Ilungu ila syavĩta nĩsyoonany’a kana Ngai akilyĩ kũete mũminũkĩlyo wa ĩvinda yĩĩ ĩthũku na mathĩna mayo onthe. Tũi na nzika akeeka ũu. Nĩkĩ? Nũndũ Ndeto yake, Mbivilia, yathanĩte atĩĩ:

“Nthĩ nĩkũvĩta.”​—1 YOANA 2:17.

O na nĩtwĩsĩ kana ve andũ makavonoka nũndũ mũsoa ũsu wongelete kwathana atĩĩ:

“Ũla wĩkaa kwenda kwa Ngai ekalaa tene na tene.”

Kwoou ethĩwa nĩtũkwenda kũvonoka, no nginya twĩke kwenda kwa Ngai. Ĩndĩ nĩ kana tũmanye kwenda kwa Ngai, no nginya twambe kũkwata ũmanyi ĩũlũ wake.

Yesũ aisye: “Thayũ wa tene na tene nĩw’o ũũ, maendeee kũkwata ũmanyi ĩũlũ waku, Ngai ũla wa w’o weka.” (Yoana 17:3) Nĩ kana twĩvonoka mũminũkĩlyo na tũyĩkala tene na tene, nĩtwaĩle ‘kũendeea kũkwata ũmanyi’ ĩũlũ wa Ngai. Kĩu kĩonany’a kana kwĩtĩkĩla kana Ngai e kw’o kana kũmanya tũmaũndũ tũnini ĩũlũ wake kũitoetye. Nĩtwaĩle kũtuma ndũũ nake. Na nĩ kana andũ maendeee kwĩkala me ndũũ, nĩmatũmĩaa ĩvinda yoo vamwe. Ũu now’o twaĩle kwĩkana na ndũũ yitũ na Ngai. Kwasũanĩa maũndũ amwe ma vata twĩmanyĩasya Mbivilianĩ matonya kũtũtetheesya tũtume ndũũ na Ngai na tũiendeea kwĩkala twĩ ndũũ nake.

Tũĩsaa lĩu nĩ kana twĩkale thayũ. Ĩndĩ Yesũ aisye: “Mũndũ ndekalaa thayũ nũndũ wa mũkate w’oka, ĩndĩ nũndũ wa kĩla ndeto yumaa kanyw’anĩ wa Yeova.”—Mathayo 4:4.

Ũmũnthĩ, ndeto sya Yeova ikwatĩkanaa Mbivilianĩ. Wasoma ĩvuku yĩu ĩtheu, ũkeemanyĩsya ũw’o wa vata ĩũlũ wa maũndũ ala Ngai weekie tene kwondũ wa andũ, ala ũendeee kwĩka ũmũnthĩ, na ala ũkeka ĩvinda yũkĩte.

Nĩ kyaũ waĩle kwĩka ethĩwa nũkwenda kũatĩĩa mĩao ya Ngai, ĩndĩ ũyĩthĩa wĩĩw’a ve vinya kũekana na maũndũ ala ũmenete? Kũmũmanya Ngai nesa no kũũtethye mũno.

Kwasũanĩa ngelekany’o ya mũndũ mũka tũũmwĩta Sakura, ũla waĩ na mwĩkalĩle mũthũku. Yĩla wambĩĩie kwĩmanyĩsya Mbivilia, nĩwamanyie kana Ngai aĩtye ‘tũkĩe ũlaalai.’ (1 Akolintho 6:18) Kwoou nĩwavoyie Ngai amũnenge vinya, na kĩu kyatuma aekana na mwĩkalĩle ũsu. Ĩndĩ o na ũmũnthĩ, no ũtatĩkaa aũsyokee. Aĩtye atĩĩ: “Yĩla mesilya mathũku mooka kĩlĩkonĩ kyakwa, nĩmũvoyaa Yeova kuma ngoonĩ andetheesye nũndũ nĩnĩsĩ ndyĩsa kũmasinda na vinya wakwa mwene. Mboya nĩtumĩte nĩmũthengeea Yeova.” O ta Sakura, andũ milioni mbingĩ nĩmaendeee kũmũmanya Ngai nesa. Nake nũmanengae vinya wa kwĩka moalyũku nĩ kana mekale ũndũ wendete.—Avilivi 4:13.

O ũndũ waendeea kũmũmanya Ngai nesa, now’o wĩthĩaa o nake ‘Ngai nũkwĩsĩ’ ta wĩ mũnyanya wake mũseo. (Akalatia 4:9; Savuli 25:14) Kĩu kĩkatuma ũvonoka na ũilika nthĩ nzaũ ya Ngai. Ĩndĩ yo nthĩ ĩsu ĩkeethĩwa ĩilye ata? Kĩlungu kĩla kĩatĩĩe nĩkĩkũelesya ũndũ ũsu.