Wa Yu Fi Du Fi Get Fi Liv Iina Di Nyuu Worl?

PLIE

Wi jos si se Gad a-go get rid a aal a di wikid piipl dem an aal a di wikid sitn dem we a gwaan iina da worl ya. Wa mek wi shuor se dat a-go apm? Kaa Gad Wod se so. It se:

“Di worl an aal a di wikid sitn dem iina it a go we.”—1 JAN 2:17.

Wi nuo fi shuor se a no evribadi a-go ded aaf kaaz di ada paat a di vors se:

“Aal a di piipl dem we du we Gad waahn dem fi du wi liv fi eva.”

So ef wi waahn fi liv fi eva, wi afi mek shuor se wi du wa Gad se wi fi du, an fi du dat wi afi nuo Gad.

EF WI WAAHN FI LIV WEN DA WORL YA DON, WI AFI GET FI “NUO” GAD

Iina Jan 17:3 Jiizas se: “Fi liv fi eva miin se dem nuo yu, di onggl wan we a riili Gad.” So fi get fi liv fi eva wen da worl ya don, wi afi nuo Gad. Bot dat no miin se wi jos nuo se im de bout an nuo wan an tuu tingz bout im. Wi an im afi ton gud gud fren. Tingk bout dis, ef yu waahn yu an yu gud gud fren fi stie kluos tu unu wan aneda, duohn yu afi spen taim wid dem? A sed wie so it go wid Gad. Mek wi luk pan som a di sitn dem we de iina di Baibl we kyan elp wi fi ton fren wid Gad an kip kluos tu im.

Di Sitn Dem We Wi Lorn Fram Di Baibl

Wi get fi nuo se Gad did mek wi fi liv iina Paradais.

Gad did mek Adam an Iiv an put dem iina wan priti priti gyaadn niem Iidn. Dem did porfek, an Gad gi dem evriting we dem kuda eva waahn fi liv wan api laif. So langks dem an Gad did a fren, dem kuda get fi liv fi eva. Bot dem neva lisn tu Gad, an dem du sitn we dem neehn fi du.

Wi get fi nuo wa mek wi a sofa so moch.

Kaa Adam neehn du wa Gad tel im fi du, im neehn get di chaans fi liv fi eva, an a so kom wi en op a ded. Iina Ruoman 5:12 di Baibl se: “A wan man kaaz sin fi kom iina di worl, an a da man de sin kaaz im fi ded. An siem ou it go wid im a siem so it go wid evribadi.” Jos laka ou wan mada ar wan faada mait-a av sitn rang wid dem, an dem pikni en op baan wid it, a siem so aal a Adam pikni dem baan wid sin. An kaaz a dat, wi get uol an wi ded.

Wi get fi nuo wa Gad du fi wi aredi.

Di Baibl se: “Kaa, yu si, Gad lov di worl so moch dat im gi op im wan dege-dege Bwai Pikni, so enibadi we chos iina im naa go ded bot a-go liv fi eva.” (Jan 3:16) Dat shuo wi se Gad sen Jiizas fi kom ded fi wi. Wen im tingk bout di lov we Gad shuo, wan man we niem Prabhakar we a 86 ier uol an kom fram Indiya se: “It shuo mi se Jeuova a lov mi kyaahn don. An kaaz im lov mi, im mek mi get di chaans fi liv fi eva.”

Wi get fi nuo wa wi kyan du fi shuo Gad se wi tangk im fi wa im du fi wi.

Di Baibl tel wi iina Fos Jan 2:3 se: “Wen wi du wa Gad se wi fi du,” a so wi shuo im se wi tangk im fi aal a wa im du fi wi. Jeuova Gad mek wi nuo wa wi kyan du so wi kyan av wan api laif rait ya nou. (Aizaiya 48:17, 18) Kaaz im no waahn non a wi fi sofa, im tel wi se ef wi du di sitn dem we im se wi fi du, wi a-go get fi av wan api laif nou, an wi a-go get di chaans fi liv fi eva.

RIID GAD WOD EVRIDIE

Wen yu prie tu Gad an aks im fi elp yu an yu du wa im se yu fi du, dat wi gi yu di chaans fi liv fi eva

Wi afi nyam fuud so wi kyan liv. Bot iina Matyu 4:4 Jiizas se: “Man no liv pan bred wan. Bot wi niid evri wod we kom outa Gad mout fi riili liv.”

Ef wi waahn fi nuo di sitn dem we Gad se, wi afi riid di Baibl. Wen yu stodi di Baibl, yu wi get fi nuo wa Gad du fi wi aredi, wa im a du fi wi rait ya nou, an wa im a-go du fi wi iina di fyuucha.

PRIE AN AKS GAD FI ELP YU

Ef yu waahn fi du wa Gad se yu fi du, bot it aad fi yu tap du di sitn dem we im se yu no fi du, wa kyan elp yu? Wa yu kyan du, a get fi nuo Gad gud gud.

Mek wi tel yu bout wan uman we dem kaal Puuchi. Shi did a liv wan doti laif. Bot wen shi staat fi stodi di Baibl, shi lorn se Gad se wi fi “ron we fram aal kain-a seks sin.” (1 Korintiyan 6:18) So Puuchi prie an aks Gad fi elp ar fi tap du di bad sitn dem we shi did a du. Bot shi did stil fain it aad fi tap du dem sitn de. Shi se: “Wen mi fiil laik mi waahn get miks op iina seks sin, mi prie tu Jeuova an taak tu im fram mi aat, kaa mi nuo se mi kyaahn du dis bai miself. Kaa mi a prie tu Jeuova so moch, it mek mi an im get kluos kluos.” Jos laik Puuchi, wol iip a piipl a get fi nuo Gad. Im a gi dem di chrent we dem niid fi chienj dem laif fi di beta, an fi liv dem laif iina wan wie we a-go mek im api.—Filipiyan 4:13.

Di muo yu nuo Gad, a di muo im a-go ‘mek it so yu an im kyan kluos’ laik unu a gud gud fren. (Gyalieshan 4:9; Saam 25:14) An a so kom yu wi get fi liv fi eva iina di nyuu worl we Gad av fi wi. Bot wa a-go gwaan iina di nyuu worl? Di neks paat a-go mek yu nuo di ansa.

a Di Baibl mek wi nuo se Jeuova a Gad niem.

DI WACHTOWA