Yɛɛnɛ Ŋ Nɔ yɛ Ma Tosa le Waa o Chieeŋ Sɛnɛiyo Niŋ?
Buŋgaŋ naŋ hiou woŋ chɔm maa Mɛlɛka cho suŋ hunɔɔ chieeŋ dɛnɛ wɔɔŋndo hoo tɛɛmbuu, mbo faŋa bahawɛilaŋ kpou. Ŋ nɔ tiindaŋndo kɛsɛ maa hei cho yɔŋnɔŋ. Le yɛɛnɛ? Kanifuule, Diom Mɛlɛkaa dimi aa:
“Chieeŋndo cho hiouwɔɔ a yeemaŋ cho leniŋ ndoŋ.”—1 CHƆŊ 2:17.
Ŋ nɔ tiindaŋndo maa waŋnda cho pioŋɔɔ sɔla, kanifuule bolle Baabuile pilɛ le leŋ le dimi aa:
“Wana o wana tosa pɛ hɛnaŋ Mɛlɛkaa, o cho wa yoomu lefafɛɛŋ.”
Lelaŋ, te ŋ yeema pɛ le pioŋɔɔ sɔlaa, ŋ nɔ miŋ tosa hɛnaŋ Mɛlɛkaa. Nduyɛ le miŋ sina nyɛ Mɛlɛka hɛnaŋndo, ŋ nɔ miŋ sina fɛlɛŋ Mɛlɛka.
LE MA HUŊ SƆLA PIOŊƆƆ, “A NƆ MA SINA” MƐLƐKA
Mi Chiisu dimi aa: “Le yoomu fafɛɛŋndo sɔlaa, a nɔ ma sina num, num Mɛlɛka tonyaa numpilɛ kpe.” (Chɔŋ 17:3) Le miŋ huŋ sɔla pioŋɔɔ, nduyɛ miŋ wa achal lefafɛɛŋ, ŋ nɔ miŋ sina Mɛlɛka. O cho ko sinaa maa Mɛlɛka cho achal ɔɔ sinaa sɔɔŋ ŋ tiŋ a ndu okɔɔ kinɛi le. Kɛ ŋ nɔ miŋ siiŋguu ndu chaaŋ naa. Te ŋ yeema pɛ mi chaŋyɛi naŋ nɔ a waŋndo ve wa i kala poŋ, ŋ nɔ miŋ chua teleŋndo tau le waa latulu a wana koŋ. Lende koni i cho a chaŋyɛi tosaa a Mɛlɛka ni. Tofawɔ tonyala sɔvɛla naŋ pɛɛku o Baabuiyo niŋndaŋ, la mala naa le miŋ nɔ chaŋyɛi kɛndɛi a Mɛlɛka, nduyɛ miŋ hiou lachi a waa o chaŋyɛi niŋ a ndu wo.
WA DIOM MƐLƐKAA PƐƐKOO LEPAA O LEPAA
Lepaa o lepaa, miŋ de nyɛdiaa le halikpeŋ miŋ wa achal. Kɛ mi Chiisu dimi aa: “O cho ko nyɛdiaa le tosa mi wana wa yoomu le. Kɛ diom o diom Chɛhowa dimi pɛ, o tosa mi wana wa yoomu.”—Maatiu 4:4.
Hau, ŋ saaluŋ diomnda Chɛhowa laŋ o Baabuiyo niŋ. Te a wa pɛ Baabuiyo pɛɛkoo, a cho sina nyɛ Mɛlɛka tosal waŋnda chieeya o paandoo niŋndo, nyɛ o cho nda tosallo suŋ suŋndo, vɛlɛ a nyɛ o cho nda hunɔɔ tosal o chilaŋ niŋndo.
NYUNA MƐLƐKA LE MALAA O PIƐILEŊ NIŊ
Te balaŋ la wa wɔ num pɛ o sɔɔŋ Mɛlɛka kɛɛ woŋ niŋ, nduyɛ ma cha ndi i kala le muŋ malɔɔ, yɛɛnɛ ŋ nɔ yɛ ma tosa le ndu diikɔŋndo? Mɛɛ o hei niŋ, Mɛlɛka sinaa nyɛkɛndɛi tiuba mbo mala num.
Nuawɔ tamaselii chua pilɛ diolaŋ aa Sakula. Chuaa hoo wa balaŋ o kaala nɔɔlɛilaŋ niŋ. Kɛ mɛɛ o kandu Baabuiyo pɛɛkoo, mbo pɛɛku a sawa Mɛlɛkaa okɔɔ aa: “La wou laba o kaa ihini nɔɔlɛiyo niŋ te.” (1 Kɔliŋtiaŋ 6:18) Mi Sakula nyuna Mɛlɛka o piɛileŋ niŋ le malaa, nduyɛ mbo sɔla batiuwaa, mbo soli balaŋ o kaalaŋ ndaŋ niŋ. Kɛ o cho wɔ yeemaŋ wɔɔŋndoŋ chɔulabaa kɛ. Mbo dimi aa, “Te yiyaŋnda wɔɔŋndaŋ la hiŋ ya pɛ o kɔl, mi piɛi o Chɛhowa lo a kɔllo kpou. Kanifuule, I sina maa I tiuba mi chɔulaba laŋ a ba ni le. Piɛileŋ le mala ya niŋ mi sɔɔŋguu Chɛhowa ikɛi kpɛɛluŋ.” Maa Sakula, waŋnda o miiliɔŋndaŋ niŋ cho Mɛlɛka sinaa. Nduyɛ o cho nda mala nda yeema wo kioo le ma tosa siŋgaŋndaŋ o yoomula ndalaŋ niŋ, okoŋ ma tosa nyɛ nɛŋi ndu kɔllo wo.—Filipiaŋnda 4:13.
Te a sina pɛ Mɛlɛka nyɛkɛndɛi, lende koni “Mɛlɛka bɛɛ sina” num ni, nduyɛ ma simnuŋ chaaŋ ndɔ kɛndɛ kɛndɔɔ. (Kaleesiaŋnda 4:9; Sam 25:14) Hei mala num ma suliŋ le luɛiyɔɔ o chieeŋ sɛnɛi Mɛlɛkaa niŋ. Kɛ vɛɛ chieeŋ sɛnɛi koŋ cho yɛ wa? Buŋgɛi cho lachi ve cho nyunaa hoo muli.
a A mɛɛ Baabuiyo dimi yɛ, diola Mɛlɛkalaŋ la cho Chɛhowa ni.