Miˬyehˇ gʼawˬ myahˇ maˬ gʼeh˗ehˇ yaw haiˬ yaw doeˇ deuˬ hawˇ˗eu shaˬ zahˬ dawˬ tawˆ luꞈ˗ahˇ laˆ byoˆ jiˇ meh lehˇ, aˬ dui dzeuˇ yaꞈ˗euˬ kawˆ˗ahˇ ya siˬ˗euˬ ma. Gaˇ kawˆ heu maˇ diˇ pyeuꞈ laˇ meh lehˇ aˬ dui jah nya meh. Aˬ jeˬ miˇ neh nga? Miˬyehˇ˗euˬ dawˬ pyeuꞈ˗eu Jaˇliꞈ laꞈ kʼoeˇ heu loꞈ˗ehˇ saˇ jaˇ dzaˬ taˬ˗euˬ meh.

‘Miˇ tsaˬ heu ya byoˆ˗iˇ jiˇ tehꞈ˗a.’—1 Yoˇhaˬ 2:17.

Ehˇ kʼawꞈ teu˗ahˇ neh buˬ˗iˇ law˗iˇ˗eu tsawˇ haˬ jawˇ˗eu yaw duˬ baw meh. Aˬ jeˬ miˇ neh ehˇ naˇ, Jaˇliꞈ heu deuˆ laꞈ kʼoeˇ heu loꞈ˗ehˇ jiˇ saˇ jaˇ dzaˬ taˬ˗euˬ meh.

“Miˬyehˇ˗euˬ nui kʼahˇ mˇ˗eu tsawˇ haˬ˗aˬ, mˬ maˬ maˬ byaˆ zaˇ ziˇ ya dehꞈ tehꞈ˗a.”

Teu miˇ neh aˬ dui buˬ˗iˇ law˗iˇ nya˗eu gʼaˇ duˬ, Miˬyehˇ˗euˬ nui kʼahˇ ya mˇ˗eu meh. Miˬyehˇ˗euˬ nui kʼahˇ mˇ nya˗eu gʼaˇ duˬ, aˬ yawꞈ˗ahˇ jeˬ hu ya siˬ nya˗eu meh.

‘Nawˇ tiˬ gʼaˬ tehꞈ˗ehˇ maˇ maˇ ni Miˬyehˇ meh lehˇ siˬ nya˗eu kʼoeˇ˗aˬ, mˬ maˬ maˬ byaˆ zaˇ ziˇ dehꞈ˗eu jeˬ pyeuꞈ˗eu meh’ lehˇ Yeˬsuˇ ehˇ˗eu meh. (Yoˇhaˬ 17:3) Miˇ tsaˬ heu siˬ˗ahˇ laˆ cawˆ ngeh, aˬ dui buˬ˗iˇ law˗iˇ˗awˇ, mˬ maˬ maˬ byaˆ zaˇ ziˇ dehꞈ nya˗eu gʼaˇ duˬ, Miˬyehˇ˗ahˇ ya “siˬ nya˗eu” meh. Heu naˇ Miˬyehˇ jawˇ meh lehˇ jah˗awˇ, aˬ yawꞈ˗euˬ gaˇ kawˆ˗ahˇ ui cuiˆ na tehꞈ˗ehˇ siˬ nya gaˇ ehˇ mawꞈ˗eu maˬ ngeuˇ˗a. Aˬ dui aˬ yawꞈ nehˬ˗ehˇ cawˬ ya cawˬ˗eu meh. Tiˬ gʼaˬ paˬ nehˬ˗ehˇ gʼoeˇ nya˗eu gʼaˇ duˬ, tiˬ gʼaˬ tiˇ gʼaˬ aˇ yamˬ ya biꞈ˗eu loꞈ˗ehˇ, Miˬyehˇ nehˬ˗ehˇ cawˬ cawˬ˗eu jeˬ jiˇ teu gaˇ duˇ˗eu meh. Aˬ dui Miˬyehˇ nehˬ˗ehˇ cawˬ cawˬ nya laˇ˗awˇ, aˬ yawꞈ nehˬ˗ehˇ gʼoeˇ daˆ leꞈ nya˗eu gʼaˇ duˬ, aˬ joˆ˗ehˇ ya jahˇ˗eu nga lehˇ Jaˇliꞈ mehˬ˗eu tiˬ jeˬ na˗ahˇ haw ma.

Aˬ dui yaw dehꞈ dehꞈ nya˗eu gʼaˇ duˬ, yawˬ nah na luꞈ ya dzaˬ ya dawˇ˗eu meh. Ehˇ kʼawꞈ “dzaˬ˗eu jeˬ baˬ da neh tehꞈ˗ehˇ tsawˇ haˬ zaˬ yaw dehꞈ dehꞈ nya˗eu maˬ ngeuˇ˗a. Miˬyehˇ˗euˬ kʼaˬ meh˗ahˇ neh kʼaˇ doˆ le˗euˬ dawˬ yawˬ dawˬ na luꞈ baˬ da neh dehꞈ nya˗eu meh” lehˇ Yeˬsuˇ ehˇ˗eu meh.—Maꞈtehˬ 4:4.

Miˬyehˇ˗euˬ dawˬ Jaˇliꞈ laꞈ kʼoeˇ ahˇ˗eu meh. Aˬ dui Jaˇliꞈ gui naˇ dzeuˇ yaꞈ ngeh Miˬyehˇ tsawˇ haˬ zaˬ˗euˬ gʼaˇ duˬ aˬ jeˬ jeˇ mˇ nehˬ˗awˇ, nymˬ˗mˇ aˬ jeˬ jeˇ mˇ nehˬ luꞈ˗eu lehˇ ya siˬ˗eu uˬ taꞈ, mehˬ hu paw aˬ jeˬ jeˇ mˇ nehˬ˗eu lehˇ jiˇ ya siˬ˗eu meh.

Aˬ dui Miˬyehˇ˗euˬ ehˇ dawˬ naˇ haˬ mawꞈ kʼawꞈ, Miˬyehˇ maˬ ya leˇ˗eu jeˬ˗ahˇ maˬ byehˇ nya ni pyeuꞈ luꞈ naˇ aˬ joˆ˗ehˇ ya jahˇ˗eu nga? Aˬ dui Miˬyehˇ˗ahˇ yaw muiˬ˗ehˇ siˬ nya˗eu heu naˇ, aˬ yawꞈ maˬ ya leˇ˗eu jeˬ˗ahˇ byehˇ nya ni caw ba nehˬ laꞈ˗eu meh.

Saˬkuꞈlaˬ lehˇ kuˇ˗eu zaˬ miˬ aˬ buˇ tiˬ gʼaˬ˗euˬ gaˇ kawˆ˗ahˇ shaˇ noeˬ haw sheˇ. Aˬ yawꞈ dehꞈ bahˬ dehꞈ muˆ˗euˬ tiˬ gʼaˬ pyeuꞈ meh. Ehˇ kʼawꞈ Jaˇliꞈ dzaw laˇ ngeh “aˬ cawˬ nehˬ˗ehˇ joe˗eu jeˬ˗ahˇ gʼawˬ tsehˆ tsehˆ˗awˬ” lehˇ ehˇ˗eu Miˬyehˇ˗euˬ dawˬ˗ahˇ ya siˬ˗euˬ meh. (1 Gawˇliˬtu 6:18) Teu miˇ neh aˬ yawꞈ mˇ luꞈ˗eu jeˬ teu˗ahˇ byehˇ nya ni gʼaˬ biꞈ nehˬ laꞈ lehˇ Miˬyehˇ˗ahˇ guiˬ lahˬ shaˇ˗euˬ meh. Ehˇ kʼawꞈ aˬ yawꞈ lawˬ haw laˇ˗eu jeˬ teu˗ahˇ gʼaˬ leˇ ni ya leh jeh luꞈ˗a siˬ. Aˬ yawꞈ “Dehꞈ bahˬ dehꞈ muˆ˗eu jeˬ˗ahˇ noeˬ doˆ laˇ ngeh, heu ngaˇ tehꞈ˗ehˇ maˬ gʼaˬ leˇ nya lehˇ Yeˬhawˇbaˬ˗ahˇ guiˬ lahˬ shaˇ˗awˇ dawˇ coe ni ehˇ nehˬ˗eu ma. Guiˬ lahˬ shaˇ˗eu heu naˇ, Miˬyehˇ˗euˬ baoˬ za˗awˇ Miˬyehˇ nehˬ˗ehˇ gʼoeˇ leˇ ni caw ba nehˬ laꞈ nya” lehˇ ehˇ˗eu meh. Saˬkuꞈlaˬ tehꞈ˗ehˇ maˬ ngeuˇ˗eu tsawˇ haˬ gʼawˬ mya lam gʼaˬ, Miˬyehˇ˗ahˇ siˬ nya laˇ˗euˬ meh. Aˬ yawꞈ maꞈ dehꞈ poˆ dehꞈ paˇ nya˗awˇ, Miˬyehˇ nui kʼahˇ shiˇ˗eu jeˬ mˇ nya ni, Miˬyehˇ aˬ yawꞈ maꞈ˗ahˇ gʼaˬ biꞈ nehˬ˗euˬ meh.—Piˇliˇpiˆ 4:13.

Nawˇ Miˬyehˇ˗ahˇ ngehˬ˗ehˇ siˬ nya laˇ naˇ ngehˬ˗ehˇ ‘Miˬyehˇ nawˬ˗ahˇ siˬ nya˗euˬ meh.’ Nawˇ aˬ yawꞈ˗euˬ gʼoeˇ˗eu cawˬ tiˬ gʼaˬ pyeuꞈ laˇ nya meh. (Gaˬlaˬtiˆ 4:9; Ja ceuˬ 25:14) Toˆ˗ehˇ naˇ nawˇ ka kʼoꞈ˗eu jeˬ za nya˗awˇ, Miˬyehˇ˗euˬ miˇ shuiꞈ˗ahˇ ya ahˇ leˇ˗eu meh. Miˇ shuiꞈ aˬ joˆ˗ehˇ gʼeh˗eu nga? Nyaˆ taꞈ kawˆ˗ahˇ ja sawˇ nehˬ taˬ˗euˬ meh.