Malongi maviokele masongele vo, ke kolo ko Nzambi ofwasa e nza yayi yambi yo fokola e mpasi zawonso. Tulenda kala ye ziku vo e diambu diadi, vangama kikilu divangama. Ekuma? E kuma kadi, e Diambu dia Nzambi disianga o nsilu vo:

“E nza mu vioka ina.”—1 YOANE 2:17.

Kansi, tulenda kala ye ziku vo vekala ye wantu bevuluka, kadi e sono kiaki mpe kisianga o nsilu vo:

“Ndiona ovanganga luzolo lwa Nzambi, ozinga kaka yakwele mvu.”

Ozevo, avo tuzolele vuluka muna lufwasu lwa nza yayi, tufwete vanga luzolo lwa Nzambi. Muna zaya alweyi i luzolo lwa Nzambi, entete tufwete kunzaya.

Yesu wavova vo: “Muna vua moyo a mvu ya mvu, divavanga vo batoma kuzaya, ngeye Nzambi mosi kaka aludi.” (Yoane 17:3) Muna vuluka muna lufwasu lwa nza yayi yo zinga yakwele mvu, tufwete ‘zaya’ Nzambi. Ediadi mayingi divavanga, ke zaya kaka ko vo Nzambi una yovo zaya mambu mankaka mu kuma kiandi. Divavanga vo twakala akundi andi. Aweyi tulenda kadila akundi andi? Avo tuzolele kala ye kikundi kiakola yo muntu divavanga vo twavaulanga e ntangwa ya mokena yandi. I diau mpe divavuanga muna kumika e kikundi kieto yo Nzambi. Tala maka malongi mena muna Bibila malenda kutusadisa mu kumika kikundi kieto yo Nzambi.

Muna kwamanana zinga, divavanga vo twadianga lumbu yawonso. Kansi Yesu wavova vo: “O muntu ke zingilanga kaka mu mbolo ko, kansi muna konso diambu divaikanga muna nu’a Yave.”—Matai 4:4.

E mvovo mia Yave tulenda mio solola muna Bibila. Vava tutanganga o nkanda wau wavauka, tulongokanga dina Nzambi kavanga mu kuma kieto, dina kevanganga owau ye dina kevanga kuna sentu.

Dilenda kala vo luzolo lwa lemvokela Nzambi una lwau, kansi diampasi mu yambula vanga mana kemenganga. Avo i wau, adieyi olenda vanga? Otoma zaya Nzambi dilenda kusadisa.

Tala e nona kia nkento mosi ona tuyikila muna nkumbu a Sakura. Wayivananga emvimba muna mavangu ma zumba. Vava kayantika longoka e Bibila, wabakula vo Nzambi okutukanikinanga vo ‘twatina mavangu ma zumba.’ (1 Korinto 6:18) Sakura walomba lusadisu kwa Nzambi muna sambu yo yambula e vangu diadi diambi. Kansi, wakinu nuana ye vangu diadi. Wavova vo: “Vava ilwakilwanga kwa ngindu za vutukila e vangu dia zumba, iziulanga o ntim’ame kwa Yave muna sambu, kadi nzeye wo vo kilendi sunda vangu diadi mono mosi ko. E sambu kinsadisi mu toma fimana Yave.” Nze Sakura, mafunda ye mafunda ma wantu mu toma zaya bena Nzambi. Okubavananga nkuma bavuidi o mfunu muna vanga e nsobani muna zingu yo zingila mun’owu wa nkanikinu miandi.—Filipi 4:13.

Ekolo otoma zaya Nzambi, ongeye mpe ‘ozayakana kwa Nzambi’ yo kituka nkundi andi akola. (Ngalatia 4:9; Nkunga 25:14) Muna kuma kiaki, okala ye lau dia vuluka yo zingila mu nz’ampa ina Nzambi kasia o nsilu. Kansi, aweyi ukala e zingu muna nz’ampa? E longi dilanda disasila e diambu diadi.