshi fheliswa.” (2 Petro 3:9) U khou ri fha tshibuli tsha uri ri gude nga hae na u thetshelesa zwine a amba. Ndi ngani? Ngauri u ṱoḓa ri tshi ponyoka musi ḽino shango ḽi tshi fheliswa na uri ri tshile kha shango ḽawe ḽiswa musi ḽifhasi ḽi pharadiso.

Mudzimu u khou ita uri vhathu vhoṱhe vha gudiswe uri vha nga vha hani tshipiḓa tsha shango ḽiswa ḽine ḽa ḓo vha fhasi ha Muvhuso wawe. Yesu o amba uri mafhungo maḓifha a Muvhuso wa Mudzimu o vha a tshi ḓo ḓivhadzwa “ḽifhasini ḽoṱhe.” (Mateo 24:14) Ṱhanzi dza Yehova ḽifhasini ḽoṱhe vha fhedza awara dza dzibiḽioni vha tshi khou huwelela na u funza vhathu mulaedza u bvaho Bivhilini u ṋeaho fhulufhelo. Yesu o amba uri wonoyo mushumo wa u huwelela wo vha u tshi ḓo itwa kha ḽifhasi ḽoṱhe musi vhufhelo vhu sa athu u ḓa.

Mivhuso ya vhathu i tsini na u fheliswa. Fhedzi zwi takadzaho ndi uri ni nga ponyoka musi ḽino shango ḽi tshi fheliswa, na tshila kha ḽifhasi ḽa Pharadiso ḽe Mudzimu a ḽi fhulufhedzisa. Kha thero i tevhelaho, ri ḓo amba nga ha zwine na nga zwi ita uri ni tshile kha ḽeneḽo shango ḽiswa.