Katak ko l̦o̦k rej kaalikkar bwe ejjabto jãn kiiõ Anij enaaj kõjem̦l̦o̦k jukjukun pãd in enana im aolep apañ ko rej wal̦o̦k. Jemaroñ lukkuun lõke bwe men in enaaj wal̦o̦k. Etke? Kõnke Naanin Anij, Baibõl̦ eo, ej kallim̦ur bwe:

“Lal̦ in ej etal ñan an jako.”​—1 JON 2:17.

Jemaroñ lõke bwe enaaj wõr ro im renaaj el̦l̦ã im mour kõnke ilo ejja eoon in wõt ej kallim̦ur im ba bwe:

“Eo ej kõm̦anm̦an ankilaan Anij enaaj pãdwõt ñan indeeo.”

Kõn men in, bwe jen maroñ bõk lo̦mo̦o̦r, jej aikuj kõm̦anm̦an ankilaan Anij. Bõtab, ñan jel̦ã ta in ankilaan Anij, jej aikuj m̦okta jel̦ã kõn e.

Jesus ear ba: “Bwe ren maroñ bõk mour indeeo, rej aikuj in jel̦ã kõn kwe, Anij eo wõt em̦ool.” (Jon 17:3) Bwe jen el̦l̦ã jãn jem̦l̦o̦kin jukjukun pãd in im mour ñan indeeo, jej aikuj ‘jel̦ã kõn Anij.’ Ad jel̦ã kõn Anij ejjab baj mel̦el̦ein bwe jej tõmak bwe em̦ool an pãd ak ad jel̦ã jejjo men kõn e. Ak ej mel̦el̦ein bwe jej aikuj ejaake juon jem̦jerã Ippãn. Ñe jekõn̦aan bwe jem̦jerã eo ad ippãn juon armej en kajoor, jej aikuj jol̦o̦k iien ippãn. Ejjel̦o̦k oktak jãn jem̦jerã eo ad ippãn Anij, jej aikuj jol̦o̦k iien ñan kõkajoore kõtaan eo ad ippãn. Lale jet iaan katak ko ilo Baibõl̦ me rej jipañ kõj ñan ejaake im kõkajoorl̦o̦k jem̦jerã eo ad ippãn Anij.

Jej m̦õñã aolep raan bwe jen maroñ mour. Ijoke Jesus ear ba: “Armej rejjab maroñ mour wõt kõn bũreet, ak rej mour kõn naan ko otemjej rej wal̦o̦ktok jãn lo̦ñiin Jeova.”​—Matu 4:4.

Rainin, jej lo naan ko an Jeova ilo Baibõl̦ eo. Ilo am̦ katak bok in eokkwõjarjar, kwõnaaj kal̦apl̦o̦k am̦ jel̦ã kõn katak ko raorõk kõn ta ko Anij ear kõm̦m̦ani ilo iien ko etto, ta ko ej kõm̦m̦ani kiiõ, im ta ko enaaj kõm̦m̦ani ilju im jekl̦aj.

Ta eo kwõmaroñ kõm̦m̦ane ñe kokõn̦aan pokake Anij ak epen am̦ bõjrak jãn am̦ kõm̦m̦ani men ko ej ba renana? El̦aññe ãindein, am̦ kal̦apl̦o̦k am̦ jel̦ã kõn Anij emaroñ jipañ eok ilo juon wãween ejejuwaan.

L̦õmn̦ak kõn juon kõrã me jenaaj n̦aetan Sakura, eo im ekõn kõm̦m̦ani m̦anit ko rettoon. Ke ear jino katak Baibõl̦, ear katak kõn kien eo an Anij ñan “ko jãn l̦õñ.” (1 Korint 6:18) Sakura ear jar ñan Anij bwe en jipañe im ear maroñ bõjrak jãn m̦anit kein renana. Bõtab jãn iien ñan iien ej aikuj tarin̦aeik wõt menin kapo ko. Ej ba, “El̦aññe juon l̦õmn̦ak ettoon ej jiktok ilo l̦õmn̦ak eo aõ, ij kwal̦o̦k aolepen bũruõ ñan Jeova ilo jar kõnke ijel̦ã bwe ijjab maroñ tarin̦aeik men in kõn kajoor eo aõ make. Kajoorin jar ear jipañ eõ ñan epaakl̦o̦k Jeova.” Elõñ milien armej rej jino aer katak im jel̦ã kõn Anij, ãinwõt Sakura. Im Anij ej lel̦o̦k ñan er kajoor eo rej aikuji ñan kõm̦m̦an oktak ko ilo mour ko aer, im bwe ren mour ilo juon wãween ej kabuñbũruon.​—Pilippai 4:13.

Ilo am̦ epaakl̦o̦k wõt Anij im kal̦apl̦o̦k am̦ jel̦ã kajjien, enaaj l̦apl̦o̦k an ‘Anij jel̦ã kajjiem̦’ ãinwõt juon jeran eaorõk. (Galetia 4:9; Sam 25:14) Innem kwõnaaj maroñ el̦l̦ã im mour ilo lal̦ eo ekããl an Anij. Bõtab enaaj ewi wãween mour ilo lal̦ eo ekããl? Ilo katak in tok juon, enaaj kõnono kõn men in.