Kunnasi Ka Makapattolay ta Bagu nga Mundo?
Nammuattam ta nappasa ira nga artikulo nga aranni ngana nga panuppalan na Dios i marake nga totolay anna i ngamin nga problema. Siguradu ittam nga matuppal yaw megafu ta nipromesa na Uvovug na Dios, i Biblia:
“Mapawan i mundo.”—1 JUAN 2:17.
Makasiguradu ittam nga egga danuri mapaliag megafu ta kinagi gabbalaman natun nga teksto:
“I mamarulo ta uray na Dios ay mattolay adde noka.”
Nu kunnari gafu, mawag nga kuattam i uray na Dios tapenu mepaliag ittam. Tapenu mammuattam i uray na Dios, mawag tu makilala tam labbi yayya.
MAPALIAG KA TA PANUPPALAN GUKABAN NA “PAKANNAMMU” TA DIOS
Kinagi ni Jesus: “Yaw i inango nga adde ta ngangangay: i pakannammu da tu sikaw i tattadday nga kurug nga Dios.” (Juan 17:3) I “pakannammu” ta Dios i kawagattam tapenu mepaliag ta panuppalan anna mattolay tu mannanayun. Ari na kayà kagian nga basta kurugattam nga egga i Dios onu ammu tam i pilippiga meyannung nisa. Mawag tu makikkofuttam nisa. Tapenu maddukko ittam ta kokkofuttam, mawag tu iddattam ira tu tiempo. Kunnatun gapa i kuattam tapenu maddukko ittam ta Dios. Ammuan i nabalor ira nga kinakurug ta Biblia tapenu mabbalin ittam tu kofun na Dios anna maddukko ittam nisa.
KADAGGAW NGA BIBBIGAN I UVOVUG NA DIOS, I BIBLIA
Mawag nga kanayuttam kuman tapenu matolay. Ngem kinagi ni Jesus: “Ari laman tu pan i pakkatolay na tolay, ngem mawag na ngamin i uvovug nga maggafu ta Dios.”—Mateo 4:4.
Sangawe, malegattam ta Biblia i uvovug ira ni Jehova. Ta paggigiammum tatun nga sagradu nga libru, mammuammu i kiningngua na Dios, i maddaggun nga kukukuan na, anna i kuan na ta mappange.
IPAKIMALLO I UFFUN NA DIOS
Anni i kuammu nu ikaya mu gapa nga tuttulan i Dios ngem awayya na nga marigatakka nga iyemmang i gannug ira nga kondenan na? Nu kunna i situasiommu, makaduffun nu ammammum tu mapia i Dios.
Ammuattam i nesimmu ta tadday nga babay nga agalattam tu Sakura nga imoral i pattolena. Turi ta naggigiammu yayya tu Biblia, nagigiammu na i bilin na Dios nga ‘ibita i maggannug.’ (1 Corinto 6:18) Nakkiddaw si Sakura ta Dios tu sikan tapenu meyemmang na i marake nga kukukuan na. Ngem kawagan na lagapa nga labanan i tentasion ira. Kinagi na: “Nu makanono ngà tu imoral ira nga gannug, ivuvvu ku i ngamin kani Jehova ta pakimallo megafu ta ammù nga ariakku malabanan yaw nu so laman. Megafu ta pakimallo, naddukko ngà kani Jehova.” Kagitta ni Sakura, minillion nga totolay i maggiggigiammu tapenu mammammu da i Dios. Iiddan na ira tu sikan tapenu mawayya da nga manguli anna makapattolay ira tu makapagayayya ta Dios.—Filipos 4:13, NW.
Nu ammammum tu mapia i Dios, ammammu naka gapa tu mapia bilang nabalor nga kofun na. (Galacia 4:9; Salmo 25:14) Nu kunna, awayyam gapa i mepaliag tapenu makapattolay ka ta bagu nga mundo. Ngem kunnasi kari i bagu nga mundo? Ipakanawag na tumunug nga artikulo.
a Jehova i ngagan na Dios nga nepakannammu ta Biblia.