«Nanísi colguiguaʼ, portín diti nanto pu dzú né pu ór gacni» (MATEO 25:13).

«Nanísi colguiguaʼ, colguiguaná, portín diti nanto pu ór gacni» (MARCOS 13:33).

Ni toib ni noʼ ló Gudxlio diti nan pu dzú guinitló gudxliogoxreʼ. Per Dios ma goniʼ «pu dzú né pu ór» guidxin fin (Mateo 24:36). ¿Radudy ndeʼ diitz que diti labúu ganno que ma noʼni gax la? Yaca. Jesús gochbu xpiimbu que nabiʼ guirá cós ni cayac par nadudyibu cuent que fin ma noʼni gaxtiguié.

Guirá ndeʼ naslooyni que «mápa mer guinitló gudxliogoxreʼ». Jesús goniʼ: «Gudxrop né gudxrop sadíil né gobierno láaca sacaló saʼ gobierno» (Mateo 24:3, 7). Láaca goniʼbu que sioʼ «galguitz ni ragaity xidalguixo buñ» (Lucas 21:11). ¿Cabiʼlo ximod cayac cumplir profecía ni goniʼ Jesús la?

Xidal buñ racalóyibu galnagan xtol guerr, xtol galrralán né xtol xo rodann né xtol galguitz ni canás buñ guirága ór. Por ejemplo, ló íz 2004 toib xo rodann buny que nabix nisdaʼ né bigaityni midid 225.000 buñ. Diti bisaʼ tobiz, galguitz COVID-19 bigaityni midid 6,9 millón de buñ ló guidopynac Gudxlio. Jesús goniʼ que guirá ni cabiʼno naslooyni lóono que fin ma noʼni gaxtiguié.

La Biblia ná que antes de guidxin fin sioʼ toib tiemp ni gac laa «dzú ni ma guidubylagaʼ» (2 Pedro 3:3, 4). Mod ná 2 Timoteo 3:1-5, ló dzú ni ma guidubylagaʼ nigolú sioʼ buñ mal (bibiʼ cuadriyen ni laa, « Órni mápa mer guinitló gudxliogoxreʼ»). ¿Rabiʼlo que buñ ni noʼ ló naareʼ rioʼyibu galrrasaʼ por láasiyibu, ronynayibu stipnés, ronladxyibu bidxiich, né diti ragobioyibu buñ la? Ndeʼ nac stoib prueby que mápa mer guidxin fin xtuny gudxliogoxreʼ.

¿Balac gacla dzú ni ma guidubylagaʼ? La Biblia ná que diti saclani. Ór cú Dios sanitló guirá «buñ ni caxin ló Gudxlio» (Apocalipsis 11:15-18; 12:12).

Dios ma nan xi dzú né pu ór guinitlóbu guirá cós mal ni cayac (Mateo 24:36). Per noʼ stoib cós, Dios racladx que ni toib buñ guinitló (2 Pedro 3:9). Cadudybu oportunida guiráno guimbuno né guisobno láabu. ¿Xigony? Portín racladxbu guilaano órni guinitlóbu gudxliogoxreʼ né guibanyno ló Gudxlio móz ni gonybu, toib lagary sacróyen.

Dios ma buny organizar toib programa ni sieed ló la Biblia par gacnébu buñ gan xi labúu gonyibu par labúu cuésyibu ló toib lagary sacróyen ro gony mandary Gobierno xtunybu. Jesús goniʼ: «Buñ saniʼ diitz sacró xtuny Gobierno ló guidopynac gudxlio» (Mateo 24:14). Testigos xtuny Jehová ni noʼ ló guidopynac Gudxlio, goniʼyibu xtiitz Dios né bisuidyibu buñ xidal millón de ór. Jesús goniʼ que diitz sacró reʼ naniʼ buñ láani ló guidopynac Gudxlio antes de nadxin fin.

Ló chop tzónsi diitz, gobiernos ni noʼ ló Gudxlio mápa mer sanitlóyibu. Per noʼ toib notísy galán, labúu guilaano órni guinitló gudxliogoxreʼ né guibanyno ló toib Gudxlio móz ni ma goniʼ Dios guidudy lóono. Ló artículo ni sieed sabexani xi raquiin gonyno par labúu guibanyno ló Gudxlio móz.